Ade 40
40
Ɛdɛnkɛma Ndanlɛ Sua ne ɛhyehyɛlɛ nee ye ɛbukelɛ
1Ɛdɛnkɛma zele Mosisi kɛ, 2“Alumua siane ne, ye kenle ne mɔɔ lumua la, kyehyɛ Ɛdɛnkɛma Ndanlɛ Sua ne. 3Fa Ngyekyeleɛ Ɛlɛka ne sie nu, na fa mgbɛnu ɛdanlɛ ne wa ɔ nyunlu. 4Fa ɛkponle ne sie nu na fa nwolɛ ninyɛne ne mɔ kɔsɔɔti gua zolɛ. Eza fa kɛnlaneɛ baka ne sie nu na fa ahɛnlaneɛ ne mɔ siezie zolɛ. 5Fa ezukoa nvutuke azukponle ne mɔɔ bɛbakpu ɛyɛlɛ zolɛ la sie Ngyekyeleɛ Ɛlɛka ne anyunlu na fa Ndanlɛ Sua ne anlenkɛ ne anu ɛdanlɛ ne kenda ɛkɛ. 6Fa azukponle ne mɔɔ bɛbava bɛayela azubɔdeɛ ne mɔ la sie Ndanlɛ Sua ne anuhɔlɛ kpole ne, 7na fa kyɛnze ne mɔɔ bɛbawowo bɛ sa nee bɛ gyakɛ anwo nuhua la sie Ndanlɛ Sua ne nee azukponle ne avinli na gua nzule nu. 8Fa alie ne anwo bane ne anwo ndanlɛ ne mɔ wowa nwo, na fa ɛdanlɛ wa ye anlenkɛ ne anu.
9“Akee fa ɛkpokpalɛ nwole ne kpokpa Ndanlɛ Sua ne nee nuhua debie biala, tu bɛ maa Ɛdɛnkɛma na bɛkɛyɛ nwuanzanwuanza. 10Bieko, fa nwole kpokpa azukponle ne nee nwolɛ debie biala, tu bɛ maa Ɛdɛnkɛma na bɛkɛyɛ nwuanzanwuanza kpalɛ. 11Eza pe adenle ko ne ala anu tu kyɛnze ne mɔɔ bɛwowo bɛ sa nee bɛ gyakɛ anwo nu la maa Ɛdɛnkɛma.
12“Akee fa Aalɔn nee ɔ mra mrenya ne mɔ bɛla Ndanlɛ Sua ne anlenkɛ ne anloa na fa nzule bia bɛ. 13Fa sɛlɛvolɛ adɛladeɛ ne mɔ wulowula Aalɔn, kpokpa ye nwole na tu ye sie ahane maa me, amaa yeazonle me kɛ ɔle sɛlɛvolɛ. 14Fa ɔ mra mrenya ne mɔ noko bɛla na fa anwuma adɛladeɛ ne mɔ wulowula bɛ. 15Akee kpokpa bɛ nwole, kɛmɔ ɛkpokpale bɛ ze ala la, amaa bɛazonle me kɛ bɛle me sɛlɛvolɛma. Ɛkpokpalɛ ɛhye bamaa bɛayɛ sɛlɛvolɛma dahuu.”
16Mosisi yɛle debie biala, kɛmɔ Ɛdɛnkɛma zele ye la.
17Yemɔti bɛvile Yigyibiti la, ye ɛvolɛ nwiɔ ne anu, ye siane ne mɔɔ lumua la, kenle ne mɔɔ lumua la azo, bɛhyehyɛle Ɛdɛnkɛma Ndanlɛ Sua ne. 18Mosisi hyehyɛle Ndanlɛ Sua ne. Ɔlumuale ɔzieziele adiabo ne mɔ, ɔgyinlegyinlanle felɛmo ne mɔ, ɔvale meɛbeanu mbaka ne mɔ ɔbobɔle nwo, na ɔkpɔnlɔkpɔnlanle ye azika ne mɔ. 19Ɔdɛlɛle zolɛhedalɛ ndanlɛ ne mɔ anu ɔhedale Ndanlɛ Sua ne azo na ɔvale nwolɛ ɛwowalɛ ɛdeɛ ne mɔ ɔwowale nwo, kɛmɔ Ɛdɛnkɛma zele ye ala la. 20Akee ɔvale awolɛ ndɛbandɛba nwiɔ ne ɔguale Ngyekyeleɛ Ɛlɛka ne anu. Ɔvale Ɛlɛka ne mbaka ne mɔ ɔwulowulale ye ngɛba ne mɔ anu na ɔvale ɔ ti ne ɔduale zolɛ. 21Akee ɔvale Ɛlɛka ne ɔziele Ndanlɛ Sua ne anu na ɔvale mgbɛnu ɛdanlɛ ne ɔwale ɔ nyunlu, kɛmɔ Ɛdɛnkɛma zele ye la.
