Ɛdi 4
4
Kohate abusua ekpulike ne gyima
1Ɛdɛnkɛma zele Mosisi nee Aalɔn kɛ, 2“Bɛdia Kohate abusua ekpulike ne anu amra mɔɔ wɔ Livae abusua ekpunli ne anu la, wɔ selɛ nu, 3na bɛhɛlɛ mrenya mɔɔ ɛli ɛvolɛ abulasa mɔɔ kɔdwu abulanlu, mɔɔ kola gyima yɛ la aluma bɛmaa bɛyɛ Ɛdɛnkɛma Ndanlɛ Sua ne anu gyima. 4Ninyɛne nwuanzanwuanza kpalɛ ne mɔ anwo gyimalilɛ wɔ bɛ sa nu. 5Saa mekɛ dwu mɔɔ ɔwɔ kɛ bɛfi azokoɛleɛ ne a, Aalɔn nee ɔ mra mrenya ne mɔ ɛhɔ Ɛdɛnkɛma Ndanlɛ Sua ne anu. Bɛye mgbɛnu ɛdanlɛ ne mɔɔ wa Ngyekyeleɛ Ɛlɛka ne anye la, na bɛva bɛkyekye nwo. 6Bɛva nwoma kɛnlɛma bɛheda zolɛ, bɛva ɛdanlɛ buluwu bɛgua nwoma ne azo, na bɛva ye mbaka mɔɔ bɛfa bɛsoa la bɛwulowula ye ngɛba ne mɔ anu.
7“Bɛva ɛdanlɛ buluwu bɛgua ɛkponle ne mɔɔ bɛfa kpanwo mɔɔ bɛva bɛbɔ azu bɛmaa Ɛdɛnkɛma la bɛgua zolɛ la azo, na bɛva ahyɛnze ne mɔ, ɛyɛlɛ ɛyelalɛ ahyɛnze kuloonwu ne mɔ, azubɔdeɛ ahyɛnze kuloonwu ne mɔ, yɛɛ nwanye azubɔdeɛ dwora ne mɔ bɛziezie zolɛ. Ɔwɔ kɛ kpanwo ne boa ɛkponle ne azo dahuu. 8Bɛva ɛdanlɛ kɔkɔlɛ bɛheda ɛhye mɔ kɔsɔɔti azo. Bɛva nwoma kɛnlɛma bɛheda zolɛ, na bɛva ye mbaka mɔɔ bɛfa bɛsoa la bɛwulowula ye ngɛba ne mɔ anu.
9“Bɛva ɛdanlɛ buluwu bɛkyekye kɛnlaneɛ baka ne nee ye ahɛnlaneɛ ne mɔ, ye dabekɛ ne mɔ, ye nzonle ahyɛnze ne mɔ, yɛɛ ahyɛnze mɔɔ bɛfa ɔlivi nwole bɛgua nu la anwo. 10Bɛkyekye ye nee ɔ nwo ninyɛne kɔsɔɔti wɔ nwoma kɛnlɛma nu, na bɛva bɛdo mbaka mɔɔ bɛfa bɛsoa la azo.
11“Bɛva ɛdanlɛ buluwu bɛheda ezukoa nvutuke azukponle ne anwo, bɛva nwoma kɛnlɛma bɛheda zo na bɛva ye mbaka mɔɔ bɛfa bɛsoa la bɛwulowula ye ngɛba ne mɔ anu. 12Bɛva ahyɛnze mɔɔ bɛfa bɛbɔ azu wɔ Ɛleka Nwuanzanwuanza ne la kɔsɔɔti, bɛkyekye bɛ wɔ ɛdanlɛ buluwu nu, bɛva nwoma kɛnlɛma bɛheda zolɛ, na bɛva bɛzie ye mbaka mɔɔ bɛfa bɛsoa la azo. 13Bɛdu azukponle ne anu nzonle ne, na bɛva ɛdanlɛ mɔɔ bɛva nyɛma buluwu nee kɔkɔlɛ afonla bɛnwo la bɛkyekye nwolɛ. 14Bɛva azukponle ne azo debie biala mɔɔ bɛfa bɛbɔ azu la, senlevalɛ ahyɛnze, faka ne mɔ, azofi nee ahyɛnze kuloonwu ne mɔ bɛgua azukponle ne azo. Akee bɛva nwoma kɛnlɛma bɛheda zolɛ, na bɛva ye mbaka mɔɔ bɛfa bɛsoa la bɛwulowula ye ngɛba ne mɔ anu. 15Saa mekɛ dwu na bɛlɛfi azokoɛleɛ bie, na Aalɔn nee ɔ mra mrenya ne mɔ boɔboa ninyɛne nwuanzanwuanza ne mɔ anloa, kyekye wie a, ɔwɔ kɛ Kohate abusua ekpulike ne anu amra a soa ɛhye mɔ amuala a. Noko ɔnle kɛ bɛfa bɛ sa bɛka ninyɛne nwuanzanwuanza ne mɔ bie, anrɛɛ bɛkɛwu.
