Ɛdi 22
22
Mowabe belemgbunli soa yeamaa bɛahɔva Beelam
1Yizilayɛma dule denrɛle bieko na bɛrayɛle azokoɛleɛ wɔ Mowabe fienemgbole ne mɔɔ wɔ Dwɔdan aduduleɛ afoa nu na ɔ nee Gyɛleko bɛ nye bɔ zo la anu.
2Mɔɔ Mowabe belemgbunli ne, Zepɔ ara nrenya Beelake dele mɔɔ Yizilayɛma ɛva ɛyɛ Amɔlema nee kɛ Yizilayɛma dodo si de la, ye ahonle dule na 3ɔ nee ye menli ne mɔ kɔsɔɔti bɛ nwo mɔra dule. 4Mowabema hanle hilele Medean mgbanyima ne mɔ kɛ, “Menli ɛwolaa ɛhye mɔ bali debie biala mɔɔ ɛbɔ yɛ ɛyia la kɛ ɛnlankɛ nyinli di ndile la.” Yemɔti Belemgbunli Beelake 5zoanle menli kɛ bɛhɔva Biyɔ ara nrenya Beelam mɔɔ wɔ Pito, mɔɔ zua Azule Yufileti, mɔɔ wɔ Amawo azɛlɛ zo la. Bɛvale nrɛlaleɛ ɛhye bɛhɔmanle ye: “Memaa wɔade kɛ maanle mumua vi Yigyibiti ɛdu bɛ bo ɛra; bɛ dodo ɛva azɛlɛ ye amuala na bɛradɛnla yɛ kandiba ɛke. 6Bɛzonle bɛtɛla yɛ, yemɔti, mesɛlɛ wɔ, bɛla na bahye bɛ sili maa me. Wɔannea a ɔkɛyɛ kɛ menwɔli bɛ nwo zo konim na meavoa bɛ meavi azɛlɛ ye azo. Ɔluakɛ meze kɛ mɔɔ ɛkɛyila ye la, bɛyila ye, yɛɛ mɔɔ ɛkɛwa ye amonle la, munzule ka ye.”
7Yemɔti Mowabe nee Medean mgbanyima ne mɔ vale silihyelɛ ne anwo ezukoa bɔle bɛ nwo, na bɛhɔle Beelam ɛkɛ bɛhɔhanle Beelake nrɛlaleɛ ne bɛhilele ye. 8Beelam hanle hilele bɛ kɛ, “Bɛla ɛke ɛnɛ nɔe, ɛhyema mebaha edwɛkɛ biala mɔɔ Ɛdɛnkɛma kɛha kɛhile me la meahile bɛ.” Yemɔti Mowabe mgbanyima ne mɔ nee Beelam lale.
9Nyamenle rale Beelam anwo ɛkɛ na ɔbizale ye kɛ, “Nwane mɔ a nee wɔ wɔ ɛke la?”
10Beelam buale Nyamenle kɛ, “Zepɔ ara nrenya Beelake, Mowabe belemgbunli ne ɛzoa ɛmaa bɛraha bɛhile me kɛ 11maanle mumua vi Yigyibiti ɛrava ye aze na bɛva maanle ne amuala. Ɔkpondɛ kɛ meyɛ nwolɛ debie, amaa ɔ nee bɛ aho na yeadu bɛ ye maanle ne anu.”
12Nyamenle zele Beelam kɛ, “Ɛ nee bɛ mmakɔ; mmayɛ nwolɛ ɛhwee, ɔluakɛ bɛyila bɛ.”
13Yemɔti Beelam dwazole nwonlomɔ ne na ɔhanle ɔhilele mgbanyima ne mɔɔ Beelake zoanle bɛ la kɛ, “Bɛzia bɛhɔ bɛ sua zo, ɔluakɛ Ɛdɛnkɛma se me nee bɛ mmakɔ.” 14Yemɔti Mowabe mgbanyima ne mɔ ziale hɔle, na bɛhɔhanle bɛhilele Beelake kɛ, “Beelam ɛkpo kɛ ɔ nee yɛ ɛnrɛra.”
15Eza Beelake zoanle mgbanyima fofolɛ, mgbanyima mɔɔ le titile na eza bɛ nwo zonle tɛla alumua mgbanyima ne mɔ la. 16Bɛhɔle Beelam ɛkɛ na bɛhɔzele ye kɛ, “Zepɔ ara nrenya Beelake se: Mmamaa debie biala si wɔ aze fee kɛ ɛkɛra! 17Mebamaa wɔ ahyɛlɛdeɛ kpole kpalɛ, yɛɛ debie biala mɔɔ ɛkɛze me la, mebayɛ. Mesɛlɛ wɔ, bɛla na bahye menli ne mɔ sili maa me.”
18Na Beelam buale kɛ, “Saa Beelake fa dwɛtɛ fufule nee ezukoa nvutuke mɔɔ wɔ ye suakunlu ɛkɛ ne la kɔsɔɔti yeamaa me bɔbɔ a, wɔ adenle biala anu, menrɛdu Ɛdɛnkɛma me Nyamenle ne anloa menrɛdo ɛlɛ. 19Mebodo bɛ, bɛla ɛke ɛnɛ nɔe amaa meade saa Ɛdɛnkɛma kɛha edwɛkɛ ngakyile bie kɛhile me a.”
20Na nɔe ne, Nyamenle rale Beelam anwo ɛkɛ na ɔzele ye kɛ, “Saa menli ne ɛraha ɛhile wɔ kɛ ɛmaa bɛhɔ a, ɛnee boɔboa ɛ nwo ɛ nee bɛ ɛhɔ, na mɔɔ menwɔha menwɔhile wɔ la, yemɔ ala yɛɛ yɛ a.” 21Yemɔti aleɛ hyenle la, Beelam vole ye asoaso ne azo na ɔ nee bɛ hɔle.
