Gaoi 27

Kakau o Paulo ki Loma

1Ti kua tonu loa ke motou ano vaka ki Italia, na tuku loa Paulo mo ni iki ake tagata pilisoni ki se setulio na igoa ko Suliusi, mei le kau solia a Aukusito. 2Ti na motou sopo loa ki se vaka mei Atalamite, leia na tonu ke ano i tafatafa o Asia, ti na motou ano loa mo Alisitake ko se Masetonia mei Tesalonika.

3I leia ake a aso, na motou tau loa ki Sitone ; ti ko Suliusi, leia na tokaga fakamalielie kia Paulo, na fakataga ia loa ke ano a ia ki ona kaukau nea ti ke lotou tokaga kiate ia. 4Ti na motou mavae loa i ai o fakalaka atu i le motu ko Sipele, talie na tutuu le matagi. 5I le oki o lamatou fakalaka i le tai o Silisia mo Pafilia, na motou kaku loa ki Mila i Lisia. 6I ai, na maua loa e le setulio se vaka mei Alekasia leia na ano ki Italia, ti na fakasopo loa e ia matou ki ai.

7Ti na motou ano mamalie loa i ni aso mauke ai, ti na faigataa ai lamatou kaku o tautonu mo Kinite, kae na leaise mafai ke motou tau ki le taulaga o tupu ko le matagi. Na motou fakalaka loa i tafa o le motu ko Kelete, o tautonu ake mo le fa komo ko Salomone. 8Na faigataa ai lamatou fakalaka i ai, ti na motou kaku loa ki se ganea na igoa ko Taulaga Malie, o ofi ki le kolo ko Lasea.

9Ti kua sili foki se temi fualoa ai, ti kua soko loa le temi faigataa o le fai folau i le tai, talie kua oki le temi sesunio leia e malie ki le folau. 10Koia na valoki loa e Paulo, o pati kia latou : Kau tagata, e kau tio e leaise sao loa le folau mo tutamaki ti mo maumau ; e leaise gato fua ki le uta mo le vaka, kae e toe tatau foki ki otatou mauli. 11Kae na tui lasi ake loa le setulio ki le pailate mo le kapiteni, kae leai ki masau a Paulo. 12Ti e tupu na leaise malie le taulaga ki le tau i ai i le temi momoko, na loto loa le toka api ke toso le taula, o asiasi ke kaku, mo kapau e feala, ki Fenisia, ko le taulaga o Kelete leia na agaaga ki le potu saute uesite ti mo le noleto uesite, o tupu ke nofo ai i le temi momoko.

13Ti na kamata agi loa se ga matagi maamaa mei le potu saute, kae i lalatou pati e lotou pulei a ia, na lotou toso loa le taula, o lotou folau i tafatafa o Kelete.

Le afa

14Kae na leaise fualoa ti na agi loa mei le motu, se matagi afa na igoa ko Elakilone. 15Ti i le tafea o le vaka talie na leaise koi mafai le fakatau ki le matagi, na motou tuku loa ke motou tafea. 16Na motou fakalaka loa i le saute o se ga motu na igoa ko Kalauta, ti kua pakia ai i le tataofi o le paopao ; 17I le oki o lona siki ake ki le vaka, na motou taliu loa a ia, mo saisai a ia ki ni kapa ki le vaka. I le i na piki ia le vaka i le lauone na igoa ko Site, na tuku loa ki lalo a la. Kae motou tuku loa matou ke tafea. 18I lomatou ta fakaveliveli e le afa, i le pogipogi ake, na motou laku loa le uta ki le tai, 19ti i le tolu o aso na motou laku loa ki omatou lima totonu a nea gaoi o le vaka. 20Na leaise toe sa loa le laa mo fetuu i ni aso mauke ai, ti na makeke tuumau aifai le afa, o puli ai loa ia matou le amanaki malie ki le mauli.

