Taniela 5
5
Le kai lasi a Pelesatesale ;
too o Papilone
1Na fai loa e le sau ko Pelesatesale se kai lasi ki lana kau lalasi, ko le tino afe, ti na inu loa e ia se vino i olatou mua. 2Ko Pelesatesale, i lana asiasi le vino, na fakatotonu loa ke aumai a ipu aulo mo ipu siliva ala na too e lona tamana ko Nepukatenesale mei le fale tapu o Selusalemi, ke inu ki ai le sau mo lana kau lalasi, mo ana avaga, ti mo ana feauaki. 3Ti na aumai loa a ipu aulo ala na too mei le fale tapu o le Atua i Selusalemi ; ti na inu loa le sau, mo lana kau lalasi, mo ana avaga, mo ana feauaki i ipu. 4Na lotou inu loa se vino, ti na lotou fakavikiviki loa ki atua aulo, mo atua siliva, mo atua sila, mo atua ukamea, mo atua laakau, ti mo atua fatu.
5I le temi fai lena, na sa loa ni maikao o se limai tagata, ti na tositosi loa e maikao ki le paa lase o le fale sau, i mua o le fa malama. Ti na tio loa le sau ki le potu o le lima lena na tositosi. 6Ti na tea katoa loa le sau i lona i, ti na sevaia loa lona loto i ana fakakaukau, ti na leaise koi maua loa sona makeke ti na fetati loa ona tuli. 7Ti na kalaga loa le sau, o leo lasi, ke aumai latou ala e sivi ia a temi, mo le kau Kaletea, ti mo kau faikikite ; ti na pati loa le sau ki le kau poto o Papilone : Ko leia e lau ia loa le faitosi leinei ti mo fakamatala ia mai loa lona mauiga kiate au e fakakofu loa a ia ki le kofu kula, ti e fakatau loa se kasoa aulo ki lona ua, ti e maua loa e ia le tolu tuulaga o le puleaga. 8Na ulu ake loa ki fale le kau poto fuli a le sau ; kae na leaise mafai ke lotou lau le fai tosi ti mo fakamatala lona uiga ki le sau. 9Koia na i lasi ai loa le sau ko Pelesatesale, ti na asilisili fakalaulautetea loa a ia ; ti na mata mamae fuli loa lana kau lalasi.
10Ko le avaga o le sau, o tupu ko masau a le sau mo lana kau lalasi, na ulu mai loa ki le kogafale o le kaitasi, o masau feneeki : ei sau, ke ke mauli o lee gato ! Ke aua na ke mamae o tupu ko au manatu, ti ke aua na ke i ! 11E maua se tagata i lou puleaga leia e nofo ai le laumalie o atua maokioki ; i le temi o lou tamana, na maua i le tagata lena le tio malama, mo se atamai, ti mo se poto, leia e tatau mo le poto o atua. Ti ko le sau ko Nepukatenesale, lou tamana, ei sau, na fakanofo ia a ia ko le pule o le kau fai nea fakatalatupua, mo le kau sivi fetuu, mo le kau Kaletea, ti mo le kau faikikite, 12Talie na maua iate ia, ia Taniela, leia na fakaigoa e le sau ko Pelesatesale, se laumalie taualuga, mo se atamai, mo se poto, mo se malama ki le kikite o moe miti, mo le fakamatala o misitelio ti mo le fakatonutonu o nea faigataa. Koia, kalagai nei Taniela, ti e soli mai loa e ia lona uiga.
