Sɛlɛ 14
14
Sonla mɔɔ nwonane nu ewule ɛha ye na yede kpɔkɛ la ɛnluanlɛ
1Ɛdɛnkɛma zele Mosisi kɛ, 2#Mat 8.4; Mak 1.44; Luk 5.14; 17.14 “Kokobɛvolɛ mɔɔ anwo kɛza la ɛnluanlɛ nwo mɛla a le ɛhye: Kenle ko ne, ɔwɔ kɛ bɛfa ye bɛbɛlɛ sɛlɛvolɛ ne. 3Sɛlɛvolɛ ne nee ye bavinde ahɔ azokoɛleɛ ne kandiba na yeanleɛnlea ɔ nwo. Na saa kokobɛ ewule ne ɛhɔ a, 4sɛlɛvolɛ ne bamaa bɛabɔ ahenle ne mɔɔ bɛnua ye la ati bɛava nloma mɔɔ anwo te la nwiɔ anyewɔzo, sida baka, boane kɔkɔlɛ enrinli, yɛɛ nyinlanyinla. 5Sɛlɛvolɛ ne bamaa bɛahu nloma ne mɔ ko wɔ siase mɔɔ nzule amolɛ wɔ nu la anu. 6Akee ɔbava anloma ko ne mɔɔ anye wɔ zolɛ la, sida baka ne, boane kɔkɔlɛ enrinli ne nee nyinlanyinla ne yeabɔ bɛ anloma ne mɔɔ bɛhu ye la mogya ne anu, 7na yeakponde ye ahenle ne mɔɔ bɛnua ye la anwo fane nsuu, na akee yeado duma kɛ ɔ nwo ɛde, na yeadwula anloma anyewɔzo ne yeamaa yeahɔ. 8Akee ahenle mɔɔ bɛnua ye la bakpo ye adɛladeɛ, yeakpa ɔ nwo enrinli kɔsɔɔti na yeabia; ɛnee ɔ nwo ɛde. Ɛhye anzi ɔbara sua zo, noko ɔnrɛhɔ ye ndanlɛ sua ne anu. Ɔbala alie nwo toonwo kenle nsuu. 9Kenle nsuu ne azo ɔbakpa ɔ ti bieko, yeakpa ɔ kɛsa, ɔ nye anzi nee ɔ nwo enrinli biala. Ɔbakpo ye adɛladeɛ ne mɔ na yeabia, ɛnee akee ɔ nwo ɛde.
10“Kenle mɔtwɛ ne azo, ɔwɔ kɛ ɔfa mboane nyinli nwiɔ mɔɔ anwo ɛnlɛ dɛne la, boane belɛ ko mɔɔ ɛli ɛvolɛ ko na ɔ nwo ɛnlɛ dɛne la, ma azubɔdeɛ mɔɔ bɛdi bɛyɛ ye esamo na bɛva ɔlivi nwole bɛfɔtɔ la kilo nsa, yɛɛ ɔlivi nwole toba foa ko ɔbɛlɛ sɛlɛvolɛ ne. 11Akee sɛlɛvolɛ ne bava ahenle mɔɔ bɛnua ye la nee ninyɛne ɛhye mɔ ahɔ Ɛdɛnkɛma anyunlu wɔ Ɛdɛnkɛma Ndanlɛ Sua ne anuhɔlɛ ne. 12Sɛlɛvolɛ ne bava mboane nyinli ne mɔ ko nee ɔlivi nwole toba foa ko ne ayɛ fɔlɛlilɛ anzɛɛ abozozielɛ azubɔdeɛ, abɔ ehono azu amaa Ɛdɛnkɛma. 13Akee ɔbahu boane ne wɔ ɛleka mɔɔ bɛku ɛtane azubɔdeɛ ne nee ɛyelalɛ azubɔdeɛ ne mɔ la, wɔ ɛleka nwuanzanwuanza ne. Ɔluakɛ fɔlɛlilɛ azubɔdeɛ ne le kɛ ɛtane azubɔdeɛ ne la, na ɔle sɛlɛvolɛ ne ɛdeɛ; ɔle debie mɔɔ le nwuanzanwuanza kpalɛ kpalɛ a. 14Sɛlɛvolɛ ne bava fɔlɛlilɛ azubɔdeɛ ne mogya ne bie aha ahenle mɔɔ bɛnua ye la anzo fema ne ati, ɔ sa fema