Asomafoɛ 2

Sunzum Krongron wale asomafoɛ nemɔ so

1 # Lew 23.15-21; Deut 16.9-11; Aso 1.14 Pɛntekɔso kyẽa ne dwuli ne, né agyidifoɛ nemɔ amukoraa baboa bɛ noa neka horɛ. 2Na mvum nu, dede bie bɔ ɔte kyɛ mvrama bɔ ye noa yɛ hye ɔ ofili nyameɛso wale, na ooyili awuro bɔ né bɛwɔ nu ne anu tɛkyɛ. 3#Mat 3.11 Na nikyee bie bɔ ɔte kyɛ temverema bɔ nu apakyepakye, bɔ ɔte kyɛ see bɔ ogye ɔ, ɔyele ye nwo ali hyirele bɛ, na nu hyehyɛle oogyinagyinane bɛ ti afia ngoko ngoko. 4#Aso 10.44-46 Na Sunzum Krongron yili bɛ mukoraa bɛ nu tɛkyɛ, na bɛhyɛle ye bo bedwudwole edwudwolɛ foforɛ biemɔ, kyɛbɔ Sunzum ne fa mane bɛ kyɛ bɛhã ɔ.

5 # Aso 13.26 Né Yudafoɛ nyamesurofoɛ biemɔ bɔ befi ewiase maen maen amukoraa nu te Yerusalem. 6Na bɛtele sɔ dwudwolɛ woo nen, mmenia pee wale beeyiale, na ɔyɛle bɛ nwanwa paa; ofikyɛ bɛ nu biala tele kyɛ agyidifoɛ ne dwudwo wɔ ye bɔbɔ bɔ ótie ne kuro dwudwolɛ nu. 7Bɛ nwo dwirili bɛ, na ɔyɛle bɛ nwanwa maa bɛhane kyɛ, “Mmenia hemɔ amukoraa bɔ bedwudwo ye, aso bɛtte Galileafoɛ anaa! 8Na ɔyɛle sɛɛ bɔ yɛ mukoraa yɛte kyɛ bédwudwo wɔ yɛ bɔbɔ yɛ kuro dwudwolɛ nu ye? 9Yɛfi Patia, Medese, ne Elam; Mesopotamia, Yudea, ne Kapadokia; Ponto ne Asia, 10Frigyea ne Pamfilia, Misraim ne Libia aseɛ bɔ opingye Kirene. Yɛ nu biemɔ koso fi Rome, 11Yudafoɛ ne Amaenmaensofoɛ bɔ baaboka Yudasom so ɔ, ebiemɔ koso befi Krete ne Arabia, nakoso yɛ mukoraa yɛte kyɛ bɛ́fa yɛ bɔbɔ yɛ dwudwolɛ bɛka Nyameɛ anwanwadwuma bɔ wayɔ ɔ!” 12Bɛ mukoraa bɛ nwo dwirili bɛ, na b’adwene yɛle bɛ naa; na bebisabisale bɛ nwo kyɛ, “Na ɛhe bo kyire sɛɛ?” 13Nakoso ebiemɔ koso serele bɛ bɛhane kyɛ, “Nzaa foforɛ yeɛ wabo bɛ ɔ!”

Petro ma bɛ mmuayɛɛ

14Petro ne asuafoɛ buru ne ko nemɔ bedwɔsole, na ɔmane ye komvi so dwudwole serɛ hyirele ɛlɔen ne kyɛ, “Yudea mmienzua ne ɛmɔ bɔ ɛmɔte Yerusalem amukoraa, ɛ́mɔyɛ asoɛ betie me, ná ɛ́mɔma ngyire ɛmɔ ɛhe abo. 15Sɔ mmenia hemɔ, nna nzaa yeɛ wabo bɛ kyɛbɔ ɛmɔsusu ne; bekye po yeɛ wabɔ ngyerɛmɔ nnɔngono ɔ. 16Na mmom ɛhe ole bɔ ngɔmhyɛlɛniɛ Yowel hane kyɛ,

17 # Yow 2.28-32 ‘Nyameɛ nwa: Na ɔkɔwa kyɛ, ngyẽa bɔ oli nziɛ ne anu,

ngohwie me Sunzum ngogua anwoɔnaen amukoraa so,

na ɛmɔ mma mmienzua ne ɛmɔ mmrasua kɔhyɛ ngɔm;

ɛmɔ mmerandeɛ mɔ konya nyekyire,

na ɛmɔ mbanyi mɔ kɔhyehye laleɛ;

18amba, me ngoaa ne m’afaneɛ mɔ so

yeɛ sɔ ngyẽa nemɔ anu ngohwie me Sunzum ngogua ɔ,

na bɛkɔhyɛ ngɔm.