Beelam nee ye asoaso ne
22Na Nyamenle vale ɛya kɛ Beelam nee bɛ ɛlɛkɔ a. Mɔɔ Beelam de ye asoaso ne azo ɛlɛkɔ, na ye sonvolɛma nwiɔ ne li ɔ nzi la, Ɛdɛnkɛma soanvolɛ ragyinlanle ademgbole ne anu duale adenle ne. 23Mɔɔ asoaso ne nwunle Nyamenle soanvolɛ ne kɛ ɔgyi adenle ne anu na yehwe konle dadeɛ la, ɔbɔle ɔ ti kpɔkɛ nu. Beelam finle asoaso ne na ɔmanle ɔrale adenle ne anu. 24Akee Ɛdɛnkɛma soanvolɛ ne hɔgyinlanle vanye ɛya avule nwiɔ avinli, ɛleka mɔɔ adenle ne kye na bane wɔ ye foa nee ye foa la. 25Mɔɔ asoaso ne nwunle Ɛdɛnkɛma soanvolɛ ne la, ɔhɔluale bane ne anwo kpalɛ na ɔmianle Beelam agyakɛ wɔ bane ne anwo. Na Beelam eza finle asoaso ne. 26Ɛdɛnkɛma soanvolɛ ne eza hɔle ɔ nyunlu na ɔhɔgyinlanle ɛleka mɔɔ adenle ne le feɔ mɔɔ ɛfa ye foa ko ɛleka biala, bɛne zo anzɛɛ fema zo a ɔnyɛ boɛ la. 27Mɔɔ asoaso ne nwunle Ɛdɛnkɛma soanvolɛ ne la, ɔbutule. Beelam vale ɛya kpole kpalɛ na ɔvale ye kpɔma ne ɔfinle asoaso ne. 28Akee Ɛdɛnkɛma dele asoaso ne anloa manle ɔdendɛle ɔhanle ɔhilele Beelam kɛ, “Duzu bɔbɔ yɛɛ meyɛ, mɔɔ yemɔti wɔfi me fane nsa ɛhye a?”
29Beelam buale asoaso ne kɛ, “Ɔboalekɛ wɔyɛ me koasea! Saa melɛ dadeɛ a anrɛɛ mehu wɔ”
30Na asoaso ne buale Beelam kɛ, “Na tɛ asoaso ko ye ala mɔɔ sumunli wɔ ɛbɛlabɔlɛ nu wɔdɛnla zolɛ toonwo la a le me ɔ? Asoo meyɛ wɔ zɛhae ɛlɛ?”
Beelam buale kɛ, “Kyɛkyɛ.”
31Akee Ɛdɛnkɛma manle Beelam anye zo dele, ɔnwunle kɛ Ɛdɛnkɛma soanvolɛ gyi adenle ne anu na yehwe konle dadeɛ. Beelam bɔle ɔ ti aze na ɔbutule ɔ nye aze. 32Ɛdɛnkɛma soanvolɛ ne bizale ye kɛ, “Duzu ati a wɔfi asoaso ye fane nsa ɛ? Mera kɛ mebazi wɔ aze, ɔboalekɛ me nye ɛnlie wɔ adenle ne mɔɔ ɛlɛtu la anwo. 33Wɔ asoaso ne nwunle me na ɔhwenle ahane fane nsa. Saa yeanyɛ ye zɔhane a anrɛɛ mehu wɔ na megyakyi yemɔ.”
34Beelam buale kɛ, “Meyɛ ɛtane. Menze kɛ ɛgyi adenle ne anu kɛ ɛsi me aze. Na kɛkala, saa ɛnea na ɔnle kpalɛ kɛ mekɔ a, ɛnee mesia meahɔ sua nu.”
35Na Nyamenle soanvolɛ ne hanle kɛ, “Ɛ nee menli ne ɛhɔ, na mɔɔ menwɔha menwɔhile wɔ la, yemɔ ala a ka a.” Yemɔti Beelam nee menli ne hɔle.
Beelake die Beelam
36Mɔɔ Beelake dele kɛ Beelam ɛlɛba la, ɔhɔyiale ye adenle wɔ Aale; Aale le suakpole mɔɔ wɔ Mowabe ɛweɛne zo wɔ Azule Anɔn ne anloa. 37Beelake bizale Beelam kɛ, “Menzoanle kɛ bɛrava wɔ na duzu ati yɛɛ wɔamba a? Anzɛɛ ɛdwenle kɛ menrɛhola wɔ kakɛ tua ɔ?”
38Beelam buale Beelake kɛ, “Mera, anzɛɛ metɛbale ɔ? Na kɛkala, duzu tumi a melɛ a? Mɔɔ Ɛdɛnkɛma kɛha kɛhile me la, yemɔ yɛɛ meka a.” 39Yemɔti Beelam nee Beelake hɔle Huzo sua zo. 40Beelake hunle nlankɛ nee mboane na ɔvale nane ne bie ɔmanle Beelam nee mgbanyima mɔɔ nee ye lua la.
Beelam Nyamenle nrɛlaleɛ ɛhanlɛ mɔɔ lumua
41Aleɛ hyenle la Beelake vale Beelam hɔle Beemo Beeyale. Beelam gyi ɛkɛ a ɔnwu Yizilayɛma ne bie mɔ.
Currently Selected:
Ɛdi 22: NB
Highlight
Copy
Compare
Share
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
