Ɛdi 3
3
Aalɔn amra mrenya ne mɔ
1Aalɔn nee Mosisi mbusua ɛlɔnwɔne ne mɔ, wɔ mekɛ mɔɔ Ɛdɛnkɛma dendɛle hilele Mosisi wɔ Saenae Boka la, bɛmɛ ɛne. 2#Ɛdi 26.60 Aalɔn wole mralɛ mrenya nna. Bɛ aluma ɛne: Needabe, yemɔ a ɔle awolɛ kpanyinli a, Abaehu, Ɛlieza, yɛɛ Yetamaa. 3Bɛkpokpale bɛ nwole na bɛwulale bɛ sɛlɛvolɛ. 4Needabe nee Abaehu vale senle mɔɔ ɛnle nwuanzanwuanza la hɔle Ɛdɛnkɛma anyunlu wɔ Saenae fienemgbole ne anu, na bɛwule. Bɛanwo mralɛ yɛɛ bɛwule a, yemɔti Ɛlieza nee Yetamaa ala a yɛle sɛlɛvolɛ gyima ne wɔ mekɛ mɔɔ bɛ ze Aalɔn de aze la a.
Bɛye Livaema kɛ bɛzonle sɛlɛvolɛma
5Na Ɛdɛnkɛma zele Mosisi kɛ, 6“Fa Livae abusua ekpunli ne bɛla na yɛ bɛ Sɛlɛvolɛ Aalɔn sonvolɛma. 7Bɛbayɛ gyima wɔ Ɛdɛnkɛma Ndanlɛ Sua ne anu; bɛbayɛ gyima bɛamaa Aalɔn nee menli ne amuala. 8Bɛbanlea Ɛdɛnkɛma Ndanlɛ Sua ne anu ninyɛne kɔsɔɔti azo na bɛayɛ gyima bɛamaa Yizilayɛma. 9Ye Livaema ne fi Yizilayɛma anu, na fa bɛ maa Aalɔn nee ɔ mra ne mɔ bɔkɔɔ maa bɛzonle bɛ. 10Akee ye Aalɔn nee ɔ mra ne mɔ maa bɛyɛ sɛlɛvolɛ gyima ne; saa awie gyɛne biala pele kɛ ɔyɛ bie a, bɛhu ye.”
11Na Ɛdɛnkɛma zele Mosisi kɛ, 12-13“Nea, meye Livaema wɔ Yizilayɛma avinli meyɛ me ɛdeɛ. Mekɛ mɔɔ mengunle Yigyibitima belamunli mralɛ ne mɔ kɔsɔɔti la, mendule Yizilayɛma abusua ekpulike biala anu awolɛ nrenya kpanyinli ne nee ayɛmoa biala ara mɔɔ lumua la menziele ahane kɛ bɛle me ɛdeɛ. Kɛkala, meva Livaema ne mezie Yizilayɛ belamunli mralɛ agyakɛ anu. Bɛle me ɛdeɛ. Medame a mele Ɛdɛnkɛma a.”
Livaema ɛdianlɛ ne
14Wɔ Saenae fienemgbole ne anu, Ɛdɛnkɛma zele Mosisi kɛ, 15“Tia Livaema ne amuala. Bɔ ye wɔ bɛ ze mɔ awuke nu kɔdwu bɛ mbusua ekpulike ekpulike ne mɔ azo. Bɔ ye mrenya mɔɔ ɛli siane ko mɔɔ kɔ la anwo zo.” 16Na Mosisi dianle bɛ, kɛmɔ Ɛdɛnkɛma zele ye la. 17-20Livae wole mralɛ mrenya nsa: Gɛhyɔn, Kohate, yɛɛ Mɛlɛlae. Menli ɛhye mɔ aluma a deda bɛ bo zo amra mbusua ekpulike ekpulike ne mɔ anwo zo la. Gɛhyɔn wole mrenya nwiɔ: Lebenae nee Hyemɛyae; Kohate wole mrenya nna: Amelam, Yezaa, Hibulɔn, yɛɛ Ɛzeɛle; yɛɛ Mɛlɛlae wole mrenya nwiɔ: Maalae nee Muhyae. Menli ɛhye mɔ aluma a deda bɛ bo zo amra mbusua ekpulike ekpulike ne mɔ anwo zo la.
