Efeso 1

Fakaalofa

1Ko au Paulo, apositolo a Sesu-Kilisito i le finegalo o le Atua, ki le kau sagato i Efeso ti mo le kau agatonu ia Sesu-Kilisito : 2Ko le kalasia mo le tokamalie ke soli atu kia koutou e le Atua lotatou Tamana, ti mo le Aliki ko Sesu-Kilisito.

Tapuakina fakalaumalie ia Kilisito

3Ke fakafetai ki le Atua, le Tamana o lotatou Aliki ko Sesu-Kilisito, leia na tapuaki ia tatou ki a tapuaki fakalaumalie fuli i potu fakalagi ia Kilisito ! 4Iate ia na filifili tatou e le Atua i mua o le fakatupu o le malama nei, ke tou liliu o maokioki mo lee mele i ona mua ; 5ti na fakatuutuu fakatomua e ia tatou i lona alofa ke tou liliu ko ana fanau fufui ia Sesu-Kilisito, o mulimuli ki lona fiafia mo lona finegalo, 6ke fakafetai ki le kololia o lona kalasia leia kua soli fakaalofa e ia kia tatou i lona Alo alofaina. 7Iate ia kua tou maua le totogi i lona toto, le fakamolemole o agasala, o mulimuli ki le lasi kese o lona kalasia, 8leia kua tufa e le Atua kia tatou i poto kesekese ti mo atamai kesekese ; 9ti kua fakasa e ia kia tatou le misitelio o lona finegalo, o mulimuli ki le fakatuutuu fakaalofa leia na fai e ia iate ia totonu, 10o tupu ke fai a ia i le fakaoki o sekulo, ke fakatasi a nea fuli ia Kilisito, a nea ala i le lagi mo nea ala i le malama nei. 11Iate ia kua tou liliu foki ko fanau mau tofiga, talie kua filifili fakatomua e ia tatou o mulimuli ki le fakatuutuu a leia e fai ia a nea fuli o mulimuli ki le tokoi o lona finegalo, 12o tupu ke tou fakavikiviki ki lona kololia, tatou ala kua amanaki malie fakatomua kia Kilisito. 13Iate ia ko koutou foki, i le oki o lakotou fakalogo ki le folafola o le maoki, le Evaselio o lokoutou saofaki, na kotou tui ti na fakamailoga koutou e le Atua ki le Laumalie Maokioki o le fakapapau, 14leia ko se fakamaoki o lotatou tofiga, ki le aso leia e katoa ai loa le saofaki o latou ala na totogi e le Atua ma ana, ke fakavikiviki ki lona kololia.

Kole a Paulo

15Koia ko au foki, i laku logo ki le masaui o lakoutou tui ki le Aliki Sesu ti mo lokoutou alofa ki le kau sagato katoa, 16e leaise koi gato laku fakafetai o tupu ko koutou, o kau too okoutou igoa i aku faikole, 17o tupu ke soli atu e le Atua o lotatou Aliki ko Sesu-Kilisito, le Tamana o le kololia, se laumalie o le poto mo le levelasio i lona iloa ; 18ti ke fakamalamai e ia a mata o okoutou loto, o tupu ke kotou iloa le lasi o le amanaki malie leia e pipiki ki lana kalaga, mo le lasi o koloa o lona tofiga leia e taofi e ia ki le kau sagato, 19ti e feaki le lasi lee gato o lona mafimafi kia tatou ala e tui, leia na fakasa e ia lona makeke katoa, 20i lana fakatuuake a Kilisito mei le kau mate, o fakanofo a ia i lona lima atamai i potu fakalagi, 21o taualuga ake i pule fuli, mo makeke fuli, mo mafimafi fuli, mo mamalu fuli, ti mo igoa fuli ala e feala ke sua, o leaise gato fua i le sekulo leinei, kae i le sekulo foki ka au. 22Ti kua tuku e ia a nea fuli ki ona vae, ti kua soli e ia a ia ko le Ulu o le Ekelesia, 23leia ko lona tino, ko le apeleaga katoa o leia e fakaapele ia nea fuli i kakai fuli.

Currently Selected:

Efeso 1: FB2000

Highlight

Copy

Compare