Sɛlɛ 23
23
Nyamenlezonlenlɛ Ɛvoyia ne mɔ
1Ɛdɛnkɛma zele Mosisi kɛ, 2“Ka kile Yizilayɛma kɛ, Ɛdɛnkɛma ɛvoyia ne mɔ, mɔɔ le medame me ɛvoyia ne mɔ mɔɔ le nwuanzanwuanza la a le ɛhye mɔ. 3#Ade 20.8-10; 23.12; 31.15; 34.21; 35.2; Mɛla 5.12-14 Bɛbayɛ gyima kenle nsia; kenle nsuu ne le Ɛnwomenlelielɛ Kenle mɔɔ ɔwɔ kɛ bɛfa bɛdie bɛ ɛnwomenle a Ɔle kenle mɔɔ ɔwɔ kɛ bɛyia nu bɛyɛ ɛzonlenlɛ nwuanzanwuanza Ɔnle kɛ bɛyɛ gyima biala wɔ nu. Ɔle Ɛdɛnkɛma Ɛnwomenlelielɛ Kenle wɔ ɛleka biala mɔɔ bɛwɔ la. 4Akee Ɛdɛnkɛma ɛvoyia ne mɔ mɔɔ ɔwɔ kɛ bɛfa bɛsonle ye la ɛne, bɛ mekɛ dwu a ɔwɔ kɛ ɛbɔ ye nolo ɛkile bɛ.
Akpabɛnwo nee Angye Ɛvoyia ne
(Ɛdi 28.16-25)
5 #
Ade 12.1-13; Mɛla 16.1-2 “Siane ne mɔɔ lumua ɛvolɛ ne anu la, ye kenle ne mɔɔ tɔ zolɛ bulu nee nna la nɔsolɛ nu, le Ɛdɛnkɛma Akpabɛnwo. 6#Ade 12.14-20; 23.15; 34.18; Mɛla 16.3-8 Kenle bulu nee nnu ne le Angye Ɛvoyia maa Ɛdɛnkɛma. Ɔwɔ kɛ bɛdi kpanwo mɔɔ mgbɔvonle ɛnle nu la kenle nsuu. 7Kenle ne mɔɔ lumua la, bɛbayia nu bɛazonle; bɛmmayɛ gyima ɛsesebɛ biala. 8Bɛbava azubɔdeɛ bɛara bɛamaa bɛayela bɛabɔ azu bɛamaa Ɛdɛnkɛma toonwo kenle nsuu. Kenle nsuu ne azo bɛbayia nu bɛazonle; bɛnrɛyɛ gyima ɛsesebɛ kenle ko ne.
9-10“Saa bɛba azɛlɛ ne mɔɔ Ɛdɛnkɛma ɛlɛfa amaa bɛ la azo na bɛbu bɛ abɛlɛ a, bɛva mɔɔ bɛkɛlumua bɛkɛbu la bɛhɔmaa sɛlɛvolɛ ne. 11Sɛlɛvolɛ ne bado bɛ azubɔdeɛ ne mɔ ehono abɔ ehono azu amaa Ɛdɛnkɛma, amaa bɛazɔ ɔ nye. Sɛlɛvolɛ ne babɔ azu zɔhane Ɛnwomenlelielɛ Kenle ne ye alehyenlɛ nu. 12Kenle mɔɔ bɛbɔ bɛ alumua bɛyɔba ehono azu ne la, ɔwɔ kɛ bɛfa boane nyinli mɔɔ ɛli ɛvolɛ ko na ɔ nwo ɛnlɛ dɛne biala la bɛbɔ ɛyelalɛ azu bɛmaa Ɛdɛnkɛma. 13Ma azubɔdeɛ mɔɔ boka nwo la, ɔwɔ kɛ ɔyɛ esamo kilo nwiɔ mɔɔ bɛva nwole bɛfɔtɔ la. Ɔwɔ kɛ bɛfa bɛbɔ ɛyelalɛ azu bɛmaa Ɛdɛnkɛma, ye evuanlɛ sɔ Ɛdɛnkɛma anye. Nza azubɔdeɛ ne noko ɔwɔ kɛ yɛ nwanye litili ko. 14Mekɛ ne anu ɔnle kɛ bɛdi kpanwo anzɛɛ ma ngyehye, ma amolɛ anzɛɛ ma ndondo, kɔkpula mekɛ mɔɔ bɛkɛva bɛ azubɔdeɛ ne mɔ bɛkɛrɛlɛ Ɛdɛnkɛma la. Ɛhye le mɛla maa bɛ wɔ awolɛndoazo kɔsɔɔti anu wɔ ɛleka biala mɔɔ bɛwɔ la.