21Lebenae nee Hyemɛyae mbusua ne mɔ a bɔ nu yɛ Gɛhyɔn abusua ekpulike ne a. 22Mrenya mɔɔ bɛdianle bɛ, ɛbɔ ye adɔma mɔɔ ɛli siane ko anwo zo mɔɔ kɔ la, bɛ muala bɛ dodo le apenle nsuu, ɛya nnu. 23Ɔwɔ kɛ abusua ekpulike ɛhye tɛnla Ɛdɛnkɛma Ndanlɛ Sua ne anzi mɔɔ kɔne adɔleɛ la. 24Leeyɛle ara nrenya Yilayasafe a le bɛ abusua kpanyinli a. 25Bɛmɛ yɛɛ bɛyɛ Ɛdɛnkɛma Ndanlɛ Sua ne anu gyima biala a, ninyɛne mɔɔ bɛva bɛwowa sua ne anwo nee zolɛ, sua ne anlenkɛ ne anloa anu ɛdanlɛ ne, 26alie ne anwo bane ne mɔ anwo ndanlɛ ne mɔ, yɛɛ akee alie nwo anlenkɛ ne anloa anu ɛdanlɛ ne mɔɔ wa azukponle ne anye la nee nwolɛ nyɛma ne mɔ kɔsɔɔti. Bɛmɛ a bɛdi ninyɛne ɛhye mɔ kɔsɔɔti anwo ɛzonle a.
27Amelam, Yezaa, Hibulɔn, yɛɛ Ɛzeɛle mbusua ne mɔ a bɔ nu yɛ Kohate abusua ekpulike ne a. 28Mrenya mɔɔ bɛdianle bɛ, ɛbɔ ye nlɔma mɔɔ ɛli siane ko mɔɔ kɔ la, bɛ muala bɛ dodo le apenle mɔtwɛ, ɛya nsia. 29Ɔwɔ kɛ abusua ekpulike ɛhye tɛnla Ɛdɛnkɛma Ndanlɛ Sua ne nyiakɛ afoa nu. 30Ɛzeɛle ara nrenya Yilaezeefan a le bɛ abusua kpanyinli a. 31Bɛmɛ yɛɛ Ngyekyeleɛ Ɛlɛka ne, ɛkponle ne, kɛnlaneɛ baka ne, azukponle ne mɔ, ahyɛnze mɔɔ sɛlɛvolɛma ne mɔ fa yɛ gyima wɔ Ɛleka Nwuanzanwuanza ne, nee mgbɛnu ɛdanlɛ ne mɔɔ henda Nwuanzanwuanza nu Nwuanzaanwu Ɛleka ne la wɔ bɛ sa nu a. Bɛmɛ a bɛdi ninyɛne ɛhye mɔ kɔsɔɔti anwo ɛzonle a.
32Sɛlɛvolɛ Aalɔn ara nrenya Ɛlieza a le Livae mgbanyima ne mɔ anwo zo kpanyinli na eza ɔnea menli mɔɔ yɛ gyima wɔ Ɛleka Nwuanzanwuanza ne la anwo zo a.
33Maalae nee Muhyae mbusua ne mɔ a bɔ nu yɛ Mɛlɛlae abusua ekpulike ne a. 34Mrenya mɔɔ bɛdianle bɛ, ɛbɔ ye nlɔma mɔɔ ɛli siane ko mɔɔ kɔ la, bɛ muala bɛ dodo le apenle nsia, ɛya nwiɔ. 35Ɔwɔ kɛ abusua ekpulike ɛhye tɛnla Ɛdɛnkɛma Ndanlɛ Sua ne sɔlɔ afoa nu. Abeheeli ara nrenya Zuleɛle a le bɛ abusua kpanyinli a. 36Bɛ gyima ɛdeɛ ne a le kɛ bɛnea Ɛdɛnkɛma Ndanlɛ Sua ne mbaka mɔɔ bɛfa bɛkyehyɛ la, mbaka mɔɔ beɛbea Ndanlɛ Sua ne felɛmo ne mɔ anzi, mpila ne mɔ, adiabo ne mɔ, yɛɛ nwolɛ ninyɛne ne mɔ kɔsɔɔti azo. Bɛmɛ a bɛdi ninyɛne ɛhye mɔ kɔsɔɔti anwo ɛzonle a. 37Eza bɛmɛ a bɛdi alie nwo bane ne mɔ mpila ne mɔ, bɛ adiabo ne mɔ, adakola nee bɛ nyɛma ne mɔ anwo ɛzonle a.
