Ɛdi 23
23
1Beelam hanle hilele Beelake kɛ, “Sisi azukponle nsuu wɔ ɛke maa me, na fa nlankɛ nyinli nsuu nee mboane nyinli nsuu bɛla.”
2Beelake yɛle kɛmɔ Beelam hanle la. Na Beelake nee Beelam hunle ɛnlankɛ nyinli ko nee boane nyinli ko, wɔ azukponle ko biala azo. 3Akee Beelam hanle hilele Beelake kɛ, “Gyinla wɔ ɛyelalɛ azubɔdeɛ ye anwo. Mekɔ meahɔnlea saa Ɛdɛnkɛma nee me kɛyia a, na edwɛkɛ biala mɔɔ ɔkɛha la, mebaraha meahile wɔ.” Yemɔti ɔdaye ɔ ngomekye ɔhɔle boka bie azo, 4na Nyamenle nee ye yiale ɛkɛ. Beelam hanle hilele ye kɛ, “Mesisi azukponle nsuu ne mɔ na mehu ɛnlankɛ nyinli ko nee boane nyinli ko wɔ ko biala azo.”
5Na Ɛdɛnkɛma vale nrɛlaleɛ manle Beelam na ɔzele ye kɛ, “Sia kɔ Beelake anwo lɔ na ka nrɛlaleɛ ɛhye kile ye.” 6Yemɔti ɔziale ɔhɔle na ɔhɔdole kɛ Beelake nee Mowabe mgbanyima ne mɔ tɛgyi ye ɛyelalɛ azubɔdeɛ ne anwo.
7Beelam kpakyele nu wienyi hanle Nyamenle nrɛlaleɛ ne:
ɔse, “Beelake, Mowabe belemgbunli ne ɛrava me
wɔ Selea aduduleɛ awoka ne mɔ azo.
Ɔzele me kɛ, ‘Bɛla na bawa Gyekɔbo abo zo amra ye amonle;
Bɛla na bahye Yizilayɛma sili.’
8Kɛ ɔkɛyɛ na meawa mɔɔ Nyamenle ɛtɛwale ye amonle la
amonle ɛ,
Kɛ ɔkɛyɛ na meakpo mɔɔ Ɛdɛnkɛma ɛtɛkpole ye la ɛ?
9Megyi boka ne azo a, menwu bɛ;
Megyi awoka ne mɔ azo a, me nye gyi bɛ nwo.
Bɛle maanle mɔɔ bɛ ngome a bɛde a;
Bɛnva bɛ nwo bɛndo maanle maanle ne mɔ anwo.
10Nwane a kɛhola Gyekɔbo abo zo amra tia;
Anzɛɛ saa ɔkyɛ bɛ nu nna bɔbɔ a ɔkɛhola bɛ tia a?
Maa menwu tenlenenli ewule,
Maa me awieleɛ ɛyɛ kɛ ye ɛdeɛ ne la!”
11Na Beelake bizale Beelam kɛ, “Duzu debie a wɔyɛ wɔmaa me la? Menvale wɔ membale kɛ ɛrahye me kpɔvolɛma ye sili, na mɔɔ wɔyɛ la kile kɛ wɔyila bɛ.”
12Beelam buale ye kɛ, “Mɔɔ Ɛdɛnkɛma kɛha kɛhile me la, yɛɛ meka a.”
Beelam Nyamenle nrɛlaleɛ ɛhanlɛ mɔɔ tɔ zo nwiɔ
13Na Beelake hanle hilele Beelam kɛ, “Maa yɛhɔ ɛleka fofolɛ, mɔɔ yemɔ ɛbanwu Yizilayɛma ne ekyi bie la. Gyinla ɛkɛ ne na kye bɛ sili.” 14Ɔvale ye ɔhɔle Zofem fienemgbole nu wɔ Pesega Boka ne azo. Ɔsisile azukponle nsuu wɔ ɛkɛ na ɔhunle ɛnlankɛ nyinli ko nee boane nyinli ko wɔ azukponle ko biala azo.
