Taniela 4
4
Le laakau lasi, moe a Nepukatenesale
na fakamatala e Taniela
1Ko le sau ko Nepukatenesale, ki kakai fuli, mo puleaga, mo tagata o masau kesekese fuli, e nonofo i le malama nei katoa. Ke soli atu kia koutou le tokamalie o lasi !
2Na kau manatu ko se nea malie ke fakasa a fakamailoga mo nea fakamanamana ala na fai e le Atua taualuga kiate au. 3E lalasi ai ana fakamailoga ! E makeke ai ana nea fakamanamana ! Ko lana fakatotonu ko se fakatotonu lee gato, ti e tuu lana pule i tautupu mo tautupu.
4Ko au, Nepukatenesale, na kau mauli fimalie i loku fale, mo fiafia i loku fale sau. 5Na kau fai loa se moe miti leia na tupu ai loku i lasi ; ko manatu ala na kau maua i loku moeaga ti mo nea ala na tio ki ai loku laumalie na fakaii ai. 6Na kau fakatotonu loa ke aumai ki oku mua le kau poto fuli o Papilone, ke fakamatala mai kiate au le uiga o le moe miti. 7Ti na au loa le kau fai nea fakatalatupua, mo le kau sivi fetuu, mo le kau Kaletea, ti mo le kau kikite. Na kau fakamatala loa kia latou le moe miti, kae na leaise lotou fakasa mai kiate au lona uiga. 8Na kaku fakamuli loa o aumai ki oku mua a Taniela, leia e igoa ko Pelesatesale, o mulimuli ki le igoa o loku atua, ti na maua iate ia le laumalie o atua maokioki. Na kau fakamatala loa kiate ia le moe miti : 9Pelesatesale, pule o le kau fai nea fakatalatupua, e kau iloa e ke nofo mo le laumalie o atua maokioki, ti e leaise faigataa se nea fakapulipuli kiate koe, fakamatala mai kiate au le uiga o nea ala na kau tio ki ai i laku moe miti. 10Ko nei a nea ala na tio ki ai loku laumalie lolotoga o laku moe i loku moeaga. Na kau tio, ti ko leinei, na tuu i loto malie o le kele se laakau na taualuga lasi ai. 11Na liliu loa le laakau lena o lasi mo makeke, ti na malaga loa lona tumutumu o kaku ki le lagi, ti na tio loa kiate ia mei potupotu o le malama nei katoa. 12Na fulumalie ona lau, ti na lasi ona fua ; na maua e ia se nea kai ki tagata fuli ; ti na fakamalumalu a manu o le vao i ona lalo, ti na faiofaga a manu lele o le lagi i ona laa, ti na maua e nea fuli ala e mauuli lalatou nea kai meiate ia. 13I tio ala na sa ki loku laumalie i le lolotoga o laku moe, na kau tio, ti ko leinei, ko se tasi ia latou ala e leoleo ti mo maokioki na ifo loa mei le lagi. 14Na kalaga leo lasi loa a ia ti na masau mai loa a ia kiate au, o pati : Kotou sele ki lalo le laakau, ti kotou tutuuti ona laa ; kotou lu ona lau, ti kotou veteki ona fua ; ke sosola a manu mei ona lalo, ti mo manu lele mei ona laa ! 15Kae kotou tuku i le kele le tafito leia e tuu ai a aka, ti ke kotou saisai a ia ki ni tini ukamea mo ni tini sila, i loto malie o le ulu vao o faisaga ; ke fakasusu a ia e le sasau o le lagi, ti ke kai e ia le mutie o le kele ofaipe manu. 16E too loa meiate ia lona mafu fakatagata, ti e soli loa kiate ia se mafu o le manu ; ti e fakalaka loa ni fetuu e fitu iate ia. 17Ko le fakatotonu lena a latou ala e leo ti e maokioki, ti ko le fakatuutuu a ia a le kau sagato, o tupu ke iloa e latou ala e mauuli e pule le Atua Taualuga ki le pule o tagata, ti e soli e ia le pule ki leia e loto a ia ki ai, ti e siki e ia ki aluga le leia e taulalo oki i tagata fuli. 18Ko lena le moe miti leia na kau fai, e au, sau ko Nepukatenesale. Ti ko koe, Pelesatesale, fakasa mai kiate au lona uiga, talie na leaise mafai e le kau poto fuli o loku puleaga ke lotou tuku mai a ia. Ko koe, e ke mafai a ia, talie e iate koe le laumalie o atua maokioki.
