Mrɛ 3
3
Mgbavolɛ folɛdulɛ
1Me ra nrenya, mmamaa ɛ rɛle fi me ngilehilelɛ ne; fa me mɛla ne mɔ sie wɔ ahonle nu, 2na bɛbamaa wɔanyi wɔahyɛ na wɔakpazi ɛbɛlabɔlɛ nu. 3Mmamaa ɛ rɛle fi kɛ ɛkɛyɛ tieyɛ na ɛkɛli nɔhalɛ; kyekye bɛ mu nwiɔ kenda ɛ kɔme na fa sie wɔ ahonle nu. 4#Luk 2.52 Ɛhye bamaa wɔazɔ ɛnyelɛ, wɔanyia dumamɔlɛ kpalɛ wɔ menli nee Nyamenle anyunlu.
5Yeye wɔ ahonle nu fa ɛ rɛle wula Ɛdɛnkɛma anu, mmafa wɔ adwenle ɛsɔ ɛ ngome wɔ nrɛlɛbɛ. 6Nwu Nyamenle wɔ wɔ ɛbɛlabɔlɛ muala anu, na ɔbamaa wɔ ndenle adenrɛ fɔɔnwo amaa wɔ. 7#Wulo 12.16 Mmabu ɛ nwo kɛ ɛze nrɛlɛbɛ, sulo Ɛdɛnkɛma na twe ɛ nwo fi ɛtane nwo; 8ɔbayɛ ayileyɛlɛ yeamaa wɔ nwonane ne, na yeayɛ wɔ mbowule nu ayile. 9Fa ɛ nwo amuala di Ɛdɛnkɛma eni, na fa wɔ egyinli nu bɛyɔba mɔɔ lumua la maa ye, 10na wɔ bonwolo ne mɔ azo bayi tɛkɛɛ, na wɔ nwanye angola ne mɔ ayi abulubulu zo.
11 #
Dwo 5.17
Me ra nrenya, saa Ɛdɛnkɛma tea wɔ adenrɛdenrɛ wɔ a, mmakpo, yɛɛ saa ɔtwi ɛ nyunlu a, mmamaa ɔyɛ wɔ ɛvɛlɛ, #Hib 12.5-6 12#Yek 3.19 ɔluakɛ Ɛdɛnkɛma tea mɔɔ ɔkulo ye la, kɛmɔ selɛ tea ɔ ra nrenya mɔɔ ɔ nye die ɔ nwo la. 13Nyilalɛ ɛha sonla ne mɔɔ kɛnwu nrɛlɛbɛ na ɔkɛnyia ndelebɛbo la, 14ɔluakɛ mɔɔ ɔbanyia ye nu la tɛla dwɛtɛ fufule yɛɛ nvasoɛ mɔɔ ɔbanyia la tɛla ezukoa nvutuke. 15Nrɛlɛbɛ sonle bolɛ tɛla anwoneɛ yɛɛ debie biala mɔɔ sonla nye die nwolɛ la nee ye ɛnzɛ. 16Nrɛlɛbɛ lɛ ngoane tendenle wɔ ɔ sa fema ne anu, yɛɛ ɔlɛ anyiabɛnwo nee enililɛ wɔ bɛne ne anu. 17Nrɛlɛbɛ adenle nu le anyelielɛ nee anzonudwolɛ ngome. 18Ɔle ngoane baka ɔmaa bɛdabɛ mɔɔ bɛsɔ nu boɛ la; bɛdabɛ mɔɔ bɛsɔ nu boɛ la di fɛlɛko.
19Ɛdɛnkɛma vale ye nrɛlɛbɛ a bɔle ewiade a;
ɔvale ye ndelebɛbo a ɔbɔle anwumaneamra a.
20Ɔvale ye adwenle a ɔmanle buma ne mɔ rale,
na amungu ne mɔ tɔ ɛbɔlɛ gua azɛlɛ ye azo a.
21Me ra nrenya, sɔ nrɛlɛbɛ nee adwenlenunwunlɛ nu boɛ; mmamaa bɛfi ɛ sa, 22na bɛbayɛ ngoane nee ɛ kɔme ndweabane. 23Ɛhye bamaa wɔalua, ɛ nwo ayɛ kɔlɔnwo wɔ wɔ ɛlualɛ nu, yɛɛ ɛ gyakɛ ɛnrɛkpula. 24Saa ɛtɛnla aze a, ɛnrɛzulo, yɛɛ saa ɛda a, wɔ nafelɛ bayɛ wɔ fɛ. 25Anyezota ba arɛlevilɛ nu a, mmasulo, yɛɛ saa amumuyɛma ɛzɛkyelɛ mekɛ ne dwu a, mmasulo, 26ɔluakɛ Ɛdɛnkɛma bamaa ɛ nwo ayɛ kɔlɔnwo; ɔnrɛmaa ɛnrɛdo ɛhane.
27Saa ɛyɛ na ɔkɛyɛ boɛ a, yɛ menli mɔɔ ɔwɔ kɛ ɛyɛ bɛ boɛ la boɛ. 28Mmaka ɛkile ɛ gɔnwo kɛ, “Kɔ na wɔara, ɛhyema mebava meamaa wɔ”, wɔ mekɛ mɔɔ deɛ ne mɔɔ ɛfa wɔamaa ye la wɔ ɛ nwo ɛkɛ ne la. 29Mmafa ɛ gɔnwo mɔɔ ɛ nee ye zua bane, na yeva ɔ rɛle yewula wɔ nuhua la anwo adwenle ɛtane. 30Ɛ nee awie biala mɔɔ ɛtɛyɛle wɔ ɛtane la mmadi butule. 31Mmamaa ɛ nye bolo awie mɔɔ kulo konle la, yɛɛ mmayɛ mɔɔ ɔyɛ la bie, 32ɔluakɛ Ɛdɛnkɛma kyi sonla mɔɔ ɛnli boɛ la, na ɔmaa mɔɔ di boɛ la nwu ye ngyehyɛlɛ ne. 33Ɛdɛnkɛma maa munzule tɔ amumuyɛma awuke nu, na ɔyila tenlenema awuke. 34Ɛdɛnkɛma ɛmbu bɛdabɛ mɔɔ bɛmbu debie la bie, na ɔ nye wɔ bɛdabɛ mɔɔ bɛle bɛlɛvo la anwo zo. 35Bɛdabɛ mɔɔ bɛze nrɛlɛbɛ la, bɛbali bɛ eni, na ahoasea anyunlu bagua aze.
Bible in Nzema © Bible Society of Ghana, 1998.