Ade 39
39
Sɛlɛvolɛma adɛladeɛ ne ɛnwonlɛ
(Ade 28.1-14)
1Bɛvale mboane enrinli buluwu, buluwu nee kɔkɔlɛ afonla, nee kɔkɔlɛ nyɛma bɛnwonle adɛladeɛ ngɛnlɛma kpalɛ mɔɔ sɛlɛvolɛ wula fa sonle wɔ Ɛleka Nwuanzanwuanza ne, kɛmɔ Ɛdɛnkɛma hilele Mosisi la bɛmanle Aalɔn.
2Bɛvale lenen nyɛma kɛnlɛma, mboane enrinli buluwu, buluwu nee kɔkɔlɛ afonla, kɔkɔlɛ, yɛɛ akɔlɛnlome bɛnwonle ɛzonlenlɛ tɛladeɛ ne mɔɔ bɛfɛlɛ ye yifɔdo la. 3Bɛvale hamenle bɛbolole ezukoa nvutuke na bɛpepɛle bɛ ndenrɛndenra bɛvale bɛbokale lenen nyɛma kɛnlɛma ne, mboane enrinli buluwu ne, buluwu nee kɔkɔlɛ afonla ne, yɛɛ kɔkɔlɛ ne bɛnwonle ɛdanlɛ ne. 4Bɛnwonle ndanlɛ ndenrɛndenra nwiɔ bɛsosɔle ɛzonlenlɛ tɛladeɛ yifɔdo ne abati nee ɔ bati. 5Bɛvale ninyɛne ko ne ala bie bɛnwonle akyeso bɛzɔle yifɔdo ne bɛmanle ɔ nee ye yɛle debie ko, kɛmɔ Ɛdɛnkɛma hanle hilele Mosisi ala la. 6Bɛzele kanɛlea awolɛ ne mɔ na bɛvale ezukoa nvutuke bɛtotole bɛ nloa. Bɛdɔle alagye bɛhɛlɛle Gyekɔbo amra bulu nee nwiɔ ne aluma wɔ zo. 7Bɛvale bɛbobɔle ɛzonlenlɛ tɛladeɛ ne abati nee ɔ bati ndanlɛ ndenrɛndenra nwiɔ ne azo. Ɛhye mɔ gyigyi ɛkɛ maa Yizilayɛ mbusua ekpunli bulu nee nwiɔ ne, kɛmɔ Ɛdɛnkɛma ɛha ɛhile Mosisi la.
Akɛnrazo aguzo ne ɛnwonlɛ
(Ade 28.15-30)
8Bɛvale ninyɛne mɔɔ bɛvale bɛnwonle ɛzonlenlɛ tɛladeɛ yifɔdo ne la ko ne ala bie bɛnwonle akɛnrazo aguzo ne na bɛnwonle nuhua kɛnlɛma kɛ yifɔdo ne anu ɛdeɛ ne la. 9Ɔ nloa nna ne amuala sɛ, bɛbɔle ɛdanlɛ ne nwo nwiɔ bɛnwonle. Ye tendenle le waa ko yɛɛ ye tɛtɛlɛ le waa ko. 10Bɛsolole ezukoa awolɛ mɔɔ sonle bolɛ la ɛhonlone nna zolɛ: ɛhonlone ne mɔɔ lumua la, bɛvale wulubi, topaze, yɛɛ ganɛte; 11ɛhonlone ne mɔɔ tɔ zolɛ nwiɔ la, bɛvale ɛmelade, safaya, yɛɛ daemɔn; 12ɛhonlone ne mɔɔ tɔ zolɛ nsa la, bɛvale tɛkɔese, agate, yɛɛ ameteze; 13yɛɛ ɛhonlone ne mɔɔ tɔ zolɛ nna la, bɛvale bɛlele, kanɛlea, yɛɛ gyasepa. Bɛvale ezukoa nvutuke bɛtotole ɛhye mɔ kɔsɔɔti anloa. 