Tetelonome 24
24
Lao o le mavete avaga
1Kapau na too loa e se tagata se fafine o avaga mo ia, ti soko loa kua puli le alofa o le tagata ki le fafine, talie na maua loa e le tagata i lona avaga se nea fakalumaluma : E fai loa e le tagata se tosi mavete o tuku ki lima o le fafine, ti e kakau loa e ia le fafine ke mavae i lona kaiga. 2E mavae loa a ia i le kaiga o le tagata, o ano loa, ti e feala loa ke toe liliu a ia ko le avaga a se tasi ake tagata. 3Kapau e vesia loa le tagata fakamuli leinei kiate ia, ti e toe fai loa e ia se tosi mavete, o tuku loa ki lima o le fafine ti kakau loa e ia le fafine ke mavae i lona kaiga, pe mate loa le tagata fakamuli leinei na toe avaga mo le fafine, 4e leaise feala loa ke toe too e le tagata uluaki, leia na kakau ia le fafine i mua, le fafine ke toe avaga mo ia, talie kua kelekele le fafine lena kiate ia : E fakalialia le nea lena ki mata o le Eteleno, ti ke aua na ke fakakelekele ia loa ki se agasala le fenua leia e soli atu loa kiate koe e le Eteleno, lou Atua.
Fakatotonu kesekese
5Ka avaga foou loa se tagata, e leaise ano loa a ia o solia, ti e leaise tuku loa kiate ia se kavega ; e lauatea loa a ia ki le famili i le fetuu katoa, ti e fakafiafia loa e ia le fafine leia na avaga loa mo ia.
6Ke aua na too loa ke fakamaoki ai le totogi a fatu e lua o le nea fakamaluu fulumeto, pe ko le fatu leia i aluga ; talie ko le too loa a ia o le mauli totonu ke fakamaoki ai le totogi.
7Kapau e maua loa se tagata leia na kaia ia se tasi i ona fetaina, se tasi o fanau totonu a Iselaele, leia na fakaliliu e ia lona taina ko se tagata popula pe na fakatau ia a ia, e tautea loa le tagata lena ki le mate. E ke too loa i ai le veli i loto malie o Iselaele.
8Ke ke tokaga ai ki le masaki ko le kilia, o tausi mo fai a nea fuli ala e ako atu loa kia koutou e le kau Levi faisakilifisio : ke kotou tausi loa ti mo kotou fai loa a fakatotonu fuli ala na kau tuku kia latou.
9Ke ke manatui le nea leia na fai e le Eteleno, lou Atua, kia Miliamu i le lolotoga o le fanoga, i le oki o le mavae mei Esipito.
10Kapau e ke soli ki lou oloi se maua, ke aua na ke ulu loa ki lona fale o too fakamakeke se nea ke fakamaoki ai le totogi o le maua. 11Ke ke nofo i fafo, ti ko leia e ke soli ki ai le maua e aumai ia loa kiate koe le fakamaoki o le totogi o le maua ki fafo. 12Kapau e mativa le tagata lena, ti e soli atu loa e ia kiate koe lona taupulupulu ke fakamaoki ai le ui o lona maua, ke aua na ke moe loa mo le nea lena ; 13ke ke fakaliliu a ia kiate ia i le vilo o le laa, o tupu ke moe a ia i lona taupulupulu ti ke tapuaki a ia kiate koe : e liliu loa le nea lena kiate koe ko se gaoi malie i mua o le Eteleno, lou Atua.
14Ke aua na ke pule fakaveliveli ki lau tagata gaoi, o tupu ko lona mativa mo lona fakaaloalofa, tatau pe ko lou taina pe ko se matapule leia e nofo mo koe i lou fenua. 15Kae e ke soli loa kiate ia le totogi o lona aso gaoi i mua o le vilo o le laa ; talie e mativa a ia ti e aoga ai lona totogi kiate ia. Kapau e leaise ke fai loa le nea lena, e tagi loa a ia ki le Eteleno, ti e ke maua loa i ai se agasala.
16E leaise tamate loa a tamana ke fetogi ai a fanau, pe ko fanau ke fetogi ai a tamana : E tamate loa le tagata taki toka tasi ki lana agasala.
17Ke aua na ke fakasalai ia loa se fakamaau ke veli ki le matapule mo le fanau leia kua mate lona tamana, ti ke aua na ke too ia loa a kofu o se fafine leia kua mate lona avaga ke fakamaoki ai le totogi o se maua. 18Ke ke manatui loa na ke nofo popula i Esipito, ti na saofaki a koe e le Eteleno, lou Atua ; koia e kau tuku atu ai kiate koe a fakatotonu ana ke ke fai.
Pelepeseto o le manava alofa
19Ka ke fai loa le tanaki o le fulumeto o lou faisaga, ti ka galo loa iate koe se fuiga fulumeto i le faisaga, ke aua na ke toe liliu loa ki muli o too a ia : E ke tuku loa a ia ki le matapule, mo le fanau leia e sala tamana, mo le fafine leia e sala avaga, o tupu ke tapuaki kiate koe le Eteleno, lou Atua, i gaoi fuli o ou lima. 20Ka ke tau loa ou olive, ke aua na ke toe tau loa le nea leia e toe : E ke tuku loa a ia ki le matapule, mo le fanau leia e sala tamana, ti mo le fafine leia e sala avaga. 21Ka ke tau loa a fua o lou vite, ke aua na ke toe tanaki loa le nea leia e toe : E ke tuku loa a ia ki le matapule, mo le fanau leia e sala tamana, mo le fafine leia e sala avaga. 22Ke ke manatui loa na ke nofo popula i le fenua o Esipito : Koia e kau tuku atu ai kiate koe a fakatotonu ana ke ke fai.
Currently Selected:
Tetelonome 24: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