Bɛyɔba Ɛvoyia ne
(Ɛdi 28.26-31)
15 #
Ade 23.16; 34.22; Mɛla 16.9-12 “Akee bɛdia dapɛne nsuu; bɛdia bɛvi Ɛnwomenlelielɛ Kenle ne mɔɔ bɛvale bɛ alumua bɛyɔba ne bɛbɔle ehono azu ne la alehyenlɛ nu. 16Saa bɛtia bɛfi Ɛnwomenlelielɛ Kenle ne alehyenlɛ nu a, ɔle kenle abulanlu; akee bɛbɔ ma fofolɛ bɛyɔba azu bɛmaa Ɛdɛnkɛma. 17Bɛva kpanwo ahunguma nwiɔ mɔɔ bɛva esamo kilo nwiɔ a bɛyɛ la bɛvi sua nu bɛrɛla bɛrabɔ ehono azu bɛmaa Ɛdɛnkɛma Ɔwɔ kɛ bɛfa mgbɔvonle bɛwula esamo ne anu na bɛado, na bɛva bɛyɛ ma mɔɔ lumua la azubɔdeɛ bɛmaa Ɛdɛnkɛma. 18Akee bɛva mboane nsuu mɔɔ ko biala ɛli ɛvolɛ ko na bɛ nwo ɛnlɛ dɛne la, ɛnlankɛ egyegyebaa ko, yɛɛ mboane nwiɔ bɛrɛla. Bɛbava bɛayɛ ɛyelalɛ azubɔdeɛ bɛaboka ma nee nwanye azubɔlɛ ninyɛne ne mɔ bɛayela bɛ bɛabɔ azu bɛamaa Ɛdɛnkɛma; ye evuanlɛ sɔ Ɛdɛnkɛma anye. 19Eza bɛbava abɔnkye nyinli ko bɛayɛ ɛtane azubɔdeɛ, yɛɛ mboane nyinli nwiɔ bɛayɛ anzonudwolɛ azubɔdeɛ. 20Sɛlɛvolɛ ne bava bɛ muala aboka kpanwo ne mɔɔ le bɛyɔba mɔɔ lumua la nee mboane nyinli nwiɔ ne anwo yeado bɛ ehono yeabɔ azu yeamaa Ɛdɛnkɛma. Bɛle ahyɛlɛdeɛ mɔɔ sonle bolɛ maa sɛlɛvolɛma ne yɛɛ ɔle azubɔdeɛ nwuanzanwuanza ɔmaa Ɛdɛnkɛma. 21Kenle ko zɔhane ɔwɔ kɛ bɛbɔ nolo, bɛyia bɛyɛ nzɛlɛlɛ; ɔnle kɛ awie biala yɛ gyima ɛsesebɛ. Ɛhye le mɛla mɔɔ wɔ ɛkɛ ne dahuu, wɔ awolɛndoazo muala anu, wɔ ɛleka biala mɔɔ bɛwɔ la.
22 #
Sɛlɛ 19.9-10; Mɛla 24.19-22 “Saa bɛbu bɛ azɛlɛ ne azo bɛyɔba ne a, ɔnle kɛ bɛbu toonwo bɛkɔkpula ɔ nloa, yɛɛ ngoko mɔɔ kɛha nu la, ɔnle kɛ bɛsia bɛkɔbu. Bɛgyakyi bɛ bɛmaa ehyianvolɛma nee nyɛvolɛ; medame a mele Ɛdɛnkɛma bɛ Nyamenle ne a.”
Ɛvolɛ Fofolɛ Ɛvoyia ne
(Ɛdi 29.1-6)
23Ɛdɛnkɛma zele Mosisi kɛ, 24“Ka kile Yizilayɛma kɛ, ‘Siane nsuu ne kenle ne mɔɔ lumua la, ɔwɔ kɛ bɛdie bɛ ɛnwomenle. Ɔle ngakyelɛ ɛnwomenlelielɛ kenle mɔɔ ɔwɔ kɛ bɛbɔ aweɛne ndendenle bɛfa bɛmaa menli ne bayia nu yɛ nzɛlɛlɛ a. 25Ɔnle kɛ awie biala yɛ gyima ɛsesebɛ; yɛɛ ɔwɔ kɛ bɛbɔ ɛyelalɛ azu bɛmaa Ɛdɛnkɛma.’ ”
Mgbɔdalɛ Kenle ne
(Ɛdi 29.7-11)
26 #
Sɛlɛ 16.29-34
Na Ɛdɛnkɛma zele Mosisi kɛ, 27“Siane nsuu ɛhye ala kenle bulu ne le mgbɔdalɛ nzɛlɛlɛ kenle. Ɔle mekɛ mɔɔ ɔwɔ kɛ bɛyia nuhua bɛyɛ nzɛlɛlɛ a. Ɔwɔ kɛ bɛkye ɛhɔne na bɛfa ɛyelalɛ azubɔdeɛ bɛbɛlɛ Ɛdɛnkɛma. 28Ɔnle kɛ bɛyɛ gyima biala kenle ko ne, ɔluakɛ ɔle mgbɔdalɛlilɛ kenle mɔɔ bɛyɛ mgbɔdalɛ nzɛlɛlɛ bɛmaa bɛ wɔ Ɛdɛnkɛma bɛ Nyamenle ne anyunlu a. 29Awie biala mɔɔ angye ɛhɔne demua ne la, bɛbaye ye bɛavi Nyamenle menli ne avinli. 30Awie biala noko mɔɔ kɛyɛ gyima kenle zɔhane la, mebazɛkye ye meavi ye menli ne avinli. 31Ɔnle kɛ bɛyɛ gyima biala kenle ko ne; ɔle mɛla mɔɔ wɔ ɛkɛ ne dahuu, wɔ bɛ awolɛndoazo muala anu. 32Ɔbayɛ bɛ Ɛnwomenlelielɛ Kenle mɔɔ hyia a, yɛɛ ɔwɔ kɛ bɛkye ɛhɔne. Siane ne kenle ngɔnla ne azo nɔsolɛ nu, toonwo kɔkpula ye alehyenlɛ nu nɔsolɛ yɛɛ bɛbabɔ ɛhɔnehyelɛ ne abo a, yɛɛ Ɛnwomenlelielɛ Kenle ne bɔ ɔ bo toonwo kɔkpula alehyenlɛ ne nɔsolɛ nu.”
Kpɔda Bo Ɛdɛnlanlɛ Ɛvoyia ne
(Ɛdi 29.12-40)
33 #
Mɛla 16.13-15
Ɛdɛnkɛma zele Mosisi kɛ, 34“Ka kile Yizilayɛma kɛ: Siane nsuu ne kenle bulu nee nnu ne azo, ɔwɔ kɛ bɛdi Ɛdɛnkɛma Kpɔda Bo Ɛdɛnlanlɛ Ɛvoyia ne, yɛɛ ɔwɔ kɛ bɛdi ye kenle nsuu. 35Kenle ne mɔɔ lumua la, bɛbava bɛayɛ ɛzonlenlɛ; ɔnle kɛ bɛyɛ gyima ɛsesebɛ. 36Kenle nsuu ne anu, ɔwɔ kɛ bɛfa azubɔdeɛ bɛba bɛmaa bɛyela bɛbɔ azu bɛmaa Ɛdɛnkɛma. Kenle mɔtwɛ ne azo, ɔwɔ kɛ bɛyia nu bɛyɛ nzɛlɛlɛ na bɛbɔ ɛyelalɛ azu bɛmaa Ɛdɛnkɛma; ɔle ɛzonlenlɛ nyianu kpole, ɔnle kɛ bɛyɛ gyima ɛsesebɛ.”
