Tetelonome 10
10
Ko fatu foou o le lao
1I le temi a ia, na pati mai loa le Eteleno kiate au : Ke ke ta ni laui fatu e lua o tatau mo fatu uluaki, ti ke pale mai loa kiate au i aluga o le mauga ; ti ke toe fai loa mo se pusa papa, le aleka. 2E kau tosi loa i laui fatu ana a folafola ala na tosi i laui fatu uluaki ala na ke maumaui, ti ke fafao loa laua ki le aleka. 3Na kau fai loa se aleka papa ki le akasia, ti na kau ta foki ni laui fatu e lua o tatau mo laui fatu uluaki, ti na kau pale loa ki le mauga mo fatu e lua ala na too i loku lima. 4Na tosi loa e le Eteleno ki laui fatu le nea leia na tosi i laui fatu uluaki, a folafola e kau agafulu ala na fakasa e ia kia koutou i le mauga, mei loto malie o le afi, i le aso o le fakatasi. Ti na soli mai loa laua e le Eteleno kiate au. 5Na kau toe maliu loa o ifo mei le mauga, ti na kau fafao loa a fatu ki le aleka leia na kau aga o fau. Na la tuku loa i ai, o mulimuli ki le nea leia na fakatotonu mai kiate au e le Eteleno.
6Na mavae loa fanau a Iselaele i Peeloti-Pene-Saakani ki Mosela. Ko le ganea lena na mate ai loa Alone, ti na tanu ai loa a ia. Na fetogi loa a ia e lona vosa ko Eleasale i le gaoi fakapelepitelo. 7Na lotou mavae loa i lena ki Kutikota ; mei Kutikota ki Sotipata, fenua leia e lasi ona liua. 8I le temi lena, na vaei kese loa e le Eteleno le faasiga o levi, ti na fakatotonu loa e ia kiate ia ke amo le aleka o le sai a le Eteleno, ke tuu i mua o le Eteleno o tausi a ia, ti mo tapuaki ki le kakai i lona suafa : leia na fai loa e ia o kaku mai ki le aso nei. 9Koia leia e leaise maua loa e Levi sona vaega pe ko sona tofiga mo ona fetaina : ko lona tofiga ko le Eteleno, o mulimuli ki le pati a le Eteleno, lona Atua kiate ia.
10Na kau nofo i le mauga ofaipe mua, i aso e kau fa mo po e kau fa. I le faiaga foki lena, na logo le Eteleno ki laku kole ti na fakafiti loa a ia ke maumaui koutou. 11Na pati mai loa le Eteleno kiate au : Ke ke tuu ki aluga o saele i mua o le kakai. Ke lotou ulu o too le fenua leia na kau fakapapau ki olatou tamana ke soli kia latou.
Lao o le alofa mo le fakalogo
12I le aso nei, Iselaele, kolea le nea leia e kole atu kiate koe e le Eteleno, lou Atua ? Ke ke i ki le Eteleno, lou Atua, o saele i ona ala fuli, o alofa mo tausi ki le Eteleno, lou Atua, i lou loto katoa mo lou laumalie katoa. 13Ke ke tausi a folafola a le Eteleno mo ana lao ala e kau tuku kiate koe i le aso nei, o tupu ke ke manuia. 14Ko leinei e pule le Eteleno, lou Atua, ki le lagi, mo atu lagi, mo le kele mo nea fuli ala e maua i ai. 15Kae, i le temi mua, na gato tasi ki ou tamana ala na pipiki ki ai le Eteleno, talie na alofa a ia kia latou. I le temi nei, ko koutou, ala ko lolatou sakoga, na filifili e ia i puleaga fuli, ofaipe lakoutou tio ki ai i le aso nei. 16Koia, ke kotou silikosisio ai okoutou loto, ti ke aua na kotou toe fakafefeka okoutou ua. 17Talie ko le Eteleno, lokoutou Atua, ko le Atua o atu lagi, ko le Aliki o aliki fuli, ko le Atua lasi, mo makeke mo fakaii, leia e leaise tiotio tagata ti e leaise totogi ki se moliga. 18E fakamaaui e ia i le faitotonu le fanau sala matua mo le fafine sala avaga. E alofa a ia ki le matapule leia e nofo i lou fenua, o soli kiate ia le nea kai mo le nea lava. 19Koia, ke kotou toe alofa loa ki le matapule, talie na kotou matapule i le fenua o Esipito. 20Ke ke i ki le Eteleno, lou Atua. Ke ke su kiate ia. Ke ke pipiki kiate ia toka tasi, ti mo ke fakapapau i lona suafa toka tasi. 21Ke ke tuku le fakavikiviki ki le Eteleno, talie ko ia ko lou Atua : Ko ia leia na fai ia a gaoi lalasi mo fakaii fuli ana i loto malie o ou, ala na tio ki ai ou mata. 22Na ifo ou tamana ki Esipito ko le tino fitu lolatou api. I le aso nei kua fakaliliu a koe e le Eteleno, lou Atua, o tatau mo fetuu o le lagi.
Currently Selected:
Tetelonome 10: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