kokotile ne azo, yɛɛ ɔ gyakɛ fema kokotile ne azo. 15Akee sɛlɛvolɛ ne bawola ɔlivi nwole toba foa ko ne bie agua ɔdaye sɛlɛvolɛ ne ɔ sa bɛne ne anu, 16na yeava ɔ sa fema ɛrɛlɛsɛka yeabɔ nwole ne mɔɔ wɔ ɔ sa bɛne ne anu la anu yeava yeakponde Ɛdɛnkɛma anyunlu ɛkɛ ne fane nsuu. 17Nwole ne mɔɔ kɛha sɛlɛvolɛ ne asa anu la, ɔbava bie yeaha ahenle mɔɔ ɔlɛnua ye la anzo fema ne ati, ɔ sa fema kokotile ne azo, yɛɛ ɔ gyakɛ fema kokotile ne azo wɔ ɛleka mɔɔ ɔvale fɔlɛlilɛ azubɔdeɛ ne mogya ne ɔpepenle la. 18Akee nwole ne mɔɔ kɛha sɛlɛvolɛ ne asa anu la, ɔbava yeakpokpa ahenle mɔɔ bɛnua ye la ati zo. Ɛhye anzi, akee sɛlɛvolɛ ne bayɛ mgbɔdalɛ nzɛlɛlɛ amaa ye, wɔ Ɛdɛnkɛma anyunlu.
19“Sɛlɛvolɛ ne akee babɔ ɛtane azubɔdeɛ azu ne ayɛ mgbɔdalɛ nzɛlɛlɛ amaa ahenle mɔɔ bɛnua ye la wɔ evinli mɔɔ hanle ye la anwo. Ɛhye anzi, ɔbahu ɛyelalɛ azubɔdeɛ ne. 20Sɛlɛvolɛ ne babɔ ɛyelalɛ azubɔdeɛ nee ma azubɔdeɛ azu ne mɔ wɔ azukponle ne azo. Zɛhae debie yɛɛ sɛlɛvolɛ ne bayɛ yeava yeayɛ mgbɔdalɛ nzɛlɛlɛ yeamaa ahenle ne na ahenle anwo ade saanwu a.
21“Na saa ahenle le ehyianli na ɔnrɛhola ninyɛne ne mɔ sesa a, ɛnee ɔbava boane nyinli ko yeayɛ fɔlɛlilɛ azubɔdeɛ mɔɔ bɛbado ye ehono bɛabɔ azu bɛayɛ mgbɔdalɛ nzɛlɛlɛ bɛamaa ye la, ma azubɔdeɛ mɔɔ bɛdi bɛyɛ esamo la kilo ko mɔɔ bɛva nwole bɛfɔtɔ la, yɛɛ ɔlivi nwole toba foa ko. 22Eza ɔwɔ kɛ ɔfa abubule nwiɔ anzɛɛ mɔlɔnoma nwiɔ, nuhua biala mɔɔ ɔkɛhola ye fa la; bɛbava ko bɛayɛ ɛtane azubɔdeɛ na bɛava ko bɛayɛ ɛyelalɛ azubɔdeɛ. 23Kenle mɔtwɛ ne azo yɛɛ ɔbava bɛ yearɛlɛ sɛlɛvolɛ ne na bɛanlua ye a. Ɔbava yearagyinla Ɛdɛnkɛma Ndanlɛ Sua ne anuhɔlɛ ne; 24sɛlɛvolɛ ne balie fɔlɛlilɛ azubɔdeɛ boane ne nee nwole toba foa ko ne yeado bɛ ehono kɛ ɔle ehono azubɔdeɛ ɔmaa Ɛdɛnkɛma, na ɔle sɛlɛvolɛ ne ɛdeɛ. 25Akee ɔbahu fɔlɛlilɛ azubɔdeɛ boane ne, na yeava ye mogya ne bie yeaha ahenle mɔɔ bɛnua ye la anzo fema ne ati nee ɔ sa fema kokotile nee ɔ gyakɛ fema kokotile ne mɔ azo 26Akee sɛlɛvolɛ ne bawola nwole ne bie ɔdaye ɔ sa bɛne ne anu 27na yeava ɔ sa fema ɛrɛlɛsɛka yeava nwole ne mɔɔ wɔ ɔ sa bɛne ne anu la bie yeakponde Ɛdɛnkɛma anyunlu ɛkɛ ne