Sɛlɛ 24
24
Ahɛnlaneɛ ne mɔ boɛ ɛnleanlɛ
(Ade 27.20-21)
1Ɛdɛnkɛma zele Mosisi kɛ, 2“Maa Yizilayɛma ɛva nwole anye bɔkɔbɔkɔ mɔɔ bɛhwihwi bɛvi ɔlivi ma nu la bɛrɛla bɛmaa ɛva ɛgua ahɛnlaneɛ ne mɔ anu, amaa bɛagyinla zolɛ dahuu. 3Aalɔn banlea ayɛ ahɛnlaneɛ ne mɔ boɛ na yeasosɔ bɛ nɔsolɛ biala, amaa bɛagyinla zolɛ toonwo alehyenlɛ. Ɔbazɔ yeazie mgbɛnu ne anzi, wɔ Ngyekyeleɛ Ɛlɛka ne mɔɔ gyi Nwuanzanwuanza Nu Nwuanzaanwu Ɛleka ne la anyunlu. Ɛhye le mɛla dahuu maa awolɛndoazo muala. 4Aalɔn banlea ahɛnlaneɛ ne mɔ mɔɔ gyigyi ezukoa nvutuke tagyee kɛnlaneɛ baka ne azo la boɛ, na yeamaa bɛazɔ bɛagyinla zolɛ dahuu wɔ Ɛdɛnkɛma anyunlu ɛkɛ ne.
Kpanwo ne mɔɔ bɛva bɛbɔ azu bɛmaa Nyamenle la
5 #
Ade 25.30
“Fa esamo kilo bulu nee nwiɔ fɔtɔ to kpanwo ahunguma bulu nee nwiɔ. 6Gua bɛ ɛhonlone nwiɔ, nsia nsia, wɔ ezukoa nvutuke tagyee ɛkponle ne azo. 7Fa ɛyɛlɛ evuanlɛ gua ɛhonlone ko biala anwo fa kile kɛ ɔle aleɛ mɔɔ bɛva bɛbɔ azu bɛmaa Ɛdɛnkɛma a. 8Ɛnwomenlelielɛ Kenle biala, Aalɔn banlea ava kpanwo agyinla Yizilayɛma agyakɛ anu asolo bɛ ɛhonlone nwiɔ wɔ Ɛdɛnkɛma anyunlu. Ɛhye le ngyekyeleɛ mɔɔ kyekye Yizilayɛma dahuu a. 9Kpanwo zɔhane mɔ le Aalɔn nee ɔ mra mrenya ne mɔ ɛdeɛ, yɛɛ ɔwɔ kɛ bɛdi ye wɔ ɛleka mɔɔ le nwuanzanwuanza la, ɔboalekɛ ɔle azubɔdeɛ mɔɔ bɛyela bɛmaa Ɛdɛnkɛma la anu bie Ɔle nwuanzanwuanza kpalɛ kpalɛ na dahuu ɔle sɛlɛvolɛma ne mɔ ɛdeɛ.”
Ndeanlɛ mɔɔ fɛta la anwo ndonwo
10-11Nrenya bie wɔ Yizilayɛma avinli, ɔ ze le Yigyibitinli, yɛɛ ɔ nli le Yizilayɛnli. Bɛfɛlɛ ɔ nli Hyɛlomete. Hyɛlomete ɔ ze a le Debelae, mɔɔ vi Dan abusua ekpunli ne anu la. Ɔrale kɛ kenle ko nrenya ne nee Yizilayɛnli bie nyianle butule; nrenya ne bɔle Nyamenle sasa, na bɛhyele ye bɛhɔmanle Mosisi. 12Bɛvale ye bɛziele kɛ bɛkendɛ edwɛkɛ mɔɔ Ɛdɛnkɛma baha wɔ nwolɛ la.
13Ɛdɛnkɛma zele Mosisi kɛ, 14“Bɛva ahenle ne mɔɔ bɔle sasa ne la bɛvinde azokoɛleɛ ne kandiba lɔ, na bɛdabɛ mɔɔ bɛdele ye sasabɔlɛ ne la, biala ɛva ɔ sa ɛdo nrenya ne anwoma azo ɛli daselɛ, na akee ɛlɔne ne amuala ɛzi ye awolɛ ɛhu ye. 15Akee ka kile Yizilayɛma kɛ: Awie biala mɔɔ kɛbɔ ye Nyamenle sasa la, ɔdaye ye ɛtane zo ye. 16Awie mɔɔ kɛbɔ Nyamenle sasa la, bɛbahu ye. Menli ne amuala bazi ye awolɛ ahu ye. Saa ɔle ɛyɛvolɛ o, ɔle Yizilayɛnli o, ɔwɔ kɛ bɛku ye kɛ yebɔ Nyamenle sasa a.
17“Awie biala mɔɔ kɛhu sonla la, ɔwɔ kɛ bɛku ye, 18yɛɛ awie biala mɔɔ kɛhu awie ayɛmoa la, ɔbazie ɔ bo zo. Ngyehyɛlɛ ne a le kɛ, bɛfa ngoane bɛsie ngoane bo zo.
19“Saa awie boda ɔ gɔnwo a, ɔwɔ kɛ bɛboda ye bie, kɛ ɔzile ɔbodale ye ala la. 20Ɛbu awie bowule a, ɔwɔ kɛ bɛbu ɛdawɔ wɔ bowule nu, ɛtu awie anye a, ɔwɔ kɛ bɛtu ɛ nye, yɛɛ ɛtu egyele a, ɔwɔ kɛ bɛtu ɛ gye. Kɛ ɛkɛzi ɛkɛboda ahenle la, zɔhane ala yɛɛ ɔwɔ kɛ bɛboda ɛdawɔ noko a. 21Awie mɔɔ kɛhu ayɛmoa la, ɔwɔ kɛ ɔsie ɔ bo zo, yɛɛ awie mɔɔ kɛhu sonla la, ɔwɔ kɛ bɛku ye. 22#Ɛdi 15.16 Mɛla ko ala a wɔ ɛkɛ maa Yizilayɛnli nee ɛyɛvolɛ mɔɔ de Yizilayɛma avinli la a, ɔluakɛ medame a mele Ɛdɛnkɛma bɛ Nyamenle ne a.”
23Yemɔti Mosisi hanle mɛla ne amuala hilele Yizilayɛma amuala. Bɛvale nrenya ne mɔɔ bɔle sasa ne la bɛhɔle azokoɛleɛ ne kandiba ne na bɛzile ye awolɛ. Yizilayɛma yɛle mɔɔ Ɛdɛnkɛma luale Mosisi anwo zo hanle hilele bɛ la.
Currently Selected:
Sɛlɛ 24: NB
Highlight
Copy
Compare
Share
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