21Na leaise motou kai talu mei fualoa. Ti na tuu loa Paulo i lotomalie o latou, o pati : Kau tagata, na tonu fai ke kotou fakalogo mai kiate au, ke aua na tou mavae mei Kelete, o mafai ai loa ke aua na soko kia koutou le tutamaki mo le maumau leinei. 22I le temi nei e kau kole kia koutou ke kotou loto makeke ; talie e leaise puli loa le mauli o se tasi fua o koutou, kae gato fai ki le vaka. 23Talie na fakafeofi mai kiate au i le po leinei se aselo o le Atua, leia e kau fakalogo mo tausi ki ai, 24o pati mai kiate au : Paulo, aua na ke i, talie e tonu ke ke tuu i mua o Sesale, ti ko leinei, kua soli atu e le Atua kiate koe le mauli o latou fuli ala e folau mo koe. 25Koia ei kau tagata, ke kotou loto makeke talie e kau tui ki le Atua, e soko loa ofaipe lona fakasa mai kiate au. 26Kae e tonu ke tou kaku mua ki se motu.

27I le kaku ki le kau agafulu tupu fa o po, na fetaaki matou i le tai o Atiliatike, ti na masalosalo loa le kauvaka, i le vaeluapo, kua ofi mai se kele. 28I le oki o le fua o le loloto o le tai, na lotou maua loa ko le kau tolu tupu ono meta ; ti na toe soso atu ki mamao, na lotou toe fua loa, o maua loa ko meta e kau lua tupu valu. 29I lolatou i na piki ia le vaka i le mata utua, na lotou tuku loa a taula e fa i le taumuli, ti na lotou talitali loa ke mafoa ake le ao.

30Kae na faiga loa le kau matelo ke fesolaki mei le vaka, o lotou tuku loa ki le tai le paopao, o sakinake e lotou fia tuku ki mamao a taula o le taumua. 31Kae na pati loa Paulo ki le setulio mo le kau solia : Kapau e leaise nofo latou anei i le vaka, e leaise mafai ke kotou mauli. 32Ti na tuuti loa e le kau solia a maea o le paopao, o lotou tuku loa a ia ke vilo ki le tai.

33I lalatou talitali ke mafoa mai le ao, na kole ake loa e Paulo kia latou fuli ke lotou kai, o pati loa a ia : Ko le kau agafulu tupu fa leinei o aso mo lakotou talitali ti mo lakotou nofo pakupaku, na leaise kotou kai fua se nea. 34Koia, e kau kole atu kia koutou ke kotou kai, talie e aoga ki lokoutou mauli, ti e leaise puli loa se fa fului ulu o se tasi fua ia koutou. 35I le oki o lana masau, na too loa e ia se pane, ti na fakafetai loa a ia ki le Atua i mua o latou fuli, o tofitofi loa e ia, ti na kamata kai loa a ia. 36Ti na lotou loto makeke fuli loa, o lotou kai loa. 37Ko lomatou api i le vaka ko tino lelau e lua mo le tino fitu tupu ono. 38I le oki o le kai, na lotou fakamaamaa loa le vaka, o laku loa le fulumeto ki le tai.

Goto o le vaka i le motu ko Malete

39I le mafoa mai o le ao, na leaise lotou iloa fua le igoa o le fenua, kae na lotou tio loa ki se ava mo se mata one, ti na lotou fakatotonu loa ke lotou fakaulu i ai le vaka mo kapau e feala. 40Ti na lotou tatala loa a taula o tiaki i le moana, ti na lotou veteki loa a sai o le foeuli ; ti na lotou toso loa le la o le taumuli, o lotou ano ai loa ki uta. 41Ti na lotou felavei loa mo se tuuga one lasi i lotomalie o le ava, o pikiia ai loa le vaka ; na ulu loa le taumua i le one o mau ai le vaka, kae na maofa loa le taumuli i le makeke o galu.

42Ti na loto tasi loa le kau solia ke tamate le kau pilisoni i lolatou i na kakau se tasi ia latou ki uta, o sola. 43Kae na taofi loa latou e le setulio, leia na loto ke fakamauli ia Paulo. Ti na fakatotonu loa e ia kia latou ala e poto i le kakau ke uluaki sopo ki le tai, o kakau ki uta, 44kae ki la ake, ke lotou ano loa ki uta i ni papa pe ko ni koga o le vaka. Ti na lotou kaku saosaoa fuli loa ki uta.

Currently Selected:

Gaoi 27: FB2000

Highlight

Copy

Compare