Ɛdi 25
25
Yizilayɛma wɔ Piyɔ
1Mɔɔ Yizilayɛma yɛle azokoɛleɛ wɔ Akasea Bɔnza la, Yizilayɛ mrenya bɔle ɔ bo kɛ bɛ nee Mowabe mraalɛ bɔ adwɔmane ɛbɛla. 2Mowabe mraalɛ ne mɔ dole ɛsalɛ vɛlɛle Yizilayɛ mrenya wɔ bɛ bozonle Beeyale ne azubɔlɛ ɛkponledolɛ bo. Yizilayɛma nee bɛ lile na bɛbɔle bɛ ti aze bɛmanle bɛ bozonle Beeyale ne. 3Yemɔti Yizilayɛma vale bɛ nwo wulale bozonle Beeyale mɔɔ wɔ Piyɔ la ɛzonlenlɛ nu. Na Ɛdɛnkɛma vale bɛ nwo ɛya 4na ɔzele Mosisi kɛ, “Fa Yizilayɛ mgbanyima ne mɔ kɔsɔɔti na kendɛhenda bɛ ewia ne anu maa bɛwu, amaa medame Ɛdɛnkɛma me ɛya kpole ne aye Yizilayɛma anwo zo.” 5Na Mosisi hanle hilele Yizilayɛ mgbanyima ne kɛ, “Awie biala ɛhu ye menli mɔɔ wɔ ye abusua ekpunli ne anu, mɔɔ ɛzonle Piyɔ bozonle Beeyale la.”
6Yizilayɛma ne mɔ ko vale Medea raalɛ rawolole ye ndanlɛ sua ne anu wɔ Mosisi nee menli ne kɔsɔɔti anye zo, wɔ mekɛ mɔɔ ɛnee bɛlɛsu wɔ Ɛdɛnkɛma Ndanlɛ Sua ne anyunlu la. 7Mɔɔ Sɛlɛvolɛ Aalɔn ara Ɛlieza ara Fenɛhaze nwunle nyɛleɛ mɔɔ Yizilayɛnli ne nee Medea raalɛ ne ɛlɛyɛ la, ɔvi menli ne avinli ɔdwazole. Ɔvale atwɛ 8ɔhɔle nrenya ne nee raalɛ ne anwo zo wɔ ndanlɛ sua ne anu, na ɔwowɔle bɛ ɔhunle bɛ. Ɛhye manle ewulenzane mɔɔ rale Yizilayɛma anwo zo la gyakyile, 9noko ɛnee ewulenzane ne ɛlumua ɛhu menli apenle ngoko abulanwiɔ nee nna.
10Na Ɛdɛnkɛma zele Mosisi kɛ, 11“Ɔlua mɔɔ Sɛlɛvolɛ Aalɔn ara Ɛlieza ara Fenɛhaze ɛyɛ la ati, megyakyi Yizilayɛma anwo ɛya ne mɔɔ menvale la anu. Ɔliele me ti nungule ɔhwenle, yemɔti a meambɔ Yizilayɛma abo zo wɔ me ɛyavalɛ nu a. 12Zɔhane ati ka kile ye kɛ me nee ye ɛkyekye anzonudwolɛ ngyekyeleɛ; 13ɔdaye nee ɔ bo zo amra bayɛ sɛlɛvolɛma mɔɔ ɛmbɔ aze ɛlɛ a, ɔboalekɛ ɔhwenle ye Nyamenle ne ati nungule ɔvale ɔkpɔdale Yizilayɛma ati.”
14Bɛfɛlɛ Yizilayɛnli ne mɔɔ bɛhunle ye nee Medean raalɛ ne la Zemelae. Ɔ ze a le Seelu mɔɔ le Semɛyɔn abusua ekpunli ne anu abusua ekpulike ko abusua kpanyinli la. 15Bɛfɛlɛ Medean raalɛ ne noko Kɔzobae. Ɔ ze Zɛɛ le Medean mbusua ekpulike ne mɔ anu ko abusua kpanyinli.
16Na Ɛdɛnkɛma zele Mosisi kɛ, 17“Kɔteta Medeanema na ku bɛ, 18ɔboalekɛ bɛyɛle wɔ ɛtane kɛ bɛbɛlɛbɛlale wɔ wɔ Piyɔ, yɛɛ Kɔzobae, Medean belemgbunli ne ara raalɛ ne mɔɔ bɛhunle ye wɔ Piyɔ wɔ ewulenzane mekɛ ne anu la ati.”
Currently Selected:
Ɛdi 25: NB
Highlight
Copy
Compare
Share
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
