Gaoi 28
28
Paulo i Malete, mo lona uuti e le gata
1Ti kua motou sao i le tutamaki, na motou iloa loa ko le igoa o le motu ko Malete.
2Na lasi ai le agamalie o le kakai seka lena kia matou ; talie na lotou tafu loa se afi ke fakatalitali ai matou, o tupu na ua ti na momoko. 3I le tae e Paulo o ni vao malo ke ti ki le afi, na ulu loa mei ai se gata velo i le vevela o le afi, o piki ki lona lima. 4I le tio a le kakai o le fenua ki le piki o le gata i lona lima, na lotou fepatiaki loa : E maoki ai ko le tagata leinei ko se tagata tukipo, talie na leaise loto le Faitotonu ke mauli a ia, i le oki o lona sao mei le tai. 5Kae na tuui loa e Paulo le manu ki le afi, ti na leaise logoi fua e ia se mamae. 6Na talitali loa le kakai lena ke fufula a ia pe mate fakaofolele a ia, kae i le fualoa o lalatou talitali, ti mo lalatou tio na leaise soko fua kiate ia se nea, na lotou fetogi manatu loa, o pati ko se atua a ia.
Fakamauli o le tamana o Pupiliusi
7Na maua i ai, i tafatafa o le ganea lena, ni kele ala na fakalogo ki le pule lasi o le motu, leia na igoa ko Pupiliusi ; leia na fakatalitali malie ia matou mo fakanonofo matou i aso e tolu i lona fale. 8Na moemoe le tamana o Pupiliusi talie na masaki a ia, ti na lasi ai lona fiva mo lona mamae manava. Na ulu loa Paulo ki lona fale o faikole mo teki ona lima kiate ia, o malie ai loa lona masaki. 9I le logo ki le nea lena, na au loa mo la ake foki masaki o le motu, ti na fakamauli fuli loa latou. 10Na lasi ai lalatou fai nea alofa kia matou ; ti i lamatou mavae, na lotou soli mai loa kia matou a nea fuli ala na aoga kia matou.
Kaku o Paulo ki Loma
11I le oki o lamatou nofo i ai i masina e tolu, na motou sopo loa ki se vaka mei Alekasia leia na tau i le temi momoko i le motu lena, ti na tuu ai le fakamailoga leinei, Tiosekule (ata atua). 12I lamatou kaku ki Silakuse, na motou nonofo loa i ai i ni aso e tolu. 13Mei ai, o mulimuli i le alo o le motu, na motou kaku loa ki Lesio ; ti na malaga loa le matagi o le Saute i leia ake a aso, o aso lua fai ti motou kaku loa ki Pusole, 14leia na motou maua ai loa ni fetaina, ti na lotou kole mai loa ke motou nonofo i ni aso e fitu mo latou. Ti na motou mavae loa i ai, o ano ki Loma. 15Ko fetaina o le kolo lena, i lalatou maua loa ni logo o uiga mo matou, na lotou au loa o fakafelavei mai kia matou, o kaku mai ki le Folume o Apiusi ti mo le otele ko Tolu-Talevene. Ko Paulo, i lana tio loa kia latou, na fakafetai loa ki le Atua ti na toe loto makeke ai loa.
16I lamatou kaku ki Loma, na fakataga loa kia Paulo ke nofo i sona nofoaga toka tasi, mo le tagata solia leia na leo kiate ia.
Akonaki a Paulo i Loma
17I le sili o aso e tolu, na kalagai loa e Paulo le kau lalasi o le kau Sutea ke fakatasi ake kiate ia. I lalatou fakatasi mai, na masau loa a ia kia latou, o pati : Tagata fetaina, na leaise kau fai fua se nea ki le kakai pe ki agai fenua o tatou tamana, kae na tuku au ki le pilisoni i Selusalemi, ti na tuku au mei ai ki lima o le kau Loma. 18I le oki o lalatou fakavesilii au, na lotou loto ke lotou fakalauatea au talie na leaise lotou maua fua iate au se nea leia e tonu ke kau mate ai. 19Kae na fakafesagai ki ai le kau Sutea, ti na aoga loa ke kau tagi kia Sesale, kae na leaise kau loto ai ke fakalakasala loku puleaga. 20Ko le tupuaga loa lena o laku kole ke kau felavei mo koutou ti ke kau masau kia koutou ; talie e tupu ko le amanaki malie a Iselaele leia e kau nofo ai mo tini anei.
21Ti na lotou tali loa kiate ia : Na leikiaise motou maua se tosi mei Sutea o uiga mo koe, ti na leaise au se tasi fua i fetaina, o lauveli mai kiate koe. 22Kae e motou fia logo meiate koe totonu pe kolea lau manatu, talie kua motou iloa le fakafesagai i ganea fuli ki le magai lotu lena.
23Ti na lotou fakatuutuu loa kiate ia se aso, ti na au loa se toka api o maua a ia i lona fale. Ti na fakasa loa e ia le Puleaga o le Atua kia latou, o fakamaoki, ti mo afa i le lao a Moisese mo le kau polofeta, ke lotou tio ki nea o uiga mo Sesu. Na fai loa le nea lena mei le usu o kaku ki le afiafi. 24Ti na malama loa a iki ki le nea leia na masau a ia ki ai, kae na leaise tui loa a iki. 25I lolatou mavete i le loto kesekese, na fai loa e paulo le masau leinei e tasi : E maoki ai le masau a le Laumalie Maokioki ki otatou tamana i le gutu o le polofeta ko Esaia, o pati :
Maliu o Paulo ki le kau pagani
26 Ano ki le kakai lena, o pati :
Ekotou logo loa i okoutou taliga,
kae e leaise kotou matala loa ;
Ekotou tio loa i okoutou mata,
Kae e leaise kotou malama loa.
27 Talie kua liliu o fefeka le loto o le kakai lena ;
Kua lotou fakatulituli olatou taliga, ti kua lotou tapono olatou mata,
Ke aua na lotou tio i olatou mata,
Ke aua na lotou logo i olatou taliga,
Ke aua na lotou matala i olatou loto,
Ke aua na lotou tafoki, ti ke aua na kau fakamauli latou.
28Koia ke kotou iloa kua kakau le saofaki lena a le Atua ki le kau pagani, ti e lotou fakalogo loa ki ai.
29I le oki loa o lana fakasa le nea lena, na ano loa le kau Sutea, o fevisi makeke ia latou.
Pilisoni o Paulo i Loma i fetuu e lua
30Ti na nofo loa Paulo i fetuu katoa e lua i se fale leia na lue e ia. Na fakatalitali e ia latou fuli ala na au o fakatele mai kiate ia,
31o fakasa le Puleaga o le Atua, ti mo akonaki ki nea o uiga mo le Aliki ko Sesu-Kilisito, i le lauatea katoa ti mo sala fakavisi.
Currently Selected:
Gaoi 28: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
