Tetelonome 25
25
Ko fefele
1Ka fefele loa ni tagata, ti na la ano loa ki mua o le fakamaau ke fakamaaui laua e le tui fakamaau, e fakamatatonu loa leia e mea, kae fakatuaa loa leia e sala. 2Kapau e tonu ke ta leia e sala, e kakau loa e le tui fakamaau ke moe a ia ki le kele, ti ke ta loa a ia i ona mua, o fuafua le lasi o fa ta ki le lasi o le sala. 3E leaise fakataga loa e ia ke fakalaka i fa ta e kau fa, talie na fakalaka loa i ai, ti e feala loa ke fuluveli lou taina ki ou mata.
4Ke aua na ke nonoa loa le gutu o lau pipi tagata i lana takatakafi le fulumeto.
Fafine sala fanau kua mate lona avaga
5Ka nofo fakatasi loa ni fetaina, ti kapau e mate loa se tasi o latou kae na leaise maua sona vosa, e leaise toe avaga loa leia kua mate lona avaga ki tafa o le famili mo se tasi kese ; kae e ano loa le taina totonu o lona avaga ki le fafine, o avaga mo ia. 6Ko le uluaki vosa leia e fanaui loa e le fafine e too ia loa le igoa o le taina leia kua mate, o tupu ke aua na soloi lona igoa i Iselaele. 7Kae kapau e leaise loto loa le tagata lena ke avaga mo lona fafine, e pale loa lona fafine ki le matapa o le kolo ki le kau fakamatuatua, o pati : e leaise loto loku tagata ke sosolo le igoa o lona taina i Iselaele, ti e leaise loto a ia ke avaga a ia mo au o mulimuli ki le lao o le taina. 8E kakau loa e le kau fakamatuatua o le kolo ke nake le tagata lena kia latou, ti e lotou masau loa kiate ia : Kapau e tuu mau aifai le tagata, o pati : e leaise kau fia avaga mo ia, 9ti e fakafeofi ake loa lona fafine kiate ia i mua o le kau fakamatuatua, o tatala loa se fa taka o le tagata lena i lona vae, ti e anusi loa e ia a mata o le tagata lena. Ti e fakasa loa e ia o feneeki : ko le fai leinei ki le tagata leia e leaise loto ke lagai ia ki aluga le fale o lona taina. 10Ti e fakaigoa loa le fale o le tagata lena i Iselaele : ko le fale o le tagata leia kua tatala lona fa taka.
11Ka fefele loa ni tagata, o kaku o vusu, ti kapau e fakafeofi ake loa se fafine ke saofaki ia lona avaga mei lima o leia e taai ia a ia, ti kapau e falo loa e le fafine ona lima o too le tagata i ona koga tapu, 12e ke tuuti loa lona lima, ti ke aua na alofa loa lou mata ki le fafine.
Se fua totonu
13Ke aua na ke maua loa i lau taga ni kilo kesekese e lua, se tasi leia e mamafa mo se tasi leia e maamaa. 14Ke aua na ke maua loa i lou fale ni efa kesekese e lua, se tasi leia e lasi mo se tasi leia e ikiiki. 15E ke maua loa se kilo leia e totonu mo se efa leia e totonu, o tupu ke tologa ou aso i le fenua leia e soli atu loa kiate koe e le Eteleno, lou Atua. 16Talie e fakalialia le Eteleno, lou Atua, ki leia e fai ia loa a nea ana, ti mo leia e fai ia loa le agaveli.
Fakamaau o Amaleke
17Ke ke manatui le nea leia na fai kiate koe e Amaleke i le ala, i le oki o lou mavae mei Esipito ; 18Na leaise maua fua e ia se i ki le Atua, koia na lamalama ai loa e ia a koe i le ala, o osoi a koe mei muli, kia latou fuli ala na saele tuvai i muli, i le temi leia na ke kaekae ai ti na ke gaegae ai. 19Koia ka saofaki ai loa a koe e le Eteleno, lou Atua, mei ou fili fuli ala e takatakai ia a koe, ti ka tuku atu loa e ia kiate koe le malolo i le fenua leia e soli atu loa kiate koe e le Eteleno, lou Atua, ke ke maua tofiga, ke ke soloi oki loa le igoa o Amaleke i lalo o le lagi : Ke aua na galo iate koe le nea lena !
Currently Selected:
Tetelonome 25: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
