Tetelonome 11
11
Fakapapau mo malaia
1Ke ke alofa ki le Eteleno, lou Atua, ke ke tausi tuumau ana lao, mo ana lekula, mo ana folafola. 2Ke kotou fakamaoki i le aso nei, talie e leaise kau masau nei ki okoutou vosa ala na leaise iloa ia ti na leaise tio ki nea fuli ala na fai e le Eteleno kia koutou, kae ko koutou totonu ala na iloa ia ti na tio mata ki le mafimafi o le Eteleno, lokoutou Atua, mo lona lasi, mo lona lima makeke, mo lona lima falo. 3Na fakasa e ia kia koutou ana milakulo mo ana gaoi : Na kotou tio ki le nea leia na fai e ia i loto malie o Esipito, kia Falaone, sau o Esipito, mo lona fenua katoa. 4Na kotou tio ki le nea leia na fai e ia ki le solia o Esipito, ki ona osi mo ona saliote, ala na tanu e ia ki le vai o le tai Kula, i le temi leia na lotou tuli ai koutou. Na maumaui latou e le Eteleno o talu oki. 5Na kotou tio ki le nea leia na fai e ia kia koutou i le toafa ke kotou kaku mai ai ki le ganea leinei. 6Na kotou tio ki le nea leia na fai e ia kia Tatane mo Apilame, vosa o Eliape, vosa o Lupeni : Na fakamavaa e ia le gutu o le kele leia na folo ia loa laua, mo ola famili, mo ola falela, mo latou fuli ala na kau kia laua. 7Io, na tio okoutou mata ki gaoi lalasi fuli ala na fai e le Eteleno. 8Koia, ke kotou fai loa a folafola fuli ala e kau tuku atu kia koutou i le aso nei, o tupu ke kotou maua le makeke leia e aoga ki le too o le fenua leia e kotou ulu loa ki ai, 9ti ke kotou mauli fualoa loa i le fenua lena na fakapapau e le Eteleno ke soli ki okoutou tamana mo lolatou sakoga, fenua leia e sali ai le sua manu mo le meli. 10Talie ko le fenua leia ka ke ulu loa ki ai o maua tofiga, e leaise tatau mo le fenua o Esipito, leia na ke mavae mei ai. I Esipito, ka oki le to o pulapula, ti e tonu ke fakasasali se vai ki faisaga ofaipe se fakavai o se oloto. 11Kae ko le fenua leia ka ke ulu loa o maua tofiga, ko se fenua o mauga mo vaivailiua, ti e inu e ia le vai o ua o le lagi ; 12ko se fenua leia e tokaga ki ai le Eteleno, lou Atua, ti e tuku tuumau ki ai a mata o le Eteleno, lou Atua, mei le kamataaga o le fetuu o kaku ki le oki o le fetuu.
13Kapau e kotou fakalogo ki aku folafola ala e kau tuku kia koutou i le aso nei, kapau e kotou alofa ti mo kotou tausi le Eteleno, lokoutou Atua, i lokoutou loto katoa mo lokoutou laumalie katoa, 14ti e kau tuku loa ki lokoutou fenua le ua i lona temi, i le temi mafana mo le temi mokomoko, o tupu ke kotou maua ni fuata malilie o le fulumeto, mo le vino foou, mo le lolo. 15E kau fakasomo ia loa se vao i lou faisaga ki lau kau manu. E ke kai loa ti e ke makona loa. 16Koia, ke kotou tokaga ai, na kakaai loa okoutou loto, o kotou maliu loa o tausi ki ni atua kese ti mo punou loa kia latou.
17E tupu loa i ai le sausau o le Eteleno kia koutou ; e tapono loa e ia le lagi, ti e leaise toe to loa se ua ; e leaise toe soli loa e le kele ona fua, ti e kotou mamate vave loa i le fenua malie leia e soli atu loa kia koutou e le Eteleno.
18Ke kotou tuku ki okoutou loto mo okoutou laumalie a folafola anei e kau fakasa atu kia koutou. Ke kotou sai loa latou ofaipe se fakamailoga i okoutou lima, ti e lotou fai loa pe ni tekiteki i lou lae. 19Ke kotou ako loa latou ki akoutou fanau, ti ke kotou masaui loa latou mo ka ke nofo loa i lou fale, mo ka ke moe loa ti mo ka ke ala ake loa i lau moe. 20Ke ke tosi loa latou i pou o lou fale mo ou matapa. 21Ti e lasi loa okoutou aso mo aso o okoutou fanau, ofaipe le lasi loa o aso o le lagi i aluga o le kele, i le fenua leia na fakapapau e le Eteleno ki okoutou tamana ke soli kia latou. 22Talie kapau e kotou tausi loa a folafola fuli anei e kau tuku atu kia koutou, ti kapau e kotou alofa loa ki le Eteleno, lokoutou Atua, ti kapau e kotou saele loa i ona ala fuli, ti kapau e kotou pipiki loa kiate ia toka tasi, 23ti e kapu loa e le Eteleno i okoutou mua a puleaga fuli ana, ti e kotou pule loa ki ni puleaga ala e lalasi ake mo makeke ake ia koutou. 24E kotou maua loa ganea fuli ala e takafi loa e le taga vae o lokoutou vae : e kamata atu loa lokoutou koiga i le toafa o kaku ki Lipane, ti mo le vaitafe ko le Eufalate o kaku ki le tai uesite.
25E leaise toe tuu loa se toka tasi i ou mua. Ko le Eteleno, lokoutou Atua, e fakamafola ia loa, o mulimuli ki lana pati, le i mo le fakaapaapa kiate koe i le fenua katoa leia e kotou saele loa i ai.
26Ke ke tio, e kau tuku i le aso nei ki ou mua le tapuakina mo le malaia : 27le tapuakina, mo kapau e kotou fakalogo malie loa ki folafola a le Eteleno, lokoutou Atua, ala e kau soli kia koutou i le aso nei ; 28le malaia, mo kapau e leaise kotou fakalogo loa ki folafola a le Eteleno, lokoutou Atua, ti mo kapau e kotou tiaki loa le ala e kau fakatotonu atu i le aso nei, kae kotou pipiki loa ki ni iki ake atua kese e leaise kotou iloa. 29I le aso leia e fakaulu ai loa a koe e le Eteleno, lou Atua, ki le fenua leia ka ke ulu loa ki ai o maua tofiga, ke ke tuku loa le tapuaki ki le mauga ko Kalisimi, mo le malaia ki le mauga ko Epale. 30Ko mauga ana e tuu i leia atu kauvai o le Solotane, i leia atu fetuu o le ala uesite, i le fenua o le kau Kanaane ala e nonofo i le vaivailiua o le Solotane, i mua o Kilikale, o ofi ki le sene o Mole. 31Talie kua vave fua lakotou fakalaka i le Solotane, o ano o too le fenua leia e soli kia koutou e le Eteleno, lokoutou Atua. Ke kotou too a ia ti ke kotou maua tofiga a ia. 32Ke kotou tausi ti ke kotou fai a lao mo folafola fuli ala e kau soli kia koutou i le aso nei.
Currently Selected:
Tetelonome 11: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
