KA WĀNANA A ʻISAIA 3
3
MOKUNA III.
1 Pōʻino kā Iuda no ka hewa. 16 E hoʻopaʻi ʻia nā wāhine no ko lākou haʻaheo
1¶ Aia hoʻi, ʻo Iēhova, ka Haku o nā kaua,
E lawe ana ia i nā koʻokoʻo a pau,
Mai ko Ierusalema, a mai kā Iuda aku,
I ke koʻokoʻo a pau ma ka ʻai, i ke koʻokoʻo a pau ma ka wai,
2I ka mea ikaika, a me ke kanaka koa,
I ka luna kānāwai, a me ke kāula,
I ka mea kilokilo, a me ka mea kahiko;
3I ka luna kanalima, a me ke kanaka koʻikoʻi,
I ke kākāʻōlelo, a me ka mea ʻike i nā hana,
I ka mea nō hoʻi i akamai i ka hoʻowalewale moʻo.
4E hāʻawi aku nō hoʻi au, e noho nā kamaliʻi ma luna o lākou,
E noho aliʻi nō nā keiki ʻuʻuku ma luna o lākou.
5E hoʻokaumaha ʻia nā kānaka, kekahi e kekahi,
A me ke kanaka hoʻi e kona hoa;
A e hoʻokiʻekiʻe nō ka mea ʻōpiopio ma luna o ka mea kahiko,
A me ka mea i hoʻowahāwahā ʻia ma luna o ka mea hanohano.
6E lālau nō ke kanaka i kona hoahānau o ka hale o kona makua kāne, me ka ʻōlelo iho,
“ʻEā, he ʻaʻahu nō kou, e noho aliʻi ʻoe ma luna o mākou,
Ma lalo hoʻi o kou lima kēia pilikia.”
7Ia lā lā, e hoʻokiʻekiʻe nō kēlā i kona leo, me ka ʻōlelo mai,
“ʻAʻole au e noho hoʻoponopono ma luna o ʻoukou,
No ka mea, ʻaʻohe ʻai ma koʻu hale, ʻaʻole hoʻi he mea ʻaʻahu;
Mai hoʻonoho iaʻu i aliʻi ma luna o kānaka.”
8No ka mea, ua kūlanalana ʻo Ierusalema, ua hāʻule hoʻi ʻo Iuda;
No ke kūʻē o ko lākou elelo a me kā lākou hana iā Iēhova,
E hoʻonāukiuki aku i kona mau maka hanohano.
9ʻO ka ʻike ʻana i ko lākou helehelena kai hōʻike no lākou;
Ke haʻi nei hoʻi lākou i ko lākou hewa e like me Sodoma,
ʻAʻole lākou i hōʻole.
Auē ko lākou poʻe ʻuhane!
No ka mea, ua lawe mai lākou i ka hewa ma luna o lākou iho.
10E ʻōlelo aku ʻoukou i nā mea i pono, e pōmaikaʻi lākou,
No ka mea, e ʻai nō lākou i ka hua o kā lākou hana ʻana.
11Auē hoʻi ka mea i hewa! E pōʻino nō ia;
E hāʻawi ʻia aku nāna ka uku o kona mau lima.
12ʻO koʻu poʻe kānaka, ʻo nā kamaliʻi ko lākou poʻe luna ʻālunu,
ʻO nā wāhine hoʻi kai noho aliʻi ma luna o lākou.
E kuʻu poʻe kānaka, he poʻe hoʻolalau kou poʻe alakaʻi,
A ke hoʻopau nei lākou i ko ʻoukou mau alanui.
13¶ Ke kū nei nō ʻo Iēhova e hoʻākāka mai,
Ua kū nō ia i luna e hoʻoponopono i nā kānaka.
14E hele mai ana nō ʻo Iēhova e hoʻopaʻi,
I nā lunakahiko o kona poʻe kānaka, a me ko lākou poʻe aliʻi.
“Ua hoʻopau ʻoukou i nā pā waina;
Aia hoʻi ma ko ʻoukou hale ka waiwai kāʻili wale ʻia o ka poʻe hune.
15“No ke aha lā ʻoukou e hoʻokaumaha nei i koʻu poʻe kānaka?
A e ʻānai i nā maka o ka poʻe hune?”
Wahi a ka Haku, ʻo Iēhova o nā kaua.
16¶ Ua ʻōlelo mai nō hoʻi ʻo Iēhova,
No ka lana haʻakei o nā kaikamāhine o Ziona,
A hele me ka oeoe o nā ʻāʻī,
A me ka maka leho hilahila ʻole;
He hele hōʻoiʻoi ko lākou hele,
A kanikani nā kūpeʻe o ko lākou wāwae;
17E hoʻoʻōlohelohe nō ka Haku i ka piko poʻo o nā kaikamāhine o Ziona,
E hōʻike nō ʻo Iēhova i ko lākou wahi hilahila.
18Ia lā lā, e lawe aku nō ka Haku i ko lākou mea e nani ai, i nā kūpeʻe wāwae, a me nā ʻupena pāpale oho, a me nā lei o ka ʻāʻī;
19i nā gula pepeiao, a me nā kūpeʻe lima, a me nā pale kalukalu;
20i nā pāpale hainakā, a me nā kaula kūpeʻe wāwae, i nā kāʻei, a me nā hue lāʻau ʻala, a me nā mea pale akua;
21i nā komo lima, a me nā gula ihu,
22i nā ʻaʻahu kūʻai nui, a me nā holokū, i nā kalukalu nui, a me nā hīpuʻu kālā;
23i nā aniani nānā, a me nā pālule, i nā ribina lei o ke poʻo, a me nā ʻaʻahu nui.
24Ma kahi i ʻaʻala, e pilau ana nō,
Ma kahi kāʻei, he kaula,
Ma ke oho ʻōwili e ʻōhule ana nō,
Ma kahi o ka pāʻū hanohano, he kāʻei ʻinoʻino,
Ma kahi maikaʻi e paʻawela ana nō.
25E hāʻule nō kou poʻe kānaka i ka pahi kaua,
A me kou poʻe koa hoʻi ma ke kaua.
26E uē, a e uhoʻi kona mau puka pā,
A e noho neoneo ʻo ia ma ka lepo.
Currently Selected:
KA WĀNANA A ʻISAIA 3: KBH
Highlight
Copy
Compare
Share
Want to have your highlights saved across all your devices? Sign up or sign in
Ka Baibala Hemolele © Partners Development Foundation, 2018.