Ekesote 12
12
Fakatuu o le Pasikate
1Na pati loa le Eteleno kia Moisese mo Alone i le fenua o Esipito : 2E liliu loa le masina leinei kia koutou ko le uluaki masina o masina ; e liliu loa a ia kia koutou ko le uluaki masina o le fetuu. 3Kolua masau ki le fakatasiga o le kakai katoa o Iselaele, ti kolua pati : i le aso kau agafulu o le masina leinei, e kotou too loa se akeno i famili taki tasi, se akeno i le fale. 4Kapau loa e toka teiki le fale ki se akeno, ti e too loa e ia le akeno o fakatasi mo le fale leia e ofi ake, o fakafuafua ki le api o le kakai. E kotou fuafua loa le akeno lena o mulimuli ki le nea leia e mafai ke kai e le tagata taki toka tasi. 5E kotou too loa se akeno tagata lee mele, mo fetuu tasi. E feala ke kotou too loa se akeno pe ko se uviki koti. 6E kotou taupau loa le manu o kaku ki le aso kau agafulu tupu fa o le masina leinei ; ti e tamate loa a ia e le fakatasiga katoa o Iselaele i le afiafi pouli o le aso lena. 7E too loa le toto o le manu, o takai ai a pou e lua mo le kau matapa o le matapa o fale ala e kai ai loa le manu. 8I le po lena, e kai loa le kanofi o le manu, leia kua tunu i le afi, mo ni pane sala fakatupu ti mo ni lau laakau kona. 9E leaise kotou kai mata loa le kanofi, pe saka loa a ia i le vai, kae e kotou tunu loa a ia i le afi, o fakatasi mo le ulu, mo vae, ti mo tootooga. 10E leaise kotou tuku loa se nea ke kaku ki le usu ; ti kapau e toe loa se nea ki le usu, ti e kotou tutu loa a ia i le afi. 11E kotou kai loa le manu, kae kua kotou toi loa okoutou kilipipi ki okoutou vakavaka, ti kua kotou tui loa okoutou taka ki okoutou vae, ti kua kotou too loa okoutou tokotoko i okoutou lima ; ti e kotou kai fakatavili loa le manu. Ko le Pasikate a ia o le Eteleno.
12I le po lena, e kau fakalaka loa i le fenua o Esipito, ti e kau tamate loa a fanau uluaki fuli o le fenua o Esipito, mei le tagata o kaku ki le manu, ti e kau fakasoko loa aku tautea ki atua fuli o Esipito. Ko au ko le Eteleno. 13Ti ko le toto, e liliu loa a ia kia koutou ko se fakamailoga i fale ala e kotou nonofo ai loa ; e kau tio loa ki le toto, ti e kau fakasili loa ia koutou, ti e leaise maumaui loa koutou e se tautea ke kotou mamate ai, mo ka kau taai loa le fenua o Esipito. 14E kotou taupau loa le fakamanatu o le aso lena, ti e kotou tausi loa a ia ko se aso lasi ki le Eteleno ; e kotou tausi loa a ia ofaipe se lao ke tuku sosolo i okoutou sakoga. 15I aso e fitu, e kotou kai loa ni pane sala fakatupu. E kamata loa mei le uluaki aso, e leaise toe maua loa se fakatupu i okoutou fale ; talie ko tagata fuli ala e kai loa ki se pane fakatupu, mei le uluaki aso o kaku ki le fitu o aso, e tuuti loa a ia mei Iselaele. 16I le uluaki aso, e kotou fai loa se fakatasi tapu ; ti i le fitu o aso, e kotou toe fai loa se fakatasi tapu. E leaise fai loa se gaoi i aso ana ; ko le nea e tasi leia e fakataga ko le teuteui o le nea kai a le tagata taki toka tasi. 17E kotou tausi loa le aso o pane sala fakatupu, talie ko le aso a ia leia na kau fakamavae ai akoutou kau tau i le fenua o Esipito ; e kotou taupau loa le aso lena ofaipe se lao ke tuku sosolo ki okoutou sakoga. 18I le uluaki masina, i le aso kau agafulu tupu fa o le masina, i le afiafi, e kotou kai loa ni pane sala fakatupu o kaku ki le afiafi o le aso kau lua tupu tasi. 19I aso e fitu, ke aua na toe maua loa se fakatupu i okoutou fale, talie ko tagata fuli ala e kai loa ki se pane fakatupu, e tuuti loa latou mei le fakatasiga o Iselaele, tatau aifai pe ko se matapule pe ko se tagata totonu o le fenua. 20E leaise kotou kai loa se pane fakatupu ; i okoutou nofolaga fuli, e kotou kai loa ni pane sala fakatupu.
21Na kalagai loa e Moisese le kau matua fuli o Iselaele, o pati kia latou : Kotou ano o filifili se manu ki okoutou famili, ti kotou momoli le Pasikate. 22E kotou too loa se taulu isopa, e kotou fakasusu loa a ia ki le toto leia e tuku loa i le pesini, ti e kotou takai loa le kau matapa mo fa pou e lua o le matapa, ki le toto leia e tuku loa i le pesini. E leaise toe mavae loa se tasi o koutou mei lona fale o kaku ki le usu. 23Ka fakalaka loa le Eteleno o taai Esipito, e tio loa a ia ki le toto i le kau matapa mo fa pou e lua, ti e fakasili loa le Eteleno i aluga o le matapa, e leaise fakataga loa e ia ke ulu le aselo maumau ki okoutou fale, o tamate koutou. 24Kotou tausi loa le nea lena ofaipe se lao kia koutou mo akoutou fanau o lee gato. 25Ka kotou ulu loa ki le fenua leia e soli atu loa kia koutou e le Eteleno, o mulimuli ki lana fakapapau, kotou taupau loa le lao taputapu lena. 26Ti kapau e vesili atu loa akoutou fanau kia koutou : Kolea le uiga o le tausi lena ? 27E kotou tali loa : Ko le sakilifisio o le Pasikate ki le Eteleno, leia na fakasili i aluga o fale o fanau a Iselaele i Esipito, i lana taai Esipito kae saofaki otatou fale. Na punou loa le kakai ki le kele o atolasio. 28Ti na ano loa a fanau a Iselaele, ti na lotou fai loa le nea leia na fakatotonu e le Eteleno kia Moisese mo Alone ; na lotou fai loa a ia.
