Lalai amli Lala 2
2
1Mi lɛ, Sharon fɔfɔi ji mi,
mi ji jɔi amli oflɔ fɔfɔi.
Nuu lɛ
2Bɔ ni oflɔ fɔfɔi yɔɔ
yɛ ŋmei ateŋ lɛ,
nakai mishieŋnyɛ yɔɔ
yɛ oblayei ateŋ.
Yoo lɛ
3Bɔ ni akututso yɔɔ yɛ kooŋtsei ateŋ lɛ,
nakai misuɔlɔ yɔɔ
yɛ oblahii ateŋ.
Miishɛɛ mikɛtaa ehɔ̃ɔŋ,
ni eyibii lɛ ŋɔɔ minaa.
4Ekɛ mi ba shĩa ni aŋmɛ okplɔ̃ yɛŋ
ni ekɛ suɔmɔɔ aflaŋaa ha minɔ.
5Kɛ wainyibii ni aka lɛ fã kɛ fã awaje mi;
kɛ aduawai ajɔɔ mitsui he;
ejaakɛ suɔmɔ ewo mi hela.
6Mina ni kulɛ, enine abɛku
hɔ miyitso shishi,
ni ekɛ eninejurɔ efua mi atuu.
7Nyɛ Yerusalɛm biyei,
mina soŋai kɛ ŋa nɔ ofrote yei akɛ,
nyɛkagbaa wɔsuɔmɔ lɛ naa;
ni nyɛkatsĩɛa ehiɛ kɛjɛ ewɔ mli,
kɛyaashi lɛ diɛŋtsɛ etsui aaatɔ.
Lala ni ji enyɔ
Yoo lɛ
8Minu misuɔlɔ lɛ gbee!
Naa, eeba,
eehuru yɛ gɔji lɛ anɔ,
ehiɛ foi waa yɛ gɔŋkpɔi lɛ anɔ.
9Misuɔlɔ lɛ tamɔ soŋai,
loo ofrote oblanyo.
Naa, edamɔ wɔgbogbo lɛ sɛɛ;
eekwɛ samfɛji lɛ amli gãa,
eefili kɛ miitsɔ̃ samfɛji fɔji lɛ amli.
10Misuɔlɔ lɛ kɛɛ mi akɛ,
Nuu lɛ
“Mishieŋnyɛ, mimɔ ni he yɔɔ fɛo!
Tee shi, ni oba wɔtee.
11Shi, naa, fɛ̃i be lɛ eho etee;
nunɛmɔ be lɛ sɛɛ efo kwraa.
12Fɔfɔii egba yɛ shikpɔŋ lɛ nɔ;
lala be lɛ eshɛ,
ni aanu kosɛɛ okpo gbee yɛ
wɔshikpɔŋ lɛ nɔ.
13Agbãmitso miiwo yibii,
ni waintsei lɛ hu egba afofroi
kɛ ŋma.
No hewɔ lɛ, misuɔlɔ, tee shi ni oba wɔtee,
bo ji mimɔ ni he yɔɔ fɛo.
14Mikosɛɛ okpo ni hiɔ tɛsaa fɔjiaŋ,
yɛ gɔŋ grɔŋŋ hɔ̃ɔŋ,
hã mana ohiɛ,
ni manu ogbee;
ejaakɛ ogbee ŋɔɔ,
ni ohiɛ hu yɛ fɛo.
15Nyɛmɔmɔa osɔi lɛ,
osɔi bibii ni fiteɔ waintromii lɛ,
ejaakɛ wɔwaintsei lɛ
egba afofro.”
Yoo lɛ
16Minɔ ji misuɔlɔ lɛ, ni lɛ hu enɔ ji mi.
Elɛɔ etoi lɛ
yɛ oflɔ fɔfɔii ateŋ.
17Kuu osɛɛ, misuɔlɔ,
tamɔ soŋai loo ofrote oblanyo,
yɛ Beta gɔji lɛ anɔ,
ni oba dani je atsɛre,
ni duŋ alaaje.
Currently Selected:
Lalai amli Lala 2: NEGAB
Highlight
Copy
Compare
Share
Want to have your highlights saved across all your devices? Sign up or sign in
Bible in Ga Language © Bible Society of Ghana, 2020.