15Beelam hanle hilele Beelake kɛ, “Gyinla wɔ ɛyelalɛ azubɔdeɛ ye anwo, na mekayia Ɛdɛnkɛma wɔ nehane.”
16Ɛdɛnkɛma yiale Beelam. Ɔvale nrɛlaleɛ ɔmanle ye kɛ ɔraha ɔhile Beelake. 17Yemɔti ɔziale na ɔradole Beelake kɛ ɔ nee Mowabe mgbanyima ne mɔ tɛgyi ye ɛyelalɛ azubɔdeɛ ne anwo. Beelake bizale ye edwɛkɛ mɔɔ Ɛdɛnkɛma hanle la. 18Na Beelam kpakyele nuhua wienyi hanle Nyamenle nrɛlaleɛ ɛhye.
Ɔse, “Beelake, dwazo na tie;
Zepɔ ara nrenya, tie me.
19Nyamenle ɛnle kɛ sonla na yeabɔ adalɛ,
Ɔnle kɛ dasanli mɔɔ yɛ na yeavu ɔ nwo.
Ye ɛwɔkɛ biala, ɔdi zo;
Ɔka, na ɔyɛ zɔ.
20Yeze me kɛ menyila,
Saa Nyamenle yila a, mengola menzɛkye ye.
21Menwu mesie kɛ kenle bie, ngyegyelɛ
Anzɛɛ anwubɛnyunlu ɛnrɛdo Yizilayɛ.
Ɛdɛnkɛma bɛ Nyamenle ne nee bɛ lua,
Bɛbɔ ye nolo kɛ ɔle bɛ belemgbunli.
22Nyamenle ɛye bɛ ɛvi Yigyibiti;
Ɔko ɔmaa bɛ kɛ ɛnlankɛ kokonyinli.
23Sili ɛngola ɛngye Gyekɔbo,
Mizemiza ɛngola Yizilayɛ;
Na menli baha ye wɔ Yizilayɛma anwo kɛ,
‘Nea mɔɔ Nyamenle ɛyɛ a!’
24Yizilayɛ maanle ne le kɛ awenade belɛ,
Yemaa ɔ nwo zo kɛ awenade;
Ɔnla fee, kyesɛ yeli mɔɔ yehye ye la,
Na yenlo mɔɔ yehu ye la mogya.”
25Na Beelake hanle hilele Beelam kɛ, “Saa wɔanwa Yizilayɛma amonle a ɛnee mmayila bɛ!”
26Beelam buale ye kɛ, “Meanga meangile wɔ kɛ mɔɔ Ɛdɛnkɛma kɛha la, yemɔ ala a mebaha a?”
Beelam Nyamenle nrɛlaleɛ ɛhanlɛ mɔɔ tɔ zo nsa
27Beelake hanle kɛ, “Maa yɛhɔ, me nee wɔ kɔ ɛleka fofolɛ. Ɛkɛ ne, wɔannea a Nyamenle kɛmaa ɛkɛwa bɛ amonle ɛkɛmaa me.” 28Yemɔti ɔvale Beelam ɔhɔle Piyɔ Boka ne mɔɔ ɛgyi zolɛ a ɛnwu ɛsɛlɛ ne la azo. 29Beelam hanle hilele ye kɛ, “Sisi azukponle nsuu wɔ ɛkɛ maa me na bɛlɛ me nlankɛ nyinli nsuu yɛɛ mboane nyinli nsuu.” 30Beelake yɛle mɔɔ Beelam hanle hilele ye la, na ɔhunle ɛnlankɛ nyinli ko nee boane nyinli ko wɔ azukponle ne mɔ ko biala azo.
Currently Selected:
Ɛdi 23: NB
Highlight
Copy
Compare
Share
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
