KA ʻEUANELIO I KĀKAU ʻIA AI E MATAIO 2

MOKUNA II.

1 Ka hele ʻana mai o ka poʻe māgoi. 13 Ka hele ʻana o Iosepa mā i ʻAigupita. 16 Ka pepehi ʻana o Herode i nā keiki o Betelehema. 19 Ka hoʻi ʻana mai o Iosepa i Nazareta.

1¶ A hānau ʻia ʻo Iesū ma Betelehema i Iudea, i ke kau iā Herode ke aliʻi, aia hoʻi, hele maila nā māgoi mai ka ʻĀina Hikina mai a Ierusalema,

2i ka ʻī ʻana mai, “Ai lā i hea ka Mea i hānau iho nei i Aliʻi no ka poʻe Iudaio? No ka mea, ua ʻike mākou ma ka ʻĀina Hikina i kona hōkū, a ua hele mai nei mākou e kukuli hoʻomaikaʻi iā ia.”

3A lohe aʻela ʻo Herode ke aliʻi, ʻapoʻapo aʻela kona ʻōʻili, ʻo ia a me ko Ierusalema a pau.

4A laila, hōʻuluʻulu aʻela ia i ka poʻe kāhuna nui a me ka poʻe kākau ʻōlelo a nā kānaka, nīnau maila ʻo ia iā lākou, “Ai lā i hea kahi e hānau ai ʻo ka Mesia?”

5Haʻi akula lākou iā ia, “Aia i Betelehema i Iudea nei; no ka mea, ua palapala ʻia e ke kāula penei:

6‘«ʻO ʻoe, e Betelehema, i ka ʻāina ʻo Iuda,

ʻAʻole nō ʻoe ka mea ʻuʻuku loa i waena o ko Iuda poʻe aliʻi;

No ka mea, mai loko mai ou e hele mai ana kekahi Aliʻi,

Nāna e hoʻomalu i koʻu poʻe kānaka o kā ʻIseraʻela».’”

7¶ A laila, kiʻi malū akula ʻo Herode i ua mau māgoi lā, nīnau pono akula iā lākou i maopopo ai ka manawa i ʻikea aku ai ua hōkū lā.

8Hoʻouna akula ʻo ia iā lākou i Betelehema, ʻī akula, “Ō uhaele ʻoukou, e ʻimi pono aku i ua Keiki lā; a loaʻa hoʻi, a laila e haʻi mai iaʻu, i hele aku hoʻi au e kukuli hoʻomaikaʻi iā ia.”

9A lohe aʻela i kā ke aliʻi, haele akula lākou; aia hoʻi, ka hōkū a lākou i ʻike ai ma ka ʻĀina Hikina, lele ʻē akula ia i mua o lākou, a hele akula, a kau ihola ma luna pono o kahi e noho ana o ua Keiki lā.

10A ʻike aku lākou i ua hōkū lā, hauʻoli nui loa aʻela lākou.

11Komo lākou i loko o ka hale, a ʻike akula i ua Keiki lā a me kona makuahine ʻo Maria, a moe ihola lākou, hoʻomaikaʻi akula iā ia; a wehe aʻela lākou i ko lākou waihona waiwai, hāʻawi akula lākou nāna i ke gula, a me ka libano, a me ka mura.

12A ma ka moeʻuhane, pāpā ʻia mai lākou, ʻaʻole e hoʻi hou aku i o Herode lā, a ma kekahi alanui ʻē aʻe i hoʻi aku ai lākou i ko lākou ʻāina.

13¶ A hala akula lākou, aia hoʻi, ʻikea akula ka ʻānela a ka Haku e Iosepa i ka moeʻuhane, ʻī maila, “E ala, e lawe i ke Keiki a me kona makuahine, a holo aku i ʻAigupita; ma laila e noho ai, a ʻōlelo hou aku au iā ʻoe; no ka mea, e ʻimi mai ana ʻo Herode i ke Keiki, e pepehi iā ia.”

14Ala aʻela ia, lawe aʻela i ke Keiki a me kona makuahine i ka pō, a holo akula i ʻAigupita.

15Ma laila ia i noho ai a make ʻo Herode. No laila, kō aʻela ka ʻōlelo a ka Haku ma ke kāula, i ka ʻī ʻana mai, “‹Ua kāhea aku au i kaʻu Keiki mai ʻAigupita mai›.”

16¶ A laila, ʻike aʻela ʻo Herode, ua hoʻohoka ʻia ʻo ia e ka poʻe māgoi, ukiuki loa ihola ia, kēnā akula ia, a luku akula i nā keiki kāne a pau o Betelehema, a ʻo nā wahi a puni e kokoke ana, i ka poʻe ʻelua makahiki a hala i lalo, i ka manawa i nīnau pono aku ai ia i ka poʻe māgoi.

17A laila, kō aʻela ka ʻōlelo a ke kāula a Ieremia, i ʻī mai ai:

18“«Ua lohea ka leo ma Rama,

He pihe, he uē ʻana a me ke kanikau nui;

E uē ana ʻo Rāhela no kāna mau keiki,

ʻAʻole loa ia e nā;

No ka mea, ʻaʻole aʻe nei lākou».”

19¶ A make ʻo Herode, a laila ʻikea akula kekahi ʻānela a ka Haku e Iosepa ma ka moeʻuhane i ʻAigupita;

20ʻī maila, “E ala ʻoe e lawe i ke Keiki a me kona makuahine, a e hoʻi aku i ka ʻāina o kā ʻIseraʻela; no ka mea, ua make ka poʻe i ʻimi mai e pepehi i ua Keiki nei.”

21Ala aʻela ia, lawe aʻela i ua Keiki lā, a me kona makuahine, a hele akula i ka ʻāina o kā ʻIseraʻela.

22Akā, lohe aʻela ia, ʻo ʻArekelau ke aliʻi ma Iudea i pani no ka hakahaka o kona makua kāne ʻo Herode, makaʻu ihola ia i ka hele aku ma laila; a ao ʻia mai ai ma ka moeʻuhane, hoʻi aku ia i ka moku ʻo Galilaia.

23A hiki akula ia i kekahi kūlanakauhale ʻo Nazareta ka inoa, noho ihola ia i laila; pēlā i kō ai ka ʻōlelo a ka poʻe kāula, “E kapa ʻia ʻo ia he Nazarene.”

Currently Selected:

KA ʻEUANELIO I KĀKAU ʻIA AI E MATAIO 2: KBH

Highlight

Copy