KA WĀNANA A ʻISAIA 4
4
MOKUNA IV.
1 Ka pōʻino. 2 Ka pōmaikaʻi ma hope.
1¶ Ia lā lā, e lālau aku nō nā wāhine ʻehiku i ke kanaka hoʻokahi, me ka ʻōlelo aku, “E ʻai nō mākou i ko mākou ʻai iho, a e komo nō i ko mākou lole; inā e kapa ʻia mai mākou ma kou inoa, i mea e pau ai ko mākou hōʻino ʻia.”
2¶ Ia lā lā, e puka mai ai ka Lālā o Iēhova, he hanohano, a he nani nō hoʻi, e nani ʻiʻo nō ka hua o ka ʻāina, a me ka maikaʻi, no ka poʻe i pakele o kā ʻIseraʻela.
3A ʻo ka mea i koe ma Ziona, a ʻo ka mea i waiho ʻia ma Ierusalema, e kapa ʻia ʻo ia he hemolele, ʻo nā mea a pau i kākau pū ʻia me ka poʻe e ola ana ma Ierusalema;
4a pau ka pelapela o nā kaikamāhine a Ziona i ka holoi ʻia e ka Haku, a pau nō hoʻi ke koko o Ierusalema i ka hemo, mai ona aku lā, ma ka mana o ka hoʻopono, a me ka mana o ke ʻaʻā ʻana.
5A laila, na Iēhova nō e hana, ma luna o nā wahi a pau o ka Mauna Ziona, a ma luna hoʻi o nā ʻaha hālāwai ona, i ao i ka lā, a me ka uahi, a i mālamalama o ke ahi lapalapa i ka pō; no ka mea, e kau mai nō ka malu ma luna o nā mea nani a pau.
6He halelewa nō e malu ai i ke ao, no ka wela. He puʻuhonua, a he wahi malu hoʻi, no ka ʻino, a me ka ua.
Ka Baibala Hemolele © Partners Development Foundation, 2018.