NAHUMA 1
1
MOKUNA I.
1 No ka inaina o ke Akua i kona poʻe ʻenemi. 7 Ke aloha o ke Akua i kona poʻe kānaka; a huhū i nā ʻenemi. 9 He wānana no ka luku ʻana i ke aliʻi o ʻAsuria, a me kona poʻe kaua, a me ka hauʻoli ʻana o nā Iudaio.
1¶ Ka ʻōlelo no Nineva. ʻO ka buke o ka wānana a Nahuma, no ʻElekosa,
2¶ Ua lili ke Akua, a ʻo Iēhova ka mea hoʻopaʻi,
ʻO Iēhova ka Mea hoʻopaʻi, a he huhū kona;
ʻO Iēhova ka Mea hoʻopaʻi i kona poʻe kūʻē,
A ʻo ia ke mālama i ka huhū no kona poʻe ʻenemi.
3Ua hoʻokaʻulua ʻo Iēhova i ka huhū, a he nui ka mana,
ʻAʻole loa ia e kala wale aku;
Aia nō ke ala o Iēhova, i loko o ka puahiohio, a me ka ʻino,
A ʻo nā ao ka lepo o kona mau wāwae.
4Pāpā aku nō ia i ke kai, a hoʻomaloʻo ihola ia mea,
A hoʻomaloʻo iho i nā muliwai a pau;
Ua mae ʻo Basana, a me Karemela;
A ua mae ka pua o Lebanona.
5Ua hoʻonaue ʻia nā mauna e ia,
A ua heʻe ihola nā puʻu;
Neʻeneʻe ka ʻāina iā ia iho mai kona alo aʻe,
A ʻo ka honua, a me nā mea a pau e noho ana i loko.
6ʻO wai lā ka mea e kū i mua o kona inaina?
ʻO wai lā ka mea e kū mai i ka wela o kona huhū?
Ua ninini ʻia kona huhū me he ahi lā,
Ua hiolo iho nā pōhaku ma ona lā.
7Ua maikaʻi ʻo Iēhova,
He pākū ʻo ia i ka lā pōpilikia;
A ua ʻike nō ia i ka poʻe hilinaʻi iā ia.
8Me ka wai nui e holo ana,
A hoʻōki loa aku ia i kona wahi,
A e hahai ka pouli i kona poʻe ʻenemi.
9¶ He aha ko ʻoukou manaʻo kūʻē iā Iēhova?
E hoʻōki loa aku ia,
ʻAʻole e hiki pālua mai ka pōpilikia.
10No ka mea, e like me nā lāʻau kukū,
Ua hui pū ʻia lākou,
A ua ʻona lākou e like me ka poʻe ʻona,
E hoʻopau ʻia lākou e like me ka ʻōpala maloʻo loa.
11Ua puka mai ka mea mai ou mai lā
E manaʻo hewa ana iā Iēhova;
He kākāʻōlelo hewa.
12Pēnēia i ʻōlelo mai ʻo Iēhova,
“Inā ua maluhia lākou, a nui hoʻi,
A e hōʻoki ʻia lākou pēlā, a e hele aʻela ia;
A ua hoʻohaʻahaʻa aku au iā ʻoe,
ʻAʻole naʻe au e hoʻohaʻahaʻa hou aku iā ʻoe.
13“ʻĀnō hoʻi, e hemo iaʻu kāna ʻauamo mai ou aku lā;
A e moku iaʻu kou mau kaula.”
14¶ A ua kauoha mai ʻo Iēhova nou,
“ʻAʻole e lūlū hou ʻia kou inoa;
Mai loko mai o ka hale o kou mau akua,
E ʻoki aku au i ke kiʻi kālai, a me ke kiʻi hoʻoheheʻe;
E hana iho au i kou hale kupapaʻu;
No ka mea, ua hoʻowahāwahā ʻia ʻoe.”
15¶ Aia hoʻi, ma luna o nā mauna nā wāwae o ka mea e haʻi ana i ka mea maikaʻi,
E hōʻike ana hoʻi i ka malu!
E Iuda, e mālama i kāu mau ʻahaʻaina;
E hoʻokō i kāu mau hoʻohiki ʻana;
No ka mea, ʻaʻole e hele hou ka mea ʻaiā ma ou lā,
Ua ʻoki loa ʻia aku ʻo ia.
Currently Selected:
NAHUMA 1: KBH
Highlight
Share
Copy
Want to have your highlights saved across all your devices? Sign up or sign in
Ka Baibala Hemolele © Partners Development Foundation, 2018.