19Na ngɔma anwanwadeɛ kɔwa nyameɛso wɔ anwuro,

yeɛ nzɛngyerɛnneɛ wɔ aseɛ so wɔ ase;

mogya, see ne nwosina munguu kɔwa;

20Eyia kɔkakyi awosii,

na ɛsraen kɔyɛ kyɛ mogya

koraka ná Awurade animnyam kyẽa piri ne awa.

21 # Rom 10.13; Yow 3.1-5 Na ɔkɔwa kyɛ ebiala bɔ

ɔkɔbɔ Awurade dumaa ne, okonya ngoa.’

22“Yisraelfoɛ, ɛmɔtie edwirɛ he! Yesu bɔ ofi Nasarɛte ne, ɔte sona bɔ Nyameɛ yele ye tumi ne hyirele ɛmɔ wɔ nzɛngyerɛnneɛ ne anwanwadeɛ bɔ Nyameɛ fale ye so yɔle, kyɛbɔ ɛmɔ bɔbɔ bɛse ne, ofikyɛ ɛhe amu sili ɛmɔ nyunu. 23#Mat 27.35; Mak 15.34; Luk 23.33; Yoh 19.18; Aso 4.28 Na sɔ Yesu ne, bɛyele ye bɛmane, ɔnate kyɛ né Nyameɛ ayɔ sɔ nhyehyɛleɛ ne, yeɛ né koso ɔse sɔ dada. Na ɛmɔfale bɔnefoɛ so bɛbɔle ye mmeamudua nu behuni ye. 24#Mat 28.5-6; Mak 16.6; Luk 24.5; Aso 3.15 Nakoso Nyameɛ tingyele ye; olele ye fili ewue sa nu, ofikyɛ ɔyɛ se ma ewue kyɛ okonya ye so tumi ɔ. 25#Edw 16.8-11 Ɔnate kyɛ Dawide hane ye nwo dwirɛ kyɛ,

‘Nwuni Awurade wɔ me nyunu mmerɛ biala,

ofikyɛ ɔwɔ me sa famaa so, na mengosuro.

26Yiti m’ahone lili ahurusi,

na me temverema nwo sandele ye;

na me nwonaen koso kɔla wɔ anyelasoɛ nu.

27Ofikyɛ ɛngɔyakyi me kra ma ɔngɔha ɛborɔ,

yeɛ ɛngɔma wɔ Krongronniɛ ne ɔngɔporɔ wɔ ngɔporɔ ɛborɔ kumaa nu.

28Ahyire me ngoa atee;

na ɔnate kyɛ ɛne me wɔ berɛ ne ati,

ngonya anika mmorosoɛ.’

29 # Aso 13.36; 1 Ahe 2.10 “Aliɛmaa mɔ, odi kyɛ mepakye nu mekã yɛ nana Dawide nwo dwirɛ mekyire ɛmɔ, kyɛ owuli, na besiele ye; na ye asieleɛ wɔ yɛ wa kekesaala ye. 30#Edw 89.3-4; 2 Sam 7.12-13 Né ɔte ngɔmhyɛlɛniɛ, na né ɔse kyɛ Nyameɛ ata ndaen wahã wahyire ye kyɛ ɔkɔma ye bosofoɛ nemɔ ko koli ye bia. 31#Edw 16.10 Onwuni bɔ kyẽa bie okosi ɔ, yiti ɔhane Kristo wutingyelɛ ne nwo dwirɛ kyɛ,

‘Wanyakyi ye wɔ ɛborɔ;

na ye nwonaen amborɔ kumaa nu.’

