Mrɛ 2
2
Nrɛlɛbɛ ahatualɛ ne mɔ
1Me ra nrenya, saa ɛtie me edwɛkɛ ne, na ɛfa me mɛla ne mɔ ɛsie kpalɛ, 2ɛyɛ ɛnzonlɛ ɛtie nrɛlɛbɛ edwɛkɛ, na ɛfa wɔ adwenle ɛsie ndelebɛbo zo; 3ɛhɛe, saa ɛsu kɛ ɛkpondɛ adwenlenunwunlɛ, na ɛmaa ɛ ne zo kɛ ɛkpondɛ ndelebɛbo, 4saa ɛkpondɛ ye kɛ ɛkpondɛ ezukoa fufule, na ɛkpondɛ ye kpalɛ kɛ anwoneɛ mɔɔ vea la a, 5ɛbade Ɛdɛnkɛma ɛzulolɛ ne abo na wɔanyia Nyamenle anwo adwenlenubukelɛ, 6ɔluakɛ Ɛdɛnkɛma maa nrɛlɛbɛ; ɔdaye yɛɛ ɔmaa adwenle nee ndelebɛbo a. 7Ɔfa nrɛlɛbɛ kpalɛ ɔmaa mɔɔ le tenlene la; ɔle enyinlike ɔmaa bɛdabɛ mɔɔ bɛze nrɛlɛbɛ la, 8ɔsinza bɛdabɛ mɔɔ bɛdi pɛlepɛle la ɛbɛlabɔlɛ, na ɔmaa ye menli ne mɔɔ ɛdu bɛ nwo ɛmaa ye la anwo tɔ bɛ.
9Saa ɛtie me ne a, ɛbade pɛlepɛlelilɛ nee tenleneyɛlɛ, boɛlilɛ, yɛɛ adenle kpalɛ biala abo, 10ɔluakɛ ɛbanwu nrɛlɛbɛ na wɔ adwenle abuke kɛnlɛma bie. 11Ɛbava wɔ adwenle wɔabɔ ɛ nwo mgbɔlɔka, na wɔ ndelebɛbo azinza wɔ. 12Ɛbava wɔ adwenle wɔalie ɛ nwo wɔavi munzule adenle nu, nee mgbane mgbane ɛhanlɛma asa anu. 13Menli ɛhye mɔ kpo ndenle fɔɔnwo ne mɔ na bɛdua awozinli ndenle ne mɔ anu. 14Bɛ nye die ɛtaneyɛlɛ nwo, yɛɛ bɛ anyelielɛ a le ɛtanelilɛ ala. 15Bɛle menli mɔɔ bɛ ndenle nu kyeɛhyea, yɛɛ bɛle mɛlɛbɛla.
16Bɛbalie wɔ bɛavi raalɛ kpamgbanvolɛ anloa anu menlemenle ne asa anu, 17raalɛ zɛhae kpo ye mbɛlɛra nu ɔ hu, na ɔkpo ye Nyamenle ngyekyeleɛ ne, 18ɔluakɛ ye awuke bɔ bɔkɔɔ yɛɛ ye ɛbɛlabɔlɛ nu yɛ awozinli. 19Awie biala mɔɔ kɔ ye ɛkɛ ne la ɛnzia, yɛɛ ye ɛbɛla ɛnwie ye boɛ. 20Yemɔti ɛ nee menli kpalɛ ɛdu na dua tenlenema adenle nu, 21ɔluakɛ menli mɔɔ di boɛ la badɛnla azɛlɛ ne azo, yɛɛ menli mɔɔ ze nrɛlɛbɛ la baha zolɛ. 22Bɛbaye amumuyɛma bɛavi azɛlɛ ne azo, na bɛadu ngunzima bɛavi zolɛ.
Bible in Nzema © Bible Society of Ghana, 1998.