Uluaki tosi kia Timoteo 1
1
Fakaalofa
1Ko au Paulo, apositolo a Sesu-Kilisito i le fakatotonu a le Atua lotatou Fakamauli ti mo Sesu-Kilisito lotatou amanaki malie, 2kia Timoteo laku fanau totonu i le tui : Ko le kalasia, mo le manavaalofa, ti mo le tokamalie ke soli atu kiate koe e le Atua ko le Tamana ti mo Sesu-Kilisito ko lotatou Aliki !
Valoki o akonaki sala
3E kau toe fakamanatu atu kiate koe le kole leia na kau tuku atu kiate koe i laku mavae i Masetonia : na kau kole atu kiate koe ke ke nofo i Efeso o fakatotonu ki ni iki ke aua na fai ia ni akonaki kese, 4ti ke aua na pipiki ki ni talatuku mo ni sologa lee oki, ala e fakatupu ia ni visi kae e leaise fakatuputupua ia le gaoi a le Atua i le tui.
5Ko le uiga o le fakatotonu lena, ko se alofa leia e au mei se loto mea, mo se fakakaukau malie, ti mo se tui maoki. 6Kua maliu ni iki mei nea ana, ti kua lotou sese i ni visi vaiga ; 7e lotou loto ke lotou liliu ko ni toketa o le lao, kae e leaise lotou matala fua ki nea ala e lotou masau ki ai, pe ko le nea leia e lotou fakamaoki ki ai. 8E leaise puli kia tatou e malie le lao, kae tonu ke totonu lona fakaaoga ; 9e tou iloa papau na leaise fakatupu le lao ki le tagata agatonu, kae ki le kau agaveli ti mo le kau patigataa, ki le kau lee tui ki le Atua ti mo le kau agasala, ki le kau lee fakaapaapa ki le Atua mo nea taputapu, ki le kau tukipo tamana mo tinana ti mo tagata fuli, 10ki le kau fai feauaki, mo le kau fakalialia, mo le kau kaia tagata, mo le kau gutu loiloi, mo le kau fakamaoki loi, ti mo nea fuli ala e fakafesagai ki le akonaki totonu, 11leia e mulimuli ki le Evaselio o le kololia o le Atua manuia, Evaselio leia kua tuku mai kiate au.
Paulo, faifaitakiaga o le manavaalofa o le Atua
12E kau fakafetai ki leia na fakamakeke ia au, kia Sesu-Kilisito lotatou Aliki, i lana tio mai kiate au ofaipe se tagata agatonu, o fakanofo au ki lana gaoi, 13a au leia na nofo i mua ko se tagata fatituu ki le Atua, ko se tagata fakaveliveli, ko se tagata agamakeke. Kae na manavaalofa le Atua kiate au, talie na kau fai a nea ana i le fakapouli, talie na leaise kau tui ; 14ti na lasi ai le kalasia o lotatou Aliki, mo le tui ti mo le alofa leia e maua ia Sesu-Kilisito. 15Ko se folafola maoki ti mo gali ke tali, na au Sesu-Kilisito ki malama nei o fakamauli le kau agasala, ti ko au ko le uluaki o latou. 16Kae na kau maua le manavaalofa, o tupu ke fakasa e Sesu-Kilisito iate au, ko le uluaki, lona alofa kataki fualoa, ti ke kau liliu ko se faifaitakiaga kia latou ala e tui loa kiate ia mo tali ia loa le mauli lee gato.
17Ki le Sau o sekulo, lee mate, lee tio ki ai, ki le Atua e tasi fuai, ke tuku le fakaapaapa mo le kololia, i sekulo mo sekulo ! Amene !
18Ko le fakatotonu leia e kau fai atu kiate koe Timoteo, ko laku fanau, o mulimuli ki folafola kikite ala na fai kiate koe i mua, ala na fakasa ia, ke ke tau le tau malie, 19o ke taupau le tui, ti mo se atamai malie, leia kua tiaki e ni iki, o tupu ai le maumau o lalatou tui. 20Ia latou ana e kau ai Imeneo mo Alesatelo, ala kua kau tuku kia Satana, o tupu ke la ako ai ke aua se fatituu.
Currently Selected:
Uluaki tosi kia Timoteo 1: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
