KA WĀNANA A ʻISAIA 2
2
MOKUNA II.
1 Lanakila ko ke Akua aupuni. 6 Ka hewa ka mea e haʻalele mai ai ke Akua iā lākou. 10 He mea weliweli loa ka lā o ke Akua.
1¶ Ka ʻōlelo i hōʻike ʻia mai iā ʻIsaia, ke keiki a ʻAmosa, no kā Iuda, a me ko Ierusalema.
2¶ E hiki mai nō kēia i nā lā ma hope,
E kūkulu paʻa ʻia ka puʻu o ka hale o Iēhova ma luna o nā mauna,
A e hoʻokiʻekiʻe ʻia ma luna o nā puʻu;
A e holo nō i loko ona nā lāhui kanaka a pau.
3A e nui loa nā kānaka e hele me ka ʻōlelo,
“E hele mai e piʻi kākou i ka mauna o Iēhova,
I ka hale hoʻi o ke Akua o Iakoba;
Nāna nō e aʻo mai iā kākou i kona mau ʻaoʻao,
I hele ai kākou ma kona mau alanui.”
No ka mea, mai Ziona aku e laha aku ai ke kānāwai,
A ʻo ka ʻōlelo a Iēhova hoʻi, mai Ierusalema aku.
4Nāna nō e hoʻoponopono ma waena o ko nā ʻāina,
E aʻo mai hoʻi i nā lāhui kanaka he nui loa.
E kuʻi lākou i ko lākou mau pahi kaua i ʻōʻō palau,
A me ko lākou mau ihe hoʻi, i pahi paʻipaʻi;
ʻAʻole e hāpai ko kekahi ʻāina i ka pahi kaua, e kūʻē i ko kekahi ʻāina,
ʻAʻole hoʻi lākou e aʻo hou i ke kaua.
5¶ E ko ka hale o Iakoba, e hele mai,
E hele kākou ma ka mālamalama o Iēhova.
6He ʻoiaʻiʻo nō, ua haʻalele ʻoe i kou poʻe kānaka,
I ko ka hale hoʻi o Iakoba;
No ka mea, ua piha lākou i nā mea mai ka hikina mai,
I ka poʻe nānā ao, e like me ko Pilisetia;
A launa nō hoʻi lākou i nā keiki a nā malihini.
7Ua piha ko lākou ʻāina i ke kālā, a me ke gula,
ʻAʻole e pau i ka helu ʻia ko lākou waiwai;
Ua piha hoʻi ko lākou ʻāina i nā lio,
ʻAʻole e pau i ka helu ʻia nā kaʻa kaua o lākou.
8Ua piha ko lākou ʻāina i nā akua lapuwale;
Kūlou nō lākou i lalo i mua o ka hana a ko lākou mau lima,
I mua hoʻi o ka mea a ko lākou mau manamana lima i hana ai.
9No laila, e kūlou nō ke kanaka ʻuʻuku,
E hoʻohaʻahaʻa ʻia nō hoʻi ke kanaka nui;
ʻAʻole naʻe ʻoe e kala mai iā lākou.
10E komo ʻoe i loko o ka pōhaku, e peʻe hoʻi i loko o ka lepo,
No ka makaʻu iā Iēhova, a no ka nani hoʻi o kona hanohano.
11E kūlou auaneʻi nā maka kiʻekiʻe o kānaka,
A e hoʻohaʻahaʻa ʻia ko kānaka lana haʻakei,
ʻO Iēhova wale nō ke hoʻokiʻekiʻe ʻia i kēlā lā.
12¶ E kau mai nō ka lā o Iēhova o nā kaua,
Ma luna o nā mea hanohano a kehakeha a pau,
Ma luna hoʻi o kēlā mea kēia mea i hoʻokiʻekiʻe ʻia, a e hoʻohaʻahaʻa ʻia nō ʻo ia;
13Ma luna o nā lāʻau kedera a pau o Lebanona, nā mea loloa a kiʻekiʻe,
A ma luna hoʻi o nā lāʻau ʻoka a pau o Basana;
14Ma luna o nā kuahiwi kiʻekiʻe a pau,
A me nā puʻu a pau i hoʻokiʻekiʻe ʻia;
15Ma luna o nā hale kiaʻi kiʻekiʻe a pau,
A me nā pā kaua kiʻekiʻe a pau;
16Ma luna o nā moku a pau o Taresisa,
A me nā mea milimili a pau i mahalo ʻia.
17E kūlou nō i lalo ko ke kanaka haʻaheo,
E hoʻohaʻahaʻa ʻia hoʻi ka manaʻo kiʻekiʻe o ke kanaka;
ʻO Iēhova wale nō ke hoʻokiʻekiʻe ʻia i kēlā lā.
18A e nalowale loa nā akua lapuwale.
19E komo hoʻi nā kānaka i loko o nā ana pōhaku a me nā lua o ka lepo,
No ka makaʻu iā Iēhova, a no ka nani hoʻi o kona hanohano.
Iā ia e kū ai i luna, e hoʻonāueue ai i ka honua.
20Ia lā lā e kiola aku nō ke kanaka i kona mau akua kālā,
A me kona mau akua gula, āna i hana ai i mea hoʻomana,
E lilo i nā ʻiole a me nā ʻōpeʻapeʻa.
21A hele lākou i loko o nā ana pōhaku,
I loko hoʻi o nā lua ma ka pali paʻa,
No ka makaʻu iā Iēhova,
A no ka nani hoʻi o kona hanohano,
Iā ia e kū ai i luna e hoʻonāueue ai i ka honua.
22Mai hilinaʻi aku ʻoukou i ke kanaka,
Nona ka hanu ma kona mau puka ihu,
No ka mea, he aha ia, i manaʻo ʻia ai ʻo ia?
Currently Selected:
KA WĀNANA A ʻISAIA 2: KBH
Highlight
Copy
Compare
Share
Want to have your highlights saved across all your devices? Sign up or sign in
Ka Baibala Hemolele © Partners Development Foundation, 2018.