fane nsuu. 28Sɛlɛvolɛ ne bava nwole ne mɔɔ wɔ ɔ sa bɛne ne anu la bie aha ahenle mɔɔ bɛnua ye la anzo fema ne ati, ɔ sa fema kokotile nee ɔ gyakɛ fema kokotile ne mɔ azo, wɔ ɛleka mɔɔ bɛvale fɔlɛlilɛ azubɔdeɛ mogya ne bɛpepenle la. 29Nwole ne mɔɔ baha sɛlɛvolɛ ne asa anu la, ɔbava yeakpokpa ahenle mɔɔ bɛnua ye la ati zo, yeayɛ mgbɔdalɛ nzɛlɛlɛ yeamaa ye wɔ Ɛdɛnkɛma anyunlu. 30Akee sɛlɛvolɛ ne bava abubule anzɛɛ mɔlɔnoma ne mɔ, kɛmɔ ahenle mɔɔ bɛnua ye la kɛhola kɛva la. 31Ɔbava ko yeayɛ ɛtane azubɔdeɛ na yeava ko ne yeayɛ ɛyelalɛ azubɔdeɛ yeaboka ma azubɔdeɛ ne anwo. Na sɛlɛvolɛ ne bayɛ mgbɔdalɛ nzɛlɛlɛ wɔ Ɛdɛnkɛma anyunlu amaa ahenle mɔɔ bɛnua ye la. 32Ɛnee sonla mɔɔ kokobɛ ɛdila ye na ɔ nwo ɛza, na ɔnrɛhola azubɔdeɛ ne mɔ sesa la mɛla ɛdeɛ ne ɛne.”
Sua nu nzenzemile
33Ɛdɛnkɛma zele Mosisi nee Aalɔn kɛ, 34“Saa bɛdwu Keena azɛlɛ ne mɔɔ mefa meamaa bɛayɛ bɛ ɛdeɛ la azo, na memaa ewule kokobɛ#14.34 Kokobɛ: anzɛɛ nwonane nu ewule ɛzulolɛ bie. tɔ awuke bie anu, wɔ azɛlɛ ne mɔɔ bɛde zolɛ kɛ bɛ ɛdeɛ la azo a, 35ɔwɔ kɛ ahenle mɔɔ lɛ sua ne la baka kile sɛlɛvolɛ ne kɛ, ‘Ɔyɛ me kɛ ewule bie ɛdɔ me sua nu ɛkɛ.’ 36Sɛlɛvolɛ ne bamaa bɛayeye sua holɛ ko ne anu ninyɛne ne amuala kolaa na yeahɔ yeahɔnlea ewule ne. Saa bɛanyɛ ye zɔhane a, sɛlɛvolɛ ne baze kɛ debie biala mɔɔ wɔ sua ne anu la anwo ɛnde. Saa bɛyeye ninyɛne ne bɛsie a, akee sɛlɛvolɛ ne bahɔnlea sua ne anu. 37Ɔbanleɛnlea ewule ne, na saa ewule holɛ ko ne wɔ sua ne bane ne mɔ bie anwo, na ɔ nye le asuomenle nee kɔkɔlɛ, na ɔ bo le kuma a, 38sɛlɛvolɛ ne bavinde ara sua ne anlenkɛ ne anloa, na yeado sua ne anu dedee kenle nsuu. 39Sɛlɛvolɛ ne bara bieko wɔ kenle nsuu ne azo na yearanlea. Saa ewule ne ɛdɛlɛ sua ne bane ne mɔ anwo a, 40sɛlɛvolɛ ne bamaa bɛayeye awolɛ ne mɔ mɔɔ wɔ sua ne bane ne mɔ mɔɔ ewule ne ɛha bɛ la anu na bɛahɔdo bɛ bɛagua fovolɛ zo wɔ suakpole ne kandiba. 41Akee sɛlɛvolɛ ne bamaa bɛakpokpo sua ne anu bane ne mɔ anwo bɛayia na bɛahɔdo bɛagua fovolɛ zo wɔ suakpole ne kandiba, 42na bɛava awolɛ fofolɛ bɛawulowula bane ne mɔ anu, bɛatanlitanli sua ne bane ne na akee bɛada sua ne bieko.