14Awolɛ bulu nee nwiɔ ne, ko biala bɛhɛlɛle Gyekɔbo amra mrenya ne mɔ ko duma zo, yɛɛ bɛgyi ɛkɛ bɛmaa Yizilayɛ mbusua ekpunli bulu nee nwiɔ ne. 15Bɛvale ezukoa nvutuke tagyee bɛyɛle ndweabane na bɛbɛkale ye kɛ nyɛma la bɛguale akɛnrazo aguzo ne azo. 16Bɛyɛle ezukoa nvutuke ndolebɛnloa nwiɔ nee ezukoa nvutuke ngɛba nwiɔ. Bɛvale ngɛba nwiɔ ne bɛsosɔle akɛnrazo aguzo ne anwuma mgbɛnezo nwiɔ ne, 17bɛvale ezukoa nvutuke ndweabane nwiɔ ne bɛwulowulale ngɛba nwiɔ ne anu, 18bɛvale ɔ ti nwiɔ ne bɛsosɔle ndolebɛnloa nwiɔ ne na bɛvale bɛsosɔle ɛzonlenlɛ tɛladeɛ yifɔdo ne ndanlɛ ndenrɛndenra nwiɔ ne mɔɔ wɔ ɔ bati nee ɔ bati la. 19Bɛyɛle ezukoa nvutuke ngɛba nwiɔ bɛsosɔle akɛnrazo aguzo ne anloa nwiɔ ne mɔɔ wɔ aze la akunlu ne mɔɔ gua ɛzonlenlɛ tɛladeɛ yifɔdo ne azo la; 20eza bɛyɛle ezukoa nvutuke ngɛba nwiɔ bɛsosɔle ɛzonlenlɛ tɛladeɛ yifɔdo ne abati nwiɔ ne anyunlu aze wɔ tɛladeɛ ne ayia zo nee akyeso kɛnlɛma ne anwuma. 21Bɛvale nyɛma buluwu bɛsosɔle akɛnrazo aguzo ne nee ɛzonlenlɛ tɛladeɛ ne ngɛba ne mɔ na bɛbɔle bɛ kpɔkɛ, amaa akɛnrazo aguzo ne amkpɔne aze na yeazinze akyeso ne azo fɔɔnwo.
Sɛlɛvolɛma adɛladeɛ bie mɔ ɛnwonlɛ
(Ade 28.31-43)
22Tɛladeɛ kpole ne mɔɔ bɛwula bɛgua ɛzonlenlɛ tɛladeɛ ne azo la, bɛvale mboane enrinli buluwu kɔsɔɔ a bɛnwonle a. 23Bɛvale ɛdanlɛ mɔɔ bɛnwo la bɛzɛle ɔ kɔme ne anu, amaa bɛwula a yeande. 24-26Ɔ bo ne mɔɔ bɛbu la, bɛvale lenen nyɛma kɛnlɛma, mboane enrinli buluwu, buluwu nee kɔkɔlɛ afonla, yɛɛ kɔkɔlɛ bɛnwonle bɛ ahunguma kɛ akutue la bɛhendɛhendanle ɔ nloa toonwo ɔyiale na bɛvale ezukoa nvutuke tagyee dɔne bɛdidile bɛ avinli, kɛmɔ Ɛdɛnkɛma hanle hilele Mosisi la.