32“Nyameɛ atingye sɔ Yesu ne wafi ewue nu, na yɛ mukoraa yɛte ɛhe nwo adanzefoɛ. 33Yiti Nyameɛ mane ye so hɔle ye sa famaa so; na onyane Sunzum Krongron bɔhyɛ ne fili Baba ne berɛ, na ɛhe yeɛ wahwie wagua yɛ so bɔ ɛmɔnwu ye ná ɛmɔte ye. 34#Edw 110.1 Ɔnate kyɛ nna Dawide yeɛ ɔhɔle nyameɛso ne, na mmom ye bɔbɔ ɔhane kyɛ,

‘Awurade hã hyirele m’Awurade kyɛ:

Tena me sa famaa so

35kɔpem kyɛ ngɔfa wɔ pɔfoɛ mɔ ngɔyɛ wɔ gya bo ndiasoɛ ɔ.’

36 # Aso 5.31 “Yiti ma Yisrael awuro ama mukoraa benwu ye tofee kyɛ, Yesu he bɔ ɛmɔbɔle ye mmeamudua nu ne ala yeɛ Nyameɛ ayɛ ye Awurade ɔne Kristo ne ɔ.”

Agyidifoɛ foforɛ apee nza

37 # Aso 16.30 Na bɛtele sɔ dwirɛ ne nen, opusuli bɛ paa, na bebisale Petro ne asomafoɛ ngaa nemɔ kyɛ, “Aliɛmaa mɔ, nzu yeɛ yɛ́yɔ ɔ?” 38#Aso 3.17-19; Luk 24.47 Na Petro buale bɛ kyɛ, “Ɛ́mɔsakyera ɛmɔ adwene ná ɛ́mɔma bɛbɔ ɛmɔ nu biala asu wɔ Yesu Kristo dumaa nu, ma ɛ́mɔnya bɔnefakyɛ; na ɛmɔkonya Sunzum Krongron akyɛdeɛ ne. 39#Yow 2.32 Ofikyɛ Nyameɛ anohoba ne wɔ berɛ ma ɛmɔ ne ɛmɔ mma ne bɛ bɔ bɛwɔ dedeede, ɔne ebiala bɔ Awurade, yɛ Nyameɛ, kɔfrɛ ye kɔwa ye berɛ ɔ.”

40 # Deut 32.5; Flp 2.15 Na Petro fale edwirɛ tole dwirɛ nwo dwudwole pee, na otuli bɛ foɛ kyɛ, “Ɛ́mɔhwe ɛmɔ nwo béfi ɛnɛmmafoɛ nzɛmmɔnefoɛ hemɔ anwo!” 41Na bɛ bɔ belele ye dwirɛ ne belili ne, bɛmane bɛ nwo ate maa bɛbɔle bɛ asu, na mmenia kɔyɛ apee nza bɛɛbokale bɛ so sɔ kyẽa ne ala. 42#Aso 20.7 Na betuli bɛ nwo besiele berɛ besuane asomafoɛ nemɔ ngyerɛkyerɛ ne b’abiɛngoɛfalɛ ne paanoobubulɛ ne mbaeɛbɔlɛ.

Agyidifoɛ nemɔ asetena

43Asomafoɛ ne yɔle nzɛngyerɛnneɛ ne anwanwadeɛ pee, na bɛ nwo yɛle sona biala suro. 44#Aso 4.32-35 Agyidifoɛ ne amukoraa bɛhɔle so beyiale neka horɛ, na ebiala nningyein yɛle obiɛngo deɛ. 45Bɛtɔnene b’agyapadeɛ ne bɛ nwo nningyein, na bɛhyɛle sikaa ne bɛmane ebiala kyɛbɔ ohia ɔ. 46Na alehyeleɛ biala, beyiale asɔneyɛɛ sua nu ngabonu nu, belili adi wɔ b’awuro mɔ nu, na bɛfale anigye ne ahone bɔ nu te ɔ bedidili; 47bɛkamvole Nyameɛ, na maen ne anu ama mukoraa hurole bɛ dwirɛ. Alehyeleɛ biala Awurade fale bɛ bɔ olele bɛ ngoa ne bokale bɛ so.

Currently Selected:

Asomafoɛ 2: EBP

Highlight

Copy

Compare