19Ti ko Taniela, leia e igoa ko Pelesatesale, na tuu noa mua i se ga temi, talie na sevaia lana fakakaukau. Ti na toe masau loa le sau, o pati : Pelesatesale, ke aua na ke i, o tupu ko le moe miti mo lona fakamatala ! Ti na tali loa Pelesatesale : Ei loku aliki, ke vilo le moe miti mo lona uiga ki ou fili ! 20Ko le laakau leia na ke tio ki ai, leia na liliu o lasi mo makeke, ti na malaga lona tumutumu o kaku ki le lagi, ti na tio kiate ia mei potupotu o le malama nei katoa ; 21ko le laakau lena, leia na lau fulumalie ti na fua lasi, leia na maua ia se nea kai ki tagata fuli, leia na fakamalumalu ai a manu o le vao i ona lalo ti na faiofaga ai a manu lele o le lagi i ona laa, 22ko koe totonu a ia, ei sau, leia kua liliu o lasi mo makeke, ti kua kaku lou logologona lasi ki le lagi, ti kua kaku lau pule ki potupotu o le malama nei. 23Kua tio le sau ki se tasi o latou ala e leoleo mo maokioki e ifo mei lagi, o pati : Kotou sele le laakau, ti kotou maumaui a ia ; kae kotou tuku i le kele le tafito leia e tuu ai a aka, ti kotou saisai a ia ki ni tini ukamea mo ni tini sila i le ulu vao o faisaga ; ke fakasusu a ia e le sasau o le lagi, ti ke kai e ia le mutie ofaipe manu o faisaga, o kaku ki le oki o fetuu e fitu. 24Ko leinei lona uiga, ei sau, ko leinei le fakatuutuu a le Atua Taualuga, leia e fakasoko loa ki loku aliki, le sau. 25E kapu loa a koe mei loto malie o tagata, ti e ke maua loa lou nofoaga i loto malie o manu o faisaga, ti e tuku loa kiate koe se mutie ke kai, ofaipe pipi ; e susu loa a koe i le sasau o le lagi, ti e fakalaka loa a fetuu e fitu iate koe, o kaku ki lau iloa ko le Atua Taualuga leia e pule ki le pule a tagata, ti e soli e ia a ia ki leia e loto a ia ki ai. 26Ko le fakatotonu leia ke tuku le tafito leia e tuu ai a aka o le laakau : ko lona uiga e toe tuku loa lou puleaga kiate koe i le aso leia e ke iloa ai loa ko leia e pule e nofo i le atu lagi.
27Koia, ei sau, fakalotomalie o tali laku tokoi leinei ! Fakagato au agasala, ti ke fai le nea leia e totonu, ti ke fakagato au agaveli, kae ke ke manava alofa ki le kau mativa, ti e feala loa ke tologa lou manuia.
28Na soko loa a nea fuli ana ki le sau ko Nepukatenesale. 29I le sili o masina e kau agafulu tupu lua, na evaeva loa le sau i lona fale sau i Papilone, 30ti na masau loa le sau, o pati : Pe leaise ko Papilone leinei, le kolo lasi leia na kau laga ko se nofoaga fakasau, ke fakasa ai le lasi o loku makeke, mo le kololia o laku pule. 31Kae e leikiaise oki le masau mei le gutu o le sau, kae ko leinei, na au loa se leo mei le lagi : Ke ke iloa, sau ko Nepukatenesale, e too loa lou puleaga meiate koe. 32E kapu loa a koe mei loto malie o tagata, ti e ke maua loa lou nofoaga o fakatasi mo manu o faisaga, ti e soli loa kiate koe le mutie ke ke kai ofaipe pipi ; ti e fakalaka loa a fetuu e fitu iate koe, o kaku ki lau iloa ko le Atua Taualuga leia e pule ki le pule a tagata, ti e soli e ia a ia ki leia e loto a ia ki ai. 33I le temi fai lena na fakasoko loa le folafola kia Nepukatenesale. Na kapu loa a ia mei loto malie o tagata, ti na kai loa e ia le mutie ofaipe pipi, ti na susu loa lona tino i le sasau o le lagi, o kaku ki le loloa o lona lau ulu ofaipe ni fului akuila, ti mo ona matininia ofaipe matininia o manu lele. 34I le oki o le temi leia na fakatuutuu ki ai, ko au, Nepukatenesale, na tio loa oku mata ki le lagi, ti na toe au loa loku atamai kiate au. Na kau fakafetai loa ki le Atua Taualuga. Na kau fakavikiviki mo fakakololia ki leia e mauli o lee gato, leia ko lana pule ko se pule lee gato, ti ko lona puleaga e tuu i tautupu mo tautupu. 35Ti e fai a kakai fuli o le malama nei ki ona mata pe ni nea noa : e fai e ia o mulimuli ki lona finegalo ki le kau tau o le lagi ti mo le kakai o le malama nei, ti e leaise fakatutuu se tasi ki lona lima, o pati kiate ia : Kolea e ke fai ? 36I le temi lena, na toe au loa le atamai kiate au ; ti na toe soli mai loa kiate au le kololia o loku puleaga, mo loku mamalu, mo loku logologona. Na toe afa loa au e laku kau fono mo laku kau lalasi ; ti na toe fakanofo loa au ki loku puleaga, ti na asilisili lasi loa loku makeke. 37I le temi nei, ko au Nepukatenesale, e kau fakavikiviki, e kau atolasio, ti e kau fakakololiai le sau o le atu lagi, leia e maoki ana gaoi fuli ti e totonu ona ala, ti e mafai ke tuku ia ki lalo latou ala e saele i le fia nealasi.
Currently Selected:
Taniela 4: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