27Bɛvale lenen nyɛma kɛnlɛma bɛnwonle anwuma adɛladeɛ bɛmanle Aalɔn nee ɔ mra mrenya ne mɔ, 28bɛvale lenen nyɛma bɛnwonle abɔtile, ahyɛlɛ, aze adɛladeɛ; 29eza bɛvale lenen nyɛma kɛnlɛma, mboane enrinli buluwu, buluwu nee kɔkɔlɛ afonla, yɛɛ kɔkɔlɛ bɛnwonle tabule mɔɔ bɛnwo nuhua, mɔɔ bɛfa bɛkye bɛ avinli la, kɛmɔ Ɛdɛnkɛma hanle hilele Mosisi la. 30Bɛvale ezukoa nvutuke tagyee bɛbolole ye ɛdɛbaa na bɛhɛlɛle zolɛ, “Bɛdu bɛzie ɛkɛ bɛmaa Ɛdɛnkɛma”, na bɛvale bɛbɔle belemgbunli abɔtile nwuanzanwuanza ne azo. 31Bɛvale ɛdanlɛ nyɛma buluwu bɛzɔle ye bɛvale bɛhendanle abɔtile ne anyunlu, kɛmɔ Ɛdɛnkɛma ɛha ɛhile Mosisi la.
Gyima ne awieleɛ
(Ade 35.10-19)
32Akee bɛwiele Ɛdɛnkɛma Ndanlɛ Sua ne si bɔkɔɔ. Yizilayɛma ne yɛle debie biala, kɛmɔ Ɛdɛnkɛma hanle hilele Mosisi ala la. 33Bɛvale Ndanlɛ Sua ne nee nwolɛ debie biala bɛrɛlɛle Mosisi, ye nzosɔnu ne mɔ, ye felɛmo ne mɔ, meɛbeanu ne mɔ, ye mbaka azika ne mɔ, nee bɛ adiabo ne mɔ; 34zolɛ ɛhedalɛ mboane nyinli nee mbɔnkye nwoma ne mɔɔ bɛwula bɛ ayile, nee mgbɛnu ɛdanlɛ ne; 35Ngyekyeleɛ Ɛlɛka ne mɔɔ awolɛ ndɛbandɛba ne mɔ gua nu la, ye mbaka ne mɔ nee ɔ ti ne; 36ɛkponle ne nee nwolɛ ninyɛne kɔsɔɔti, nee kpanwo ne mɔɔ bɛfa bɛbɔ azu bɛmaa Nyamenle la; 37ezukoa nvutuke tagyee kɛnlaneɛ baka ne, ye ahɛnlaneɛ ne mɔ, nwolɛ ninyɛne kɔsɔɔti, nee ahɛnlaneɛ ne mɔ nwole ne, 38ezukoa nvutuke azukponle ne, ɛkpokpalɛ nwole ne, ɛyɛlɛ evuanlɛ ne, Ndanlɛ Sua ne anlenkɛ ne anu ɛdanlɛ ne; 39kɔbele azukponle ne nee kɔbele kɛlakɛlɛ ne, ye mbaka ne mɔ, nee nwolɛ debie biala, kyɛnze ne mɔɔ bɛwowo bɛ sa nee bɛ gyakɛ anwo nuhua la nee ɔ bo ne; 40alie ne anwo banelielɛ ndanlɛ, bɛ mbaka azika nee bɛ adiabo ne mɔ, bane ne mɔɔ bɛliele la anlenkɛ ne anu ɛdanlɛ ne nee nwolɛ nyɛma, Ndanlɛ Sua ne adakola ne mɔ; 41yɛɛ adɛladeɛ nwuanzanwuanza ngɛnlɛma ne mɔ mɔɔ sɛlɛvolɛma, Aalɔn nee ɔ mra mrenya ne mɔ bawula wɔ Ɛleka Nwuanzanwuanza ne la. 42Yizilayɛma yɛle gyima ne amuala, kɛmɔ Ɛdɛnkɛma hanle hilele Mosisi ala la. 43Mosisi nleɛnleanle bɛ kɔsɔɔti na ɔnwunle kɛ bɛyɛ bɛ, kɛmɔ Ɛdɛnkɛma ɛha ɛhile ye la. Yemɔti Mosisi yilale bɛ.
Currently Selected:
Ade 39: NB
Highlight
Copy
Compare
Share
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
