MIKA 7
7
MOKUNA VII.
1 ʻO ka emi ʻana o nā kānaka pono; a no ka hewa o nā kānaka, hōʻoluʻolu ke kāula i kona manaʻo ma ke Akua. 8 Manaʻo ka ʻekalesia e lanakila ma luna o kona poʻe ʻenemi, a loaʻa ka pōmaikaʻi. 14 ʻO ka pule a me ka wānana no nā manawa pōmaikaʻi; a no ka lokomaikaʻi o ke Akua i kona poʻe kānaka.
1¶ Auē iaʻu! No ka mea, ua like au
Me ka ʻohi ʻai ʻana o ke kau,
e like me nā koena hua waina o ka ʻohi ʻana;
ʻAʻohe huhui e ʻai ai;
Makemake ihola kuʻu naʻau i ka hua fiku mua.
2Ua nalo ka mea lokomaikaʻi mai ka ʻāina aku;
ʻAʻohe mea pono i waena o nā kānaka;
Ke hoʻohālua nei lākou a pau no ke koko;
Hoʻohei iho lākou, ʻo kēlā mea kēia mea i kona hoahānau, i ka ʻupena.
3Hana hewa ikaika hoʻi lākou me nā lima;
Noi aku ka luna, a me ka luna kānāwai i uku;
A ʻo ke kanaka nui, ʻo ia ke hōʻike aku i ka makemake o kona naʻau;
Pēlā nō lākou e huikau ai ia mea.
4ʻO ka mea maikaʻi o lākou ua like me ka lāʻau ʻoʻoi;
A ʻo ka mea pono, ua ʻoiʻoi ia ma mua o ka pā lāʻau ʻoiʻoi.
ʻO ka lā o kou poʻe kiaʻi,
A ʻo kou hoʻopaʻi ʻana, e hiki mai nō ia;
ʻĀnō e hiki mai ai ko lākou pōpilikia.
5Mai hilinaʻi ʻoukou i ka makamaka,
Mai paulele i ka hoalauna;
E hoʻopaʻa i ka puka o kou waha
Mai ka mea e moe ana ma kou poli.
6No ka mea, hoʻowahāwahā ke keiki kāne i kona makua kāne,
Kūʻē mai ke kaikamahine i kona makuwahine,
ʻO ka hūnōna wahine i kona makuahūnōwai wahine,
ʻO nā ʻenemi o ke kanaka, ʻo nā kānaka nō ia o kona hale iho.
7¶ A e nānā aku au iā Iēhova;
E kali aku au i ke Akua o kuʻu ola;
E hoʻolohe mai koʻu Akua iaʻu.
8Mai hauʻoli ʻoe ma luna oʻu, e koʻu ʻenemi;
No ka mea, a i hāʻule iho au, e ala hou aʻe nō;
A i noho au i ka pouli, ʻo Iēhova ka mālamalama noʻu.
9¶ E hoʻomanawanui nō au i ka inaina o Iēhova,
No ka mea, ua hana hewa nō au iā ia,
A hoʻāpono mai ia i kaʻu mea, a e hoʻopaʻi aku nō ia noʻu;
A lawe mai nō ia iaʻu i waho i ka mālamalama,
A e ʻike aku au i kona pono.
10A e ʻike kou ʻenemi ia mea,
A e uhi mai ka hilahila i ka mea i ʻōlelo mai ai iaʻu,
“ʻAuhea ʻo Iēhova kou Akua?”
E ʻike auaneʻi koʻu mau maka iā ia;
ʻĀnō e hehi ʻia ʻo ia i lalo, e like me ka lepo o nā alanui.
11I ka lā e hana ʻia ai kou mau pā pōhaku,
Ia lā e lawe loa ʻia aku ke kānāwai.
12Ia lā e hele mai ia i ou lā mai ʻAsuria mai, a i ʻAigupita,
A mai ʻAigupita a ka muliwai,
A mai ke kai a ke kai,
A mai ka mauna a ka mauna.
13Akā, e lilo ka ʻāina i neoneo no ka poʻe e noho ana i loko,
A no ka hua o kā lākou mau hana.
14¶ E hānai ʻoe i kou poʻe kānaka me kou koʻokoʻo,
Ka poʻe o kou hoʻoilina,
Ka poʻe e noho mehameha ana ma ka ulu lāʻau,
I waena o Karemela;
E ʻai lākou ma Basana, a ma Gileada,
E like me ka manawa kahiko.
15“E like me nā lā o kou puka ʻana, mai ka ʻāina ʻo ʻAigupita mai,
E hōʻike aku au iā ia i nā mea kupanaha.”
16E ʻike mai nā lāhui kanaka,
A e hilahila nō ko lākou ikaika a pau;
A e kau lākou i ka lima ma luna o ka waha,
E kuli hoʻi ko lākou mau pepeiao.
17E palu lākou i ka lepo me he nahesa lā,
E kolo lākou mai kā lākou mau lua mai,
E like me nā mea kolo o ka honua,
E weliweli lākou iā Iēhova ko kākou Akua,
A e makaʻu lākou nou.
18ʻO wai lā ke Akua e like me ʻoe, e kala ana i ka hewa,
A e māʻalo aʻe ana i ka hala o ke koena o kona hoʻoilina?
ʻAʻole ia e hoʻomau loa aku i kona inaina;
No ka mea, ke makemake nei nō ia i ke aloha.
19E hoʻi hou mai nō ia, a e aloha mai nō ia iā kākou;
A hehi i lalo nō ia i ko kākou mau hewa;
A e hoʻolei aku ʻoe i ko lākou hewa a pau
I loko o ka hohonu o ke kai.
20A e hāʻawi mai nō ʻoe i ka ʻoiaʻiʻo iā Iakoba,
A me ka lokomaikaʻi iā ʻAberahama,
Ka mea āu i hoʻohiki ai i ko mākou mau kūpuna
Mai ka wā kahiko mai.
Currently Selected:
MIKA 7: KBH
Highlight
Share
Copy
Want to have your highlights saved across all your devices? Sign up or sign in
Ka Baibala Hemolele © Partners Development Foundation, 2018.
