Lalai amli Lala 1
1
1 #
1 Maŋ 4.32
Solomon lalai amli lala nɛ.
Klɛŋklɛŋ lala
Yoo lɛ
2Ao, mina ni kulɛ ooobashwɔ minaa;
ejaakɛ osuɔmɔ fe wain.
3Omui ni okpaa jeɔ ŋma naakpa,
ogbɛi jeɔ ŋma tamɔ muŋma
ni afɔse ashwie shi.
No hewɔ ni oblayei lɛ sumɔɔ bo lɛ.
4MiMaŋtsɛ, hã manyiɛ osɛɛ;
hã wɔye wɔhe oyai
kɛya opiai lɛ amli.
Wɔɔnya, ni wɔmii aaashɛ.
Wɔɔkafo osuɔmɔ lɛ fe wain;
ŋwanejee ko bɛ he akɛ,
no hewɔ yei sumɔɔ bo lɛ.
5Nyɛ Yerusalɛm biyei,
midiɔ nɛ,
shi mihe yɛ fɛo;
midiɔ tamɔ Kedar bui lɛ,
mitamɔ muhɔi ni yɔɔ Solomon we lɛ.
6Kaakwɛ mi gãa yɛ dimɔ ni midiɔ,
kɛ hulu ni eshã mi hewɔ.
Minyɛ bihii lɛ amli fu mi,
ni amɛfee mi waintromi anɔkwɛlɔ.
Tsɛbelɛ, mi diɛŋtsɛ minɔ lɛ, mikwɛɛɛ.
7Bo mɔ ni mitsui sumɔɔ,
tsɔ̃ɔmɔ mi otoi alɛɛhe lɛ,
kɛ he ni ohãa amɛbumɔɔ shwane.
Mɛni hewɔ matamɔ mɔ ni tsomloɔ
kɛtaoɔ bo yɛ onanemɛi atookui ahe?
Nuu lɛ
8Bo yoo ni ohe yɔɔ fɛo fe yei fɛɛ,
kɛ oleee jɛi lɛ,
bo lɛ jaa tooku lɛ asɛɛ mo kɛya,
ni oyalɛ abotiai abii lɛ
yɛ tookwɛlɔi abuui lɛ amasɛi.
9Mishieŋnyɛ, mikɛ bo toɔ okpɔŋɔi
ni yɔɔ Farao shwiilii lɛ ateŋ
eko he.
10Odabii yɛ fɛo kɛ wulamɔnii;
okuɛ hu yɛ fɛo kɛ jwinei ni
atsɛ̃rɛ.
11Wɔbaafee shika hewulamɔnii
ni akɛ jwiɛtɛi eholɔ mli wɔhã bo.
Yoo Lɛ
12Be ni maŋtsɛ kã ekpasa mli lɛ,
belɛ minuatrɛ lɛ miije ŋma.
13Misuɔlɔ lɛ he jeɔ ŋma krɔbɔo
kɛji ekã mifufɔi ateŋ lɛ.
14Misuɔlɔ lɛ tamɔ ŋaŋ fɔfɔi
yɛ En-Gedi waintromii lɛ amli hã mi.
Nuu Lɛ
15Naa, ohe yɛ fɛo, mishieŋnyɛ!
Naa, ohe yɛ fɛo.
Ohiŋmɛi tamɔ okpo hiŋmɛi.
Yoo lɛ
16Naa, ohe yɛ fɛo, misuɔlɔ,
ohe yɛ akɔnɔ hu;
jwɛifɔ ji wɔsaa ni wɔkãa nɔ.
17Wɔtsu mplaŋi lɛ tsenedru ni.
Ni wɔŋmɔŋmloi lɛ sɛsɛo ni.
Currently Selected:
Lalai amli Lala 1: NEGAB
Highlight
Copy
Compare
Share
Want to have your highlights saved across all your devices? Sign up or sign in
Bible in Ga Language © Bible Society of Ghana, 2020.