“Kohate abusua ekpulike ne gyima mɔɔ la bɛ kɔme zo, wɔ mekɛ biala mɔɔ bɛvi azokoɛleɛ ko bɛlɛtu la, yemɔ ɛne.
16“Sɛlɛvolɛ Aalɔn ara nrenya Ɛlieza a di Ɛdɛnkɛma Ndanlɛ Sua ne, kɛnlaneɛ nwole ne, ɛyɛlɛ evuanlɛ ne, ma azubɔdeɛ ne mɔ, ɛkpokpalɛ nwole ne, yɛɛ debie biala mɔɔ wɔ Ɛdɛnkɛma Ndanlɛ Sua ne anu, mɔɔ bɛdu bɛmaa Ɛdɛnkɛma la anwo ɛzonle a.”
17Ɛdɛnkɛma zele Mosisi nee Aalɔn kɛ, 18“Bɛmmamaa Kohate abusua ekpulike ne anu amra abo zo bɔ wɔ Livae abusua ekpunli ne anu. 19Amaa ɛhye anzi la, Aalɔn nee ɔ mra mrenya ne mɔ ɛhile awie biala ye gyima mɔɔ ɔwɔ kɛ ɔyɛ nee ye ɛzonle mɔɔ la ɔ nwo zo la. 20Noko ɔnle kɛ bɛkɔ Ɛdɛnkɛma Ndanlɛ Sua ne anu kɛ bɛfa bɛ nye mgbane bɔbɔ bɛahɔnlea ninyɛne nwuanzanwuanza ne mɔ bie, anrɛɛ bɛkɛwu.”
Gɛhyɔn abusua ekpulike ne gyima
21Ɛdɛnkɛma zele Mosisi kɛ, 22“Tia Gɛhyɔn abusua ekpulike ne anu amra mɔɔ wɔ Livae abusua ekpunli ne anu la, wɔ selɛ nu, 23na kɛlɛ mrenya mɔɔ ɛli ɛvolɛ abulasa mɔɔ kɔdwu abulanlu, mɔɔ kola yɛ gyima la aluma maa bɛyɛ gyima wɔ Ɛdɛnkɛma Ndanlɛ Sua ne anu. 24Bɛmɛ yɛɛ bɛbazoa ninyɛne ɛhye mɔ a: 25Ɛdɛnkɛma Ndanlɛ Sua ne anwo ndanlɛ mɔɔ bɛva bɛwowa nwolɛ, Ɛzonlenlɛ Sua mumua ne nee zolɛ ndanlɛ nee abɔnkye nwoma kɛnlɛma ne mɔɔ bɛva bɛdu zolɛ la, Ɛzonlenlɛ Sua ne anlenkɛ ne anloa anu ɛdanlɛ ne, 26alie ne anwo bane ne nee bɛ nwo nyɛma ne mɔ, azukponle ne, alie nwo bane ne anlenkɛ kpole ne anloa anu ɛdanlɛ ne nee ninyɛne mɔɔ bɛva bɛziezie nu, mɔɔ bɛfa bɛyɛ ɛzonlenlɛ la. Bɛbayɛ gyima biala mɔɔ fane ninyɛne ɛhye mɔ anwo la. 27Aalɔn nee ɔ mra mrenya ne mɔ banlea bɛamaa Gɛhyɔnoma ayɛ gyima ne na bɛayɛ debie biala mɔɔ bɛkɛva bɛkɛwula bɛ sa nu kɛ bɛyɛ la. 28Ɛhye mɔ a le Gɛhyɔn abusua ekpulike ne anu amra gyima mɔɔ ɔwɔ kɛ bɛyɛ wɔ Ndanlɛ Sua ne anwo a, yɛɛ Sɛlɛvolɛ Aalɔn ara nrenya Yetamaa a ɔwɔ kɛ nea maa bɛyɛ gyima ne a.”