43“Saa bɛyeye awolɛ ne mɔ, bɛtudu sua ne bane ne mɔ anwo, bɛtanlitanli ye fofolɛ, bɛta nwolɛ, na ewule ne sia ba bieko a, 44sɛlɛvolɛ ne bahɔ ahɔnlea sua ne bieko, na saa ewule ne ɛdɛlɛ a, ɛnee ɔle ewule kokobɛ nzane mɔɔ ɛha sua ne a; sua ne anwo ɛnde. 45Ɔbamaa bɛabubu sua ne, na bɛavulovula nuhua awolɛ, mbaka nee ndɛtɛlɛ ne mɔ amuala bɛahɔgua fovolɛ zo wɔ suakpole ne kandiba. 46Ɔba ye zɛhae a awie biala mɔɔ kɛwolo sua ne anu, wɔ mekɛ mɔɔ bɛdo nu la, evinli baha ye na ɔ nwo ɛnrɛde toonwo nɔsolɛ. 47Awie mɔɔ kɛla sua zɔhane anu la, ɔwɔ kɛ ɔkpo ye adɛladeɛ ne mɔ, yɛɛ ɔwɔ kɛ awie mɔɔ kɛdɛnla ɛkɛ ne kɛli debie la ɔdaye ɔkpo ye adɛladeɛ ne mɔ.
48“Na saa sɛlɛvolɛ ne baneɛnlea sua ne anu na ewule ne ɛtɛtɛlɛle, wɔ mekɛ mɔɔ bɛda sua ne akunlu fofolɛ la a, ɔbaha yeado gua kɛ sua ne anwo te, ɔluakɛ ewule ne ɛhɔ. 49Sua zɛhae ɛnluanlɛ nu, ɔwɔ kɛ ahenle mɔɔ lɛ sua ne la sesa ninyɛne ɛhye mɔ: nloma ngyikyi nwiɔ, sida baka nee boane kɔkɔlɛ enrinli, yɛɛ nyinlanyinla. 50Akee ɔbahu nloma ne mɔ ko wɔ ɛyɛba mɔɔ nzule amolɛ wɔ nu la anu, 51na yeava sida baka ne, nyinlanyinla ne nee boane kɔkɔlɛ enrinli ne yeaboka anloma ne mɔɔ anye wɔ zolɛ la anwo yeabɔ anloma ne mɔɔ bɛhunle ye la mogya ne mɔɔ wɔ ɛyɛba ne anu la anu, na yeava yeakponde sua ne anu fane nsuu. 52Zɛhae yɛɛ ɔwɔ kɛ ɔyɛ na ɔfa anloma ne mɔɔ anye wɔ zolɛ la, boane kɔkɔlɛ enrinli ne nee nyinlanyinla ne ɔnua sua ne a. 53Akee ɔbadwula anloma ne mɔɔ anye wɔ zolɛ la yeamaa yeahɔ; na yeayɛ mgbɔdalɛ nzɛlɛlɛ yeamaa sua ne; ɛnee sua ne anwo ɛde bɔkɔɔ.”
54Ewule kokobɛ ngakyile biala anwo mɛla ɛne: senra, 55ndanlɛ anzɛɛ adɛladeɛ nu adubue nee sua nu nzenzemile, 56nyila, nganlɛ anzɛɛ nzɔlɔsɔlɔ. 57Ɛhye a bahile kɛ ahenle anzɛɛ deɛ ne mɔɔ ewule ɛhye mɔ bie ɛha ye la anwo te anzɛɛ anwo ɛnde a. Ewule kokobɛ nwo mɛla ɛne.
Currently Selected:
Sɛlɛ 14: NB
Highlight
Copy
Compare
Share
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
