Uluaki tosi ki le kau Tesalonika 3
3
1Koia i le leaise koi ma faakatakii ia lomatou fia ilo kia koutou, na motou loto tasi loa ke motou nonofo tefua i Atene, 2kae motou kakau atu kia koutou Timoteo, lomatou taina, tagata gaoi a le Atua ki le Evaselio a Kilisito, ke natu o fakamakeke koutou mo fakafimalie koutou i lakotou tui, 3o tupu ke aua na gaegae se tasi i mamae o le temi nei ; talie e kotou iloa kua fakatuutuu tatou ki ai. 4Ti i le temi leia na motou nonofo ai mo koutou, na motou fakasa fakatomua atu kia koutou e tou tali loa ni mamae, ofaipe le nea leia kua soko ti kua kotou iloa.
5Koia, i loku le leaise koi mafai laku kataki, na kau kakau loa se tasi ke fakasa ia mai kiate au le anoaga o lakoutou tui, talie na kau i na fakasalai koutou e le fili kae ano noa lamatou gaoi.
6Ti ko leinei, kua tau mai Timoteo meia koutou, o fakamatala mai kia matou ni logo malilie o lakotou tui ti mo lokotou alofa, ti na pati mai a ia kia matou e kotou taupau tuumau se manatu malie kia matou, ti e kotou fia tio kia matou ofaipe lomatou fia tio foki kia koutou. 7Koia, fetaina, i omatou fitaa mo omatou mamae, na motou fimalie loa o uiga mo lakotou tui. 8Koia kua motou mauli ai i le temi nei, talie kua kotou tuu makeke i le Aliki. 9Koia na motou fakafetai lasi ai ki le Atua o uiga mo koutou, o tupu ko le fiafia leia e motou maua ia koutou i mua o lotatou Atua ! 10I le po mo le ao, e motou kole kiate ia i se loto makeke lasi ke fakataga e ia ke motou tio kia koutou, ti ke motou fakakatoa le nea leia koi puli ki lakotou tui.
11Io, ko le Atua totonu lotatou Tamana ti mo lotatou Aliki ko Sesu, ke fakatokatoka ia lomatou ala ke motou natu ai kia koutou ! 12Ti ke fakatuputupua mo fakaapele e ia le alofa leia e kotou maua i okoutou vasaa, ti ki tagata fuli, o faifaitaki ki le alofa leia e motou maua kia koutou ; 13ke fakamakeke e ia o okoutou loto o tupu ke kotou lee mele mo maokioki i mua o le Atua ko lotatou Tamana, i le aso o le toe liliu mai o lotatou Aliki ko Sesu mo ana sagato fuli.
Currently Selected:
Uluaki tosi ki le kau Tesalonika 3: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
