Ade 2
2
Mosisi awolɛ ne
1Mekɛ ne anu nrenya bie mɔɔ vi Livae abusua ekpunli ne anu la gyale raalɛ wɔ abusua ekpunli ko ne ala anu. 2#Gyi 7.20; Hib 11.23 Raalɛ ne vale ɛkolɛ na ɔwole ralɛ nrenya; na mɔɔ ɔnwunle kɛ ralɛ ne anwo si yɛ fɛ la, ɔvale ye ɔveale toonwo siane nsa. 3Na mɔɔ ɛnee akee ɔfa ye ɔfea bieko a ɔnyɛ boɛ la, ɔvale ndɔ ɔnwonle kɛndɛne, ɔvale bilewu ɔfɔlele nuhua, amaa nzule angɔ nu, ɔvale kakula ne ɔdole nuhua na ɔvale ɔhɔziele ndɔ ne anu wɔ azule ne anloa. 4Akee kakula ne adiema raalɛ gyinlanle moa ekyii zinzale ye, amaa yeanwu edwɛkɛ mɔɔ kɛzi kakula ne anwo zo la.
5Yigyibiti belemgbunli ne ara raalɛ ne nee ye sonvolɛma hɔle azule ne anu kɛ ɔkabia, ɛnee ye sonvolɛ mraalɛ ne mɔ luolua azule ne anloa. Mɔɔ ɔlɛbia la ɔnwunle kɛ kɛndɛne ne gyi ndɔ ne anu; ɔmanle ye sonvolɛ raalɛ ko hɔvale rale. 6Ɔdukuele zolɛ la ɔnwunle kakula ne, na alɔbɔlɛ, ɛnee kakula ne ɛlɛsu. Ɔlile kakula ne anwo nyane na ɔhanle kɛ, “Hibuluma ne amra ne mɔ ko ɛne.”
7Ɔ diema raalɛ ne bizale belemgbunli ara raalɛ ne kɛ, “Mengɔnvɛlɛ Hibulu mraalɛ ne mɔ ko memaa ɔrava kakula ne ɔhɔli ye adane ɔmaa wɔ ɔ?”
8Belemgbunli ara raalɛ ne zele ye kɛ, “Ɛhɛe, kɔ.” Yemɔti kakula raalɛ ne hɔvɛlɛle kakula ne ɔ nli. 9Belemgbunli ara raalɛ ne zele ye kɛ, “Fa kakula ɛhye kɔ, kɔli ye adane maa me na mebadua wɔ kakɛ.” Yemɔti raalɛ ne vale kakula ne hɔlile ye adane. 10#Gyi 7.21 Kakula ne nyinle, ɔ nli vale ye rɛlɛle belemgbunli ara raalɛ ne, na ɔrayɛle ɔ ra. Ɔdonle ye Mosisi,#2.10 Mosisi: Hibulu se Mohye. na ɔzele kɛ, “Ɔboalekɛ menyele ye menvile nzule nu.”
Mosisi nriandi ahɔ Medean
11Mosisi nyinle la, kenle ko ɔhɔkpɔlale ye menli ne, ɔhɔnleanle gyima ɛsesebɛ mɔɔ bɛlɛyɛ la, na ɔnwunle kɛ Yigyibitinli bie ɛlɛbo ye menli Hibuluma ne mɔ ko. 12Ɔdole ɔ nye bɛne nee fema na yeannwu awie biala la, ɔhunle Yigyibitinli ne na ɔvunle ye ɔveale ɛnwea ne anu. 13Aleɛ hyenle na eza ɔhɔle bɛ ɛkpɔlalɛ bieko la, ɛnee Hibuluma nwiɔ ɛlɛko. Ɔzele nuhua ne mɔɔ anyɛ ye boɛ la kɛ, “Duzu ati a wɔbɔ ɛ gɔnwo ɛ?”
14Nrenya ne buale ye kɛ, “Nwane a yɛle wɔ yɛ nwo zo neavolɛ nee ndɛnebuavolɛ a? Wɔdwenle nwo kɛ ɛku me, kɛmɔ ɛhunle Yigyibitinli ne la ɔ?” Akee Mosisi zulole na ɔhanle ɔhilele ɔ nwo kɛ, “Nɔhalɛ, edwɛkɛ ne ɛla ali.” 15-16#Gyi 7.29 Mɔɔ belemgbunli ne dele edwɛkɛ ne la, ɔyɛle kɛ ɔku Mosisi. Na Mosisi nriandile hɔle Medean maanle nu.
Kenle ko Mosisi hɔdɛnlanle bula bie anwo, na Sɛlɛvolɛ Gyɛtulo mɔɔ wɔ Medean la amra mraalɛ nsuu ne rale bula ne azo kɛ bɛbaza nzule bɛahɔgua bɛ ze mboane nee mbɔnkye adidi nlɛka ne mɔ anu bɛamaa bɛanlo. 17Mboaneneavolɛma bie ravoanle bɛ; na Mosisi dwazole boale bɛ na ɔnleanle ɔmanle mboane ne mɔ nzule. 18Mɔɔ bɛziale bɛhɔle la bɛ ze Riliwɛle#2.18 Riliwɛle: Sonla ko ne ala a bɛfɛlɛ ye Gyɛtulo la. bizale bɛ kɛ, “Duzu ati a ɛnɛ bɛra sua nu ndɛndɛ zɛhae a?”
19Bɛhanle kɛ, “Yigyibitinli bie liele yɛ ti wɔ mboaneneavolɛma ne asa anu, ɔsesale nzule ne bie ɔmanle yɛ na eza ɔnleanle ɔmanle mboane nee mbɔnkye ne mɔ nlonle nzule.”
20Riliwɛle bizale ɔ mra mraalɛ ne mɔ kɛ, “Na ɔwɔ nienwu? Duzu ati a bɛgyakyi ye nehane ɛ? Bɛvɛlɛ ye bɛmaa ɔrali debie.”
21Na Mosisi kponlenle zolɛ ɔ nee nrenya ne dɛnlanle. Ɔvale ɔ ra raalɛ Zepɔla ɔmanle Mosisi gyale.
22Ɔ nee ye wole ralɛ nrenya. Mosisi hanle hilele ɔ nwo kɛ, “Mele ɛyɛvolɛ wɔ awie mɔ maanle nu” Yemɔti ɔdonle ye Gɛhyɔm.#2.22 Gɛhyɔm: Duma ɛhye abo a le “Ɛyɛvolɛ.”
23Mekɛ ne hɔle bie kpalɛ la Yigyibiti belemgbunli ne wule. Akee Yizilayɛma nwunle amaneɛ kpole kpalɛ wɔ akɛlɛzonlenlɛ nu. Bɛzunle bɛvɛlɛle moalɛ, na bɛ ɛzunlɛ ne dwule Nyamenle anyunlu. 24#Mɔl 15.13-14 Nyamenle dele bɛ ɛzunlɛ ne na ɔhakyele ye ngyekyeleɛ ne mɔɔ ɔ nee Ebileham, Ayezeke, nee Gyekɔbo kyekyele la. 25Na Nyamenle nwunle Yizilayɛma tɛnlabelɛ nu, na nyane hanle ye.
Currently Selected:
Ade 2: NB
Highlight
Copy
Compare
Share
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
