Rut 3
3
Naomi wo Rut ŋaa
1 #
Rut 1.1
Gbi ko lɛ Naomi kɛɛ eshaayoo Rut akɛ, “Mibi, jeee ja