Ɛdi 27
27
Zilɔfɛhade amra mraalɛ ne mɔ
1Dwosefi wole Manasɛ, Manasɛ wole Meekɛ, Meekɛ wole Geleade, Geleade wole Hifɛ, yɛɛ Hifɛ wole Zilɔfɛhade. Zilɔfɛhade wole mralɛ mraalɛ ɛhye mɔ: Maala, Nowa, Hɔgela, Melekaa, yɛɛ Tɛza. 2Bɛhɔle Mosisi, Sɛlɛvolɛ Ɛlieza, mgbanyima ne mɔ, yɛɛ menli ne kɔsɔɔti anyunlu wɔ Ɛdɛnkɛma Ndanlɛ Sua ne anlenkɛ ne anloa bɛhɔhanle kɛ, 3“Egya anwo mralɛ mrenya yɛɛ ɔwule fienemgbole ne anu a. Ɔmboka Kɔla ɛdoavolɛma ne mɔ mɔɔ honle tiale Ɛdɛnkɛma la anwo, ɔdaye ye ɛtane ti a ɔwule a. 4Kɛmɔ yeanwo mralɛ mrenya la ati, ɛnee ɔwɔ kɛ egya duma minli ye abusua ekpulike ne anu ɔ? Egya anwo amra agyadeɛ ne, bɛva ye afoa nu ɛdeɛ bɛmaa yɛ.”
5Mosisi vale bɛ edwɛkɛ ne dole Ɛdɛnkɛma anyunlu. 6Na Ɛdɛnkɛma zele ye kɛ, 7“Zilɔfɛhade amra mraalɛ ne mɔ edwɛkɛ ne le fɔɔnwo, fa bɛ ze anwo amra ne agyadeɛ ne bie maa bɛ. Maa bɛ ze agyalilɛ ne ɛpɛ ɛli bɛ lɔ. 8Maa Yizilayɛma ɛde kɛ: Saa nrenya mɔɔ anwo ralɛ nrenya la wu a, ɔwɔ kɛ ɔ ra raalɛ di ye agya. 9Saa ɔnlɛ ralɛ raalɛ a, ɛnee fa ye agyadeɛ ne maa ɔ mediema mrenya. 10Saa ɔnlɛ ɔ mediema mrenya a, ɛnee fa ye agyadeɛ ne maa ɔ ze amediema mrenya. 11Saa ɔ ze ɛnlɛ mediema mrenya a, ɛnee fa ye agyadeɛ ne maa ye busuanli biala mɔɔ bikye ye kpalɛ kpalɛ la maa ɔyɛ ye agyadeɛ bɔkɔɔ. Ɛhye le mɛla maa Yizilayɛma kɔsɔɔti, kɛmɔ medame Ɛdɛnkɛma, meze Mosisi la.”
Bɛye Dwɔhyua kɛ ɔdi Mosisi agya
(Mɛla 31.1-8)
12 #
Mɛla 3.23-27; 32.48-52 Ɛdɛnkɛma zele Mosisi kɛ, “Fo Boka Abalem azo na nea azɛlɛ ne mɔɔ meva memaa Yizilayɛma la. 13Saa ɛnwu ye a ɛbazia wɔahɔ wɔ ɛkɛla nzi ɛ nee ɛ ze mɔ ahɔla, kɛmɔ ɛ diema nrenya Aalɔn hɔle la. 14Ɔboalekɛ bɛ mu nwiɔ bɛbulule me mɛla zo wɔ Zen fienemgbole ne anu. Mekɛ mɔɔ menli ne kɔsɔɔti dendɛle tiale me wɔ Mɛleba la, bɛkpole kɛ bɛnrɛmaa menli ne ɛnrɛnwu me tumi nwuanzanwuanza ne.” (Mɛleba le nzubula wɔ Keedɛhye mɔɔ wɔ Zen fienemgbole ne anu la.)
15Mosisi zɛlɛle Ɛdɛnkɛma kɛ, 16“Ɛdɛnkɛma Nyamenle, ngoane muala menle, mesɛlɛ wɔ, ye sonla maa ɔnlea menli ne anwo zo, 17mɔɔ kɛli bɛ nyunlu ɔ nee bɛ kɛhɔ, ɔ nee bɛ kɛra la, amaa menli ne anyɛ kɛ mboane mɔɔ ɛnlɛ neavolɛ la.”
18Na Ɛdɛnkɛma zele Mosisi kɛ, “Ye Nɛn ara Dwɔhyua, ɔle sonla mɔɔ sunsum ne wɔ ye nu. Fa ɛ sa gua ɔ ti zo. 19Maa ɔgyinla Sɛlɛvolɛ Ɛlieza nee menli ne kɔsɔɔti anyunlu na kpakye nu ka maa bɛde kɛ yemɔ yɛɛ ɔbali ɛ gyakɛ anu a. 20Fa wɔ tumi ne bie maa ye, amaa Yizilayɛma kɔsɔɔti ayɛ tieyɛ amaa ye. 21Na ɔbahɔ Sɛlɛvolɛ Ɛlieza anyunlu na Ɛlieza ava Yulem nee Tɛmem abiza ɔ ti amaa ye, amaa saa ɔse bɛ kɛ bɛhɔ a, bɛahɔ, ɔse bɛ kɛ bɛrɛla a, bɛara. Ɛlieza bahile Dwɔhyua nee Yizilayɛma kɔsɔɔti adenle.” 22Na Mosisi yɛle mɔɔ Ɛdɛnkɛma zele ye la. Ɔmanle Dwɔhyua gyinlanle Sɛlɛvolɛ Ɛlieza nee ɛlɔne ne anyunlu, 23ɔvale ɔ sa ɔguale ɔ ti zo na ɔbɔle ye nolo kɛ yemɔ yɛɛ ɔle ye agyadivo a, kɛmɔ Ɛdɛnkɛma zele ye la.
Currently Selected:
Ɛdi 27: NB
Highlight
Copy
Compare
Share
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