38Ɔwɔ kɛ Mosisi nee Aalɔn nee ɔ mra ne mɔ tɛnla Ndanlɛ Sua ne anyunlu wɔ aduduleɛ afoa nu. Bɛmɛ yɛɛ bɛyɛ ɛzonlenlɛ gyima wɔ Ɛleka Nwuanzanwuanza ne bɛmaa Yizilayɛma a. Awie gyɛne biala mɔɔ kɛpele kɛ ɔyɛ bie la, bɛhu ye. 39Livae mrenya mɔɔ Mosisi nee Aalɔn dianle bɛ mbusua ekpulike ekpulike, ɛbɔ ye nlɔma mɔɔ ɛli siane ko mɔɔ kɔ, kɛmɔ Ɛdɛnkɛma zele bɛ la, bɛ muala bɛ dodo le apenle ngoko abulanwiɔ nee nwiɔ.
Livaema di belamunli mralɛ mrenya agyakɛ anu
40-41Ɛdɛnkɛma zele Mosisi kɛ, “Yizilayɛ belamunli mralɛ mrenya kɔsɔɔti le me ɛdeɛ. Yemɔti kɛlɛ Yizilayɛ belamunli ralɛ nrenya biala mɔɔ ɛli siane ko mɔɔ kɔ la duma, noko akee mebava Livaema amuala a meayɛ me ɛdeɛ a. Medame a mele Ɛdɛnkɛma a. Eza mebava Livaema nlankɛ ne mɔ mɔɔ wɔ nlankɛ ne mɔ kɔsɔɔti anu la meayɛ me ɛdeɛ.” 42Yemɔti Mosisi dianle Yizilayɛma belamunli mralɛ mrenya kɔsɔɔti, kɛmɔ Ɛdɛnkɛma zele ye la, 43ɛbɔ ye nlɔma mɔɔ ɛli siane ko mɔɔ kɔ la, bɛ muala bɛ dodo le apenle ngoko abulanwiɔ nee nwiɔ, ɛya nwiɔ abulasuu nee nsa.
44Na Ɛdɛnkɛma zele Mosisi kɛ, 45“Ye Livaema ne maa bɛli Yizilayɛ belamunli mralɛ ne mɔ agyakɛ anu, na fa Livaema nlankɛ ne mɔ sie Yizilayɛma ɛdeɛ ne agyakɛ anu, na tu bɛ sie ahane maa me. Medame a mele Ɛdɛnkɛma a. 46Na kɛmɔ Yizilayɛma belamunli mralɛ mrenya ne mɔ zonle bo Livaema anwo zo menli ɛya nwiɔ abulasuu nee nsa la, ɔwɔ kɛ bɛkpɔne menli mɔɔ bo zolɛ la. 47Ɔwɔ kɛ bɛtua sonla ko biala ati dwɛtɛ fufule nnu, kɛmɔ bɛ ezukoa awolɛ ne mɔ de la. 48Fa ezukoa ɛhye maa Aalɔn nee ɔ mra mrenya ne mɔ.” 49Yemɔti Mosisi liele menli mɔɔ bole Livaema anwo zo la ɛkpɔnenlɛ ezukoa ne 50vile Yizilayɛ belamunli mralɛ mɔɔ bole zolɛ la ɛkɛ, ɔle dwɛtɛ fufule apenle ko, ɛya nsa abulasia nee nnu, 51na ɔvale ɔmanle Aalɔn nee ɔ mra mrenya ne mɔ, kɛmɔ Ɛdɛnkɛma zele Mosisi la.
Currently Selected:
Ɛdi 3: NB
Highlight
Copy
Compare
Share
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
