Ade 24
24
Bɛzɔ Ngyekyeleɛ ne anloa
1Akee Ɛdɛnkɛma zele Mosisi kɛ, “Ɛ nee Aalɔn, Needabe, yɛɛ Abaehu, nee Yizilayɛ mgbanyima abulasuu ɛrɛla me nwo ɛke wɔ boka ye azo. Bɛgyinla moa ekyii na bɛzonle me. 2Mosisi angomekye a babikye Ɛdɛnkɛma anwo ɛkɛ a; menli mɔɔ ɛha la ɛnrɛbikye ye, yɛɛ menli ne noko ɛnrɛhɔ boka ne azo bie.”
3Mosisi rahanle mɔɔ Ɛdɛnkɛma hanle la amuala nee nwolɛ mɛla ne amuala hilele menli ne. Menli ne mɔ kɔsɔɔti bɔle nu hanle kɛ, “Edwɛkɛ biala mɔɔ Ɛdɛnkɛma ɛha la, yɛbali zolɛ.” 4Na Mosisi hɛlɛle Ɛdɛnkɛma edwɛkɛ ne amuala. Ɔdwazole nwonlomɔ mangyee ne ɔzile azukponle nee mpila bulu nee nwiɔ, kɛmɔ Yizilayɛ mbusua ekpunli bulu nee nwiɔ ne de la wɔ boka ne abo. 5Na ɔzoanle Yizilayɛ mgbavolɛ ɔmanle bɛhɔbɔle ɛyelalɛ azu na bɛvale nlankɛ nyinli bɛbɔle anzonudwolɛ azu bɛmanle Ɛdɛnkɛma. 6Na Mosisi wolale mogya ne foa ko guale ahyɛnze nu, na ɔvale foa ko ne ɔguale azukponle ne anwo. 7Akee ɔvale ngyekyeleɛ buluku ne, na ɔgengale ɔhilele menli ne; na bɛhanle kɛ, “Edwɛkɛ biala mɔɔ Ɛdɛnkɛma ɛha la yɛbayɛ, yɛɛ yɛbayɛ tieyɛ yeamaa ye.”
8 #
Mat 26.28; Mak 14.24; Luk 22.20; 1 Kɔl 11.25; Hib 9.19-20; 10.29 Mosisi vale mogya ne dole guale menli ne anwo, na ɔhanle kɛ, “Kɛmɔ Ɛdɛnkɛma edwɛkɛ ne se la, mogya ye sɔ ngyekyeleɛ ne mɔɔ Ɛdɛnkɛma nee bɛ ɛkyekye la anloa.”
9Akee Mosisi nee Aalɔn, Needabe, Abaehu, yɛɛ Yizilayɛ mgbanyima abulasuu hɔle boka ne azo, 10na bɛnwunle Yizilayɛ Nyamenle ne. Bɛnwunle debie mɔɔ zɔho ezukoa bolɛ buluwu mɔɔ sonle bolɛ na nuhua te kɛ anwomanyunlu la wɔ ɔ gyakɛ abo. 11Ɛdɛnkɛma angu Yizilayɛ mgbanyima ɛhye mɔ. Bɛnwunle Nyamenle, bɛlile na bɛnlonle.
Mosisi wɔ Boka Saenae azo
12Ɛdɛnkɛma zele Mosisi kɛ, “Bɛla me nwo ɛke wɔ boka ye azo na kendɛ ɛkɛ. Mebava awolɛ ndɛbandɛba ne mɔ mɔɔ mehɛlɛ mɛla ne mɔ mɔɔ bɛbahilehile bɛ la zolɛ la meamaa wɔ.” 13Yemɔti Mosisi nee ye sonvolɛ Dwɔhyua dwazole, na Mosisi hɔle Nyamenle boka ne azo. 14Ɔhanle ɔhilele mgbanyima ne mɔ kɛ, “Bɛhendɛ yɛ ɛke kɔkpula kɛ yɛkɛzia yɛkɛra la. Aalɔn nee Hule nee bɛ wɔ ɛke, awie mɔɔ kɛnyia edwɛkɛ la, ɔhɔ bɛ nwo ɛkɛ.”
15Akee Mosisi hɔle boka ne azo na amungu hedale boka ne azo. 16-17Ɛdɛnkɛma anyunlunyia ne dale boka Saenae azo, na Yizilayɛma nwunle ye kɛ ɔle kɛ senle ɔlɛsɔ boka ne ati zo lɔ. Amungu ne hedale boka ne azo kenle nsia, na ye kenle nsuu ne azo Ɛdɛnkɛma vɛlɛle Mosisi wɔ amungu ne anu. 18Mosisi wolole amungu ne anu na ɔhɔle boka ne azo. Mosisi lile kenle abulanla, ewiazo nee nɔɔzo wɔ boka ne azo.
Currently Selected:
Ade 24: NB
Highlight
Copy
Compare
Share
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