Mamate o uluaki tupu fuli o Esipito,
29I loto malie o le pouli, na tamate loa e le Eteleno a fanau uluaki fuli o le fenua o Esipito, mei le uluaki o Falaone, leia e ekeeke i lona ekeekeaga fakasau, o kaku ki le uluaki o le tagata popula, leia e nofo i le pilisoni, mo uluaki fuli o manu. 30Na tuu ake loa Falaone i le pouli, a ia mo ana tagata fakasausau fuli, ti mo le kau Esipito katoa ; ti na logo loa i Esipito ni tagi lalasi, talie na leaise sala se fale mo lona mate. 31I le po fai lena, na kalagai loa e Falaone a Moisese mo Alone, o pati kia laua : Kotou tutuu ki aluga, ti kotou mavae i loku kakai, a koutou mo fanau a Iselaele. Kotou ano, ti kotou tausi ki le Eteleno o mulimuli ki le nea leia na kolua pati mai ki ai. 32Kotou too akoutou ovi mo akoutou pipi, o mulimuli ki le nea leia na kolua pati ki ai ; kotou ano, ti kotou tapuaki mai kiate au. 33Na ekenaki loa le kakai e le kau Esipito ke mavae fakavilivili i le fenua, talie na lotou pati : E motou mamate fuli loa. 34Na too loa e le kakai le falina kua oki i le lusi kae na leikiaise tupu. Na lotou kofukofu loa a lusiaga falina ki olatou kofu, o amo latou i olatou tuauma. 35Na fai loa e fanau a Iselaele le nea leia na pati ki ai Moisese, ti na lotou kole loa ki le kau Esipito ni ipu siliva, mo ni ipu aulo, ti mo ni kofu. 36Na tuku loa e le Eteleno ke alofa le kau Esipito ki le kakai, o lotou tali loa alatou kole. Ti na lotou fakamativa loa le kau Esipito.
Mavae o fanau a Iselaele i Esipito
37Na mavae loa fanau a Iselaele mei Lamisese ki Sukoti ; na fakaano lolatou api ki tino lelau afe e ono tagata saele, kae na leaise lau a toe. 38Na pale fakatasi loa mo latou se kakai kese leia na toka api ; ti na lotou maua ia foki ni kau manu lalasi, mo ni ovi, ti mo ni pipi. 39Na lotou fakamoso loa ni kato sala fakatupu ki le falina leia kua lusi, leia na aumai mei Esipito kae na leikiaise tupu, talie na kapu latou mei Esipito, o lotou mavae fakatavili kae na leaise lotou too ia ni nea kai ke ano mo latou. 40Ko le fualoa o le nofo o fanau a Iselaele i Esipito ko fetuu e kau lelau fa kau tolu. 41I le katoa o fetuu ana e kau lelau fa kau tolu, i le aso fakaoki, na mavae loa a kau tau fuli a le Eteleno i le fenua o Esipito.
42E fakamanatu loa le po lena ki le Eteleno, talie na fakamavae loa e ia lona kakai i le fenua o Esipito ; e tausi loa le po lena ki le Eteleno e fanau fuli o Iselaele mo olatou sakoga.
43Ti na pati loa le Eteleno kia Moisese mo Alone : Ko leinei se fakatotonu ki le Pasikate : E leaise kai loa se tagata matapule ki ai. 44E ke silikosisio loa a tagata fakasausau fuli na totogi siliva ; ti o mafai loa ke lotou kai le Pasikate. 45E leaise kai loa le Pasikate e le tagata totonu o le fenua mo le tagata gaoi totogi. 46E kai loa le Pasikate i le fale ; e leaise kotou ave loa se kanoi manu ki fafo, ti e leaise kotou fatii loa se ivi fua e tasi. 47E fai loa le Pasikate e le fakatasi katoa o Iselaele. 48Kapau e nofo loa se tagata matapule mo koe, ti e loto loa a ia ke kau i le Pasikate o le Eteleno, e silikosisio loa a tagata fuli o lona fale ; ti o fakataga loa ke fai e ia le Pasikate ; e tatau loa a ia mo le tagata o Iselaele. Kae e leaise kai loa le Pasikate e se tagata leia e leikiaise silikosisio. 49Ko le lao e tasi ki le tagata o le fenua mo le tagata matapule leia e nofo i loto malie o koutou.
50Na fai loa e fanau fuli o Iselaele le nea leia na fakatotonu e le Eteleno kia Moisese mo Alone ; na lotou fai loa o fenaaki. 51I le aso totonu lena, na fakamavae ai loa e le Eteleno i le fenua o Esipito a fanau a Iselaele, o mulimuli ki alatou kau tau.
Currently Selected:
Ekesote 12: FB2000
Highlight
Share
Compare
Copy
Want to have your highlights saved across all your devices? Sign up or sign in
© Société Biblique de Genève, 2000-2020
