Ekesote 13

Fakatapu o uluaki tupu ki le Eteleno

1Na masau loa le Eteleno kia Moisese, o pati : 2Momoli mai kiate au a uluaki fuli, a uluaki fuli o fanau a Iselaele, tatau fai a tagata mo manu : Ko loku vaega latou.

3Na pati loa Moisese ki le kakai : Kotou manatui le aso leinei, le aso leia na kotou mavae ai i Esipito, i le fale o le popula ; talie ko le lima makeke o le Eteleno leia na fakamavae ia koutou. E leaise kai loa se pane fakatupu. 4E kotou mavae i le aso nei, i le masina o le tuuti o le fulumeto. 5Ka fakaulu loa a koe e le Eteleno ki le fenua o le kau Kanaane, mo le kau Eti, mo le kau Amole, mo le kau Evi, ti mo le kau Sepusi, fenua leia na fakapapau e ia ki ou tamana ke soli kiate koe, fenua leia e tafe ai le sua manu mo le meli, e ke fai loa ki le Eteleno le atolasio leinei i le masina totonu leinei. 6I aso e fitu, e ke kai loa ni pane sala fakatupu ; ti e ke fai loa i le fitu o aso se aso lasi ki le Eteleno. 7E kai loa ni pane sala fakatupu i aso e fitu ; e leaise maua loa i lou fale se pane fakatupu, ti e leaise maua loa i lou fale se fakatupu, ti mo lou fenua katoa. 8E ke pati loa ki lou vosa : E fakamanatu i le nea leinei le nea leia na fai e le Eteleno kiate au, i le aso leia na kau mavae ai i Esipito. 9E tuu loa le nea lena kiate koe ofaipe se fakamailoga i lou lima, ofaipe se tausi alofa i ou vasa mata, o tupu ke maua le lao a le Eteleno i lou gutu ; talie ko le Eteleno leia na fakamavae ia a koe i Esipito, ki lona lima makeke. 10E ke taupau loa le fakatotonu leinei i le temi leia kua fakatuutuu ki ai, i fetuu fuli.

11I le aso leia e fakaulu ai loa a koe e le Eteleno ki le fenua o le kau Kanaane, ofai ki lana fakapapau kiate koe mo ou tamana, ke soli atu a ia kiate koe, 12e ke vaei kese loa ki le Eteleno a uluaki fuli, tatau foki mo uluaki fuli o manu ala e ke maua loa : E maua loa e le Eteleno a manu tagata. 13E ke totogi loa ki se akeno le uluaki o le asino ; ti kapau e leaise ke totogi loa a ia, ti e ke fatii loa lona ua. E ke toe totogi foki a uluaki fuli o le tagata i ou vosa. 14Ti kapau e vesili atu loa lou vosa i se aso : Kolea le uiga o le nea lena ? E ke tali loa kiate ia : Na fakamavae matou e le Eteleno ki lona lima makeke mei Esipito, mei le fale o le popula ; 15kae, i le fakafefeka e Falaone o lona loto, o leaise tuku e ia matou ke ano, na tamate loa e le Eteleno a uluaki fuli i le fenua o Esipito, mei uluaki o tagata o kaku ki uluaki o manu. Ko lena le tupuaga o laku momoli ki le Eteleno le sakilifisio ki manu tagata uluaki fuli, ti mo laku totogi ai a uluaki fuli o oku vosa. 16E tuu loa le nea lena ko se fakamailoga i lou lima ti ko se fakamanatu i lou lae ; talie na fakamavae matou i Esipito e le lima makeke o le Eteleno.

Saele ki le tai Kula

17I le aso leia na tuku ai loa e Falaone le kakai ke ano, na leaise taki loa e le Atua le kakai i le ala o le fenua o le kau Filisitini, logo ai lona ofi ; talie na pati loa le Atua : E feala loa ke fakasemala le kakai i lana tio ki le tau, ti ke toe liliu loa a ia ki Esipito. 18Kae na taki loa e le Atua le kakai i le ala o le toafa, i le fetuu o le tai Kula. Na pale loa fanau a Iselaele ofaipe se kau tau mei le fenua o Esipito. 19Na too loa e Moisese a ivi o Sosefo o ano mo ia, talie na pati Sosefo ki fanau a Iselaele ke lotou fakapapau ake kiate ia : E fakatele loa le Atua kia koutou, ti kotou paleaki loa oku ivi mo koutou ke mamao i leinei.

20Na lotou mavae loa i Sukoti, ti na lotou nofo loa i Etami, i le potupotu o le toafa. 21Na ano loa le Eteleno i olatou mua i le ao i se fa pou afu, o taki latou i le ala ; ti e i le pouli i o se fa pou afi, o fakamalama latou, o tupu ke lotou saele i le ao mo le pouli. 22Na leaise toe puli le pou afu i mua o le kakai i le ao, ti na leaise toe puli le pou afi i le pouli.

Currently Selected:

Ekesote 13: FB2000

Highlight

Compare

Copy