Sɛlɛ 15
15
Nwonane nu nzuvinli ɛhwinlɛ
1Ɛdɛnkɛma zele Mosisi nee Aalɔn kɛ, 2“Ka kile Yizilayɛma kɛ, ‘Saa nide vi awie mrenyanu finde a, ɛnee ahenle anwo ɛnde. 3Mɛla mɔɔ wɔ mrenyanu nidehwinlɛ nwo la ɛne: saa ahenle mrenyanu tɛtwihwi nide ne anzɛɛ saa nide ne pɛ bɔbɔ a, ahenle anwo ɛnde. 4Ɛkpa biala mɔɔ sonla mɔɔ ye mrenyanu twi nide la kɛla zolɛ anzɛɛ debie biala mɔɔ ɔkɛdɛnla zolɛ la anwo ɛnde. 5Awie biala mɔɔ kɛva ɔ sa kɛha ahenle zɔhane ɛkpa la, ɔwɔ kɛ ɔkpo ye adɛladeɛ na ɔbia ɔ nwo, yɛɛ ɔwɔ evinli nu toonwo nɔsolɛ. 6Awie biala mɔɔ kɛdɛnla debie biala mɔɔ sonla ne mɔɔ ye mrenyanu twi nide la ɛdɛnla zolɛ la azo la, ɔwɔ kɛ ɔkpo ye adɛladeɛ ne mɔ na ɔbia; yɛɛ ɔwɔ evinli nu toonwo nɔsolɛ. 7Awie biala mɔɔ anwo kɛha sonla mɔɔ ye mrenyanu twi nide la, ɔwɔ kɛ ɔkpo ye adɛladeɛ na ɔbia, yɛɛ ɔwɔ evinli nu toonwo nɔsolɛ. 8Saa awie mɔɔ ye mrenyanu twi nide la to nyɛlɛ awie mɔɔ anwo te la anwo a, ahenle mɔɔ bɛdole nyɛlɛ ne ɔ nwo la anwo ɛnde. Ɔwɔ kɛ ɔkpo ye adɛladeɛ ne mɔ na ɔbia, yɛɛ ɔ nwo ɛnrɛde toonwo nɔsolɛ nu. 9Ebia biala anzɛɛ asoaso nzi ebia mɔɔ sonla mɔɔ ye mrenyanu twi nide la kɛdɛnla zolɛ la anwo ɛnde. 10Yemɔti awie biala mɔɔ kɛva ɔ sa kɛha debie biala mɔɔ ɔdɛnlanle zolɛ la evinli baha ye toonwo nɔsolɛ; yɛɛ awie mɔɔ kɛzoa debie zɛhae bie la, ɔwɔ kɛ ɔkpo ye adɛladeɛ na ɔbia, yɛɛ ɔ nwo ɛnrɛde toonwo nɔsolɛ. 11Awie biala mɔɔ sonla mɔɔ ye mrenyanu twi nide la anrinzi ɔ sa anwo na ɔ nwo kɛha ye la, ɛnee evinli ɛha ye. Ɔwɔ kɛ ɔkpo ye adɛladeɛ ne mɔ na ɔbia, yɛɛ ɔ nwo ɛnrɛde toonwo nɔsolɛ. 12Dwora biala mɔɔ ahenle mɔɔ ye mrenyanu twi nide la kɛva ɔ sa kɛha ye la, ɔwɔ kɛ bɛbɔ ye. Saa dwora ne le baka dwora a, yemɔ ɔwɔ kɛ bɛkpuda nu kpalɛ kpalɛ.
13“ ‘Saa awie mɔɔ ye mrenyanu twi nide la te kpɔkɛ a, ɔwɔ kɛ ɔtia kenle nsuu, na akee ɔkpo ye adɛladeɛ ne mɔ na ɔbia azudenle nu anzɛɛ ɔfa nzule amolɛ ɔbia na ɔ nwo ade. 14Kenle mɔtwɛ ne azo, ɔwɔ kɛ ɔfa abubule nwiɔ anzɛɛ mɔlɔnoma nwiɔ ɔkɔ Ɛdɛnkɛma anyunlu wɔ Ɛdɛnkɛma Ndanlɛ Sua ne anuhɔlɛ ne, na ɔfa ɔmaa sɛlɛvolɛ ne. 15Sɛlɛvolɛ ne bava abɔ azu; ɔbava ko yeayɛ ɛtane azubɔdeɛ na yeava ko ne yeayɛ ɛyelalɛ azubɔdeɛ, na yeayɛ mgbɔdalɛ nzɛlɛlɛ yeamaa ye wɔ Ɛdɛnkɛma anyunlu wɔ ye mrenyanu ewule ne anwo.
16“ ‘Saa nrenya nwo ba a, ɛnee evinli ɛha ye. Ɔwɔ kɛ ɔbia, yɛɛ ɔ nwo ɛnrɛde toonwo nɔsolɛ. 17Debie biala, tɛladeɛ, nwoma anzɛɛ ɛdanlɛ biala mɔɔ nlanzule ne bie kɛpe nuhua la, ɔwɔ kɛ bɛkpo, yɛɛ nwolɛ ɛnrɛde toonwo nɔsolɛ. 18Saa nrenya nee raalɛ da na ɔ nwo ba a, ɔwɔ kɛ bɛ mu nwiɔ bɛbia, yɛɛ bɛ nwo ɛnrɛde toonwo nɔsolɛ.
19“ ‘Saa raalɛ kɔ ɛwazɛne nu a, evinli baha ye toonwo kenle nsuu. Awie biala mɔɔ anwo kɛha ye la anwo ɛnrɛde toonwo nɔsolɛ. 20Debie biala mɔɔ mekɛ mɔɔ ɔwɔ ɛwazɛne nu la ɔkɛla zolɛ anzɛɛ ɔkɛdɛnla zolɛ la anwo ɛnde. 21-23Awie biala mɔɔ anwo kɛha ye ɛkpa anzɛɛ debie biala mɔɔ ɔkɛdɛnla zolɛ la, ɔwɔ kɛ ɔkpo ye adɛladeɛ ne mɔ na ɔbia, yɛɛ ɔ nwo ɛnrɛde toonwo nɔsolɛ. 24Saa nrenya fa raalɛ mɔɔ wɔ ɛwazɛne nu la a, ɛnee raalɛ ne anwo evinli ne bie ɛha ye. Evinli ne baha ye toonwo kenle nsuu, yɛɛ ɛkpa biala mɔɔ ɔkɛla zolɛ la anwo ɛnde.
25“ ‘Saa raalɛ tudu mogya kenle dɔɔnwo, wɔ mekɛ mɔɔ ɔnle ɛwazɛne nu, anzɛɛ saa ɔka ɛwazɛne nu a, mekɛ dodo mɔɔ mogya ne tɛtu ye anzɛɛ ɔtɛbɔ ɛwazɛne nu la, ɔ nwo ɛnde. Evinli ɛha ye, kɛmɔ saa ɔwɔ ɛwazɛne nu a ɛnee ɔwɔ evinli nu la. 26Ɛkpa biala mɔɔ ɔkɛla zolɛ, wɔ mekɛ mɔɔ mogya ne tɛtu ye la le kɛ mekɛ mɔɔ ɔwɔ ɛwazɛne nu la, yɛɛ debie biala mɔɔ ɔkɛdɛnla zolɛ la anwo ɛnde; ɔle kɛ ɔwɔ ɛwazɛne nu la. 27Awie biala mɔɔ anwo kɛha ninyɛne ɛhye mɔ biala la anwo ɛnde. Ɔwɔ kɛ ɔkpo ye adɛladeɛ ne mɔ na ɔbia, yɛɛ ɔ nwo ɛnde toonwo nɔsolɛ. 28Na saa ɔ nwo pɛ a, ɔwɔ kɛ ɔtia kenle nsuu kolaa na ɔ nwo ade. 29Kenle mɔtwɛ ne azo, ɔwɔ kɛ ɔfa abubule nwiɔ anzɛɛ mɔlɔnoma nwiɔ ɔbɛlɛ sɛlɛvolɛ ne, wɔ Ɛdɛnkɛma Ndanlɛ Sua ne anuhɔlɛ ne. 30Sɛlɛvolɛ ne bava abɔ azu; ɔbava ko yeayɛ ɛtane azubɔdeɛ na yeava ko yeayɛ ɛyelalɛ azubɔdeɛ. Sɛlɛvolɛ ne bayɛ mgbɔdalɛ nzɛlɛlɛ amaa ye wɔ Ɛdɛnkɛma anyunlu, wɔ evinli ne mɔɔ ɛha ye la anwo.
31“ ‘Zɛhae yɛɛ ɛbayɛ wɔava wɔade Yizilayɛma anwo wɔ evinli mɔɔ kɛha bɛ la anwo a, amaa bɛanva evinli bɛanga me Ndanlɛ Sua ne mɔɔ gyi bɛ avinli la na bɛawu.’ ”
32Ɛhye a le mɛla mɔɔ wɔ ɛkɛ ne maa nrenya mɔɔ ye mrenyanu twi nide anzɛɛ ɔ nwo kɛra, 33anzɛɛ raalɛ mɔɔ wɔ ɛwazɛne nu, anzɛɛ nrenya mɔɔ kɛva raalɛ mɔɔ wɔ ɛwazɛne nu na ɔ nwo ɛnde la a.
Currently Selected:
Sɛlɛ 15: NB
Highlight
Copy
Compare
Share
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