13Na fakaulu mai loa Taniela ki mua o le sau. Ti na masau loa le sau, o pati kia Taniela : Pe ko Taniela a koe, se tasi o le kau popula leia na aumai e le sau, loku tamana, mei Sutea ? 14Kua kau logo o uiga mo koe, e ke maua le laumalie o atua, ti e maua iate koe le tio malama, mo se atamai, ti mo se poto kese. 15Ko le oki leinei o le aumai ki oku mua o le kau poto ti mo le kau sivi temi, o tupu ke lotou lau ia le faitosi leinei ti ke lotou fakamatala mai kiate au lona uiga ; kae na leaise mafai ke lotou tuku mai le uiga o kupu. 16Na kau logo e mafai ke ke fakamatala le uiga o masau fakapulipuli ti mo le vevete o nea faigataa. I le lakaga nei, kapau e ke mafai ke ke lau le faitosi leinei ti mo ke fakamatala mai kiate au lona uiga, e fakakofu loa a koe ki le kofu kula, ti e fakatau loa se kasoa aulo ki lou ua, ti e ke maua loa le tuulaga tolu o le puleaga.
17Na tali loa Taniela i mua o le sau : Taupau ou nea alofa, soli ki se tasi ake au moliga ; kae e kau lau loa le faitosi ki le sau, ti e kau fakamatala loa kiate ia lona uiga. 18Ei sau, na soli e le Atua Taualuga ki lou tamana ko Nepukatenesale, le puleaga, mo le mauiga, mo le kololia, ti mo le logologona ; 19O tupu ko le mauiga leia na tuku e le Atua Taualuga kiate ia, na i fuli a kakai, mo puleaga, mo tagata mei faasiga masau kesekese i ona mua. Na fakatotonu e le sau ke tamate latou ala e loto a ia ki ai, ti na tuku e ia le mauli kia latou ala na loto a ia ki ai ; na siki e ia ki aluga latou ala na loto a ia ki ai ; ti na tuku e ia ki lalo latou ala na loto a ia ki ai. 20Kae i le aso leia na fia nealasi ai a ia ti na fakafefeka ai e ia lona loto, na ti loa a ia ki lalo mei lona ekeekeaga fakasau, ti na too loa meiate ia lona kololia ; 21Na kapu loa a ia mei loto malie o fanau o tagata, ti na liliu loa lona loto o tatau mo le loto o manu, ti na tuu fakatasi loa lona nofoaga mo leia o asino vao ; na soli loa kiate ia se mutie ke kai ofaipe pipi, ti na susu loa lona tino i le sasau o le lagi, o kaku ki lana iloa ko le Atua Taualuga leia e pule ki le pule a tagata, ti e soli e ia a ia ki leia e loto a ia ki ai. 22Ti ko koe, Pelesatesale, lona vosa totonu, na leaise ke fakataulalo, logo ai na ke iloa a nea fuli ana. 23Na ke malaga ki aluga o agatuu ki le Aliki o le atu lagi ; ti na ke aumai a ipu o lona fale ki ou mua, ti na kotou inu ki ai le vino, e koe mo lau kau lalasi, mo au avaga, mo au feauaki ; na ke fakavikiviki ki atua siliva, mo aulo, mo kapa, mo ukamea, mo laakau, mo fatu, ala e leaise logo fua, e leaise tio fua, ti e leaise iloa fua se nea, kae na leaise ke fakakololiai le Atua leia e too ia i lona lima lau tukumanava ti mo ou ala fuli. 24Koia kua kakau mai e ia le potupotu o le lima lena, leia na tosi ia le nea lena. 25Ko leinei le nea leia kua tosi : Lau, lau, fua, ti vae. 26Ti ko leinei le uiga o kupu ana : Lau : kua lau e le Atua lou puleaga, ti kua fakagato e ia a ia. 27Fua : kua fua a koe i le fua, ti kua maua a koe e ke maamaa. 28Vae : kua vae lou puleaga, ti kua soli a ia ki le kau Meti mo le kau Pelesi.
29I le nea fai lena na fakatotonu loa e Pelesatesale ke fakatui kia Taniela le kofu kula, ke fakatau ki lona ua le kasoa aulo, ti na fakasa loa i le fenua e maua e Taniela le tuulaga tolu i le puleaga.
30I le po fai lena, na tamate loa Pelesatesale, sau o le kau Kaletea. 31Ti na too loa e Taliusi, tagata Mete, le puleaga, i lona fetuu kau ono tupu lua.
Currently Selected:
Taniela 5: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