22Ɔvale ɛkponle ne ɔziele Ndanlɛ Sua ne anu sɔlɔ afoa nu wɔ mgbɛnu ɛdanlɛ ne anyunlu, 23na ɔvale kpanwo ne mɔɔ bɛva bɛbɔ azu bɛmaa Ɛdɛnkɛma la ɔguale zolɛ, kɛmɔ Ɛdɛnkɛma zele ye la. 24Ɔvale kɛnlaneɛ baka ne ɔziele Ndanlɛ Sua ne anu nyiakɛ afoa nu ɔmanle ɔ nee ɛkponle ne bɛ nye bɔle zo; 25na ɛkɛ ne, wɔ Ɛdɛnkɛma anyunlu, ɔsosɔle ahɛnlaneɛ ne mɔ, kɛmɔ Ɛdɛnkɛma zele ye ala la. 26Ɔvale ezukoa nvutuke azukponle ne ɔziele Ndanlɛ Sua ne anu mgbɛnu ɛdanlɛ ne anyunlu 27na ɔyelale ɛyɛlɛ evuanlɛ wɔ zolɛ, kɛmɔ Ɛdɛnkɛma zele ye ala la. 28Ɔvale Ndanlɛ Sua ne anlenkɛ ne anu ɛdanlɛ ne ɔhendanle ɛkɛ, 29na ɔvale azukponle ne mɔɔ bɛfa bɛyela azubɔdeɛ ne mɔ la ɔziele Ndanlɛ Sua ne anuhɔlɛ ne anloa. Ɔvale ɛyelalɛ azubɔdeɛ nee ma azubɔdeɛ ɔbɔle azu wɔ zolɛ, kɛmɔ Ɛdɛnkɛma zele ye ala la. 30Ɔvale kyɛnze ne mɔɔ bɛwowo bɛ sa nee bɛ gyakɛ anwo wɔ nuhua la ɔziele Ndanlɛ Sua ne nee azukponle ne avinli na ɔguale nzule nu. 31Mosisi, Aalɔn, yɛɛ ɔ mra mrenya ne mɔ wowole bɛ sa nee bɛ gyakɛ anwo ɛkɛ 32mekɛ biala mɔɔ bɛlɛkɔ Ndanlɛ Sua ne anu anzɛɛ bɛlɛsia bɛara azukponle ne anwo la, kɛmɔ Ɛdɛnkɛma zele Mosisi ala la. 33Mosisi wowale Ndanlɛ Sua ne nee azukponle ne anwo na ɔvale ɛdanlɛ ɔhendanle ye anuhɔlɛ kpole ne anu. Na Mosisi wiele gyima ne yɛ.
Ɛdɛnkɛma Ndanlɛ Sua ne azo amungu ne
(Ɛdi 9.15-23)
34 #
Yek 15.8
Akee amungu hedale Ndanlɛ Sua ne azo, na Ɛdɛnkɛma anyunlunyia ne yile sua ne tɛkɛɛ. 35Ɛhye ati Mosisi angola Ndanlɛ Sua ne anu wolo. Ɔboalekɛ amungu ne ɛva sua ne, yɛɛ Ɛdɛnkɛma anyunlunyia ne ɛyi sua ne tɛkɛɛ. 36Wɔ bɛ adendulɛ ne anu, mekɛ biala mɔɔ amungu ne kɛmaa ɔ nwo zo kɛvi Ndanlɛ Sua ne azo la Yizilayɛma tu bɛ bo kɔyɛ azokoɛleɛ wɔ ɛleka fofolɛ. 37Saa amungu ne ɛtɛyele ɔ nwo wɔ ɛkɛ ne a, bɛtɛnla azokoɛleɛ ɛkɛ ne, bɛndu bɛ bo.
38Ɔluakɛ wɔ bɛ adendulɛ ne anu bɛnwunle kɛ Ɛdɛnkɛma amungu ne keda Ndanlɛ Sua ne azo wɔ alehyenlɛ nu, na aledwolɛ nu noko a, ɛnee ɔle senle.
Currently Selected:
Ade 40: NB
Highlight
Copy
Compare
Share
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