Mɛlɛlae abusua ekpulike ne gyima
29Akee Ɛdɛnkɛma zele Mosisi kɛ ɔdia Mɛlɛlae abusua ekpulike ne anu amra ne selɛ nu, 30na ɔhɛlɛ mrenya mɔɔ ɛli ɛvolɛ abulasa mɔɔ kɔdwu ɛvolɛ abulanla, mɔɔ kola yɛ ɛzonlenlɛ gyima wɔ Ɛdɛnkɛma Ndanlɛ Sua ne anu la aluma. 31Gyima mɔɔ bɛbayɛ wɔ Ɛdɛnkɛma Ndanlɛ Sua ne anu la amuala ɛne: bɛbazoa Ɛdɛnkɛma Ndanlɛ Sua ne mbaka mɔɔ bɛfa bɛkyehyɛ la, mbaka mɔɔ beɛbea felɛmo ne mɔ anzi, mpila ne mɔ nee bɛ adiabo ne mɔ, 32alie ne mɔɔ bɛnra yia Ɛdɛnkɛma Ndanlɛ Sua ne la bane ne mbaka nee bɛ adiabo ne mɔ, bɛ adakola ne mɔ, bɛ nyɛma ne mɔ, yɛɛ debie biala mɔɔ fane Ɛdɛnkɛma Ndanlɛ Sua ne anwo la. Fa bɛ aluma kyɛ debie biala mɔɔ ɔwɔ kɛ bɛsoa la. 33Ɛhye mɔ a le Mɛlɛlae abusua ekpulike ne gyima wɔ Ɛdɛnkɛma Ndanlɛ Sua ne anwo a. Sɛlɛvolɛ Aalɔn ara nrenya Yetamaa a banlea yeamaa bɛayɛ gyima ne a.
Livaema ɛdianlɛ ne
34-48Kɛmɔ Ɛdɛnkɛma zele la, Mosisi, Aalɔn, yɛɛ menli ne mgbanyima ne mɔ dianle Livae abusua ekpulike nsa ne anu amra. Bɛmɛ a le: Kohate, Gɛhyɔn, yɛɛ Mɛlɛlae. Bɛdianle bɛ selɛ nu na bɛhɛlɛle mrenya mɔɔ wɔ nu, mɔɔ ɛli ɛvolɛ abulasa mɔɔ kɔdwu ɛvolɛ abulanlu, mɔɔ kola yɛ gyima la aluma, amaa bɛayɛ gyima wɔ Ɛdɛnkɛma Ndanlɛ Sua ne anu. Menli dodo mɔɔ bɛnyianle la ɛne:
| Abusua ekpulike | Bɛ dodo |
|---|---|
| Kohate | apenle nwiɔ, ɛya nsuu abulanlu |
| Gɛhyɔn | apenle nwiɔ, ɛya nsia abulasa |
| Mɛlɛlae | apenle nsa, ɛya nwiɔ |
Bɛ muala bɛ dodo le apenle mɔtwɛ, ɛya nnu abulatwɛ. 49Bɛhɛlɛle awie biala duma, kɛmɔ Ɛdɛnkɛma zele Mosisi la; yɛɛ kɛmɔ Ɛdɛnkɛma luale Mosisi anwo zo hyehyɛle la, bɛmanle awie biala gyima mɔɔ ɔwɔ kɛ ɔyɛ anzɛɛ debie mɔɔ ɔbazoa la.
Currently Selected:
Ɛdi 4: NB
Highlight
Copy
Compare
Share
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