37(Ɛhye mɔ a le Ɛdɛnkɛma ɛvoyia ne mɔ mɔɔ ɔwɔ kɛ bɛbɔ bɛ nolo kɛ ɔwɔ kɛ bɛyia nu bɛsonle, na bɛbɔ ɛyelalɛ azu bɛmaa Ɛdɛnkɛma a. Ɔwɔ kɛ bɛfa ɛyelalɛ azubɔdeɛ, ma azubɔdeɛ, azubɔlɛ ngakyile, yɛɛ nza azubɔdeɛ, ko biala nee ye kenle, bɛmaa Ɛdɛnkɛma. Ɔwɔ kɛ bɛdi ɛvoyia ɛhye mɔ 38bɛboka Ɛdɛnkɛma Ɛnwomenlelielɛ Kenle ne mɔ anwo, na bɛfa bɛ ahyɛlɛdeɛ ngakyile ne mɔ, bɛ ɛwɔkɛyelɛ azubɔdeɛ ne mɔ, yɛɛ bɛ ahonle fufule nu azubɔdeɛ ne mɔ bɛmaa Ɛdɛnkɛma.)
39“Siane nsuu ne kenle bulu nee nnu ne azo, mɔɔ ɛnee bɛbu bɛ bɛyɔba ne la, bɛbali Ɛdɛnkɛma Ɛvoyia ɛhye kenle nsuu. Kenle ne mɔɔ lumua la bɛbava bɛalie bɛ ɛnwomenle bɛayia nu bɛayɛ nzɛlɛlɛ, yɛɛ kenle mɔtwɛ ne ɔdaye bɛbava bɛalie bɛ ɛnwomenle bɛayia nu bɛayɛ nzɛlɛlɛ. 40Kenle ne mɔɔ lumua la bɛva bɛ mbaka kpalɛ ne mɔ azo ma, bɛpepɛ mrɛlakɛ, bɛbubu mbaka mɔɔ lɛ nya kpalɛ la ngane nee azule nloa mbaka buzubuzu ne mɔ nya ne bie bɛli ɛvoyia ne na bɛmaa bɛ nye ɛlie toonwo kenle nsuu wɔ Ɛdɛnkɛma anyunlu. 41Bɛli ɛvoyia ɛhye kenle nsuu wɔ ɛvolɛ ne anu bɛwula Ɛdɛnkɛma anyunlunyia. Ɔle mɛla mɔɔ wɔ ɛkɛ ne dahuu maa awolɛndoazo muala a. Ɔwɔ kɛ bɛdi ɛvoyia ɛhye wɔ siane nsuu ne anu. 42Bɛdabɛ Yizilayɛma kɔsɔɔti bɛbadɛnla kpɔda bo dedee kenle nsuu, 43amaa bɛ bo zo amra anwu kɛ memanle Yizilayɛma dɛnlanle kpɔda bo wɔ mekɛ mɔɔ menyele bɛ menvile Yigyibiti azɛlɛ zo la. Medame a mele Ɛdɛnkɛma bɛ Nyamenle ne a.”
44Yemɔti Mosisi yele Ɛdɛnkɛma ɛvoyia ne mɔ dole Yizilayɛma anyunlu.
Currently Selected:
Sɛlɛ 23: NB
Highlight
Copy
Compare
Share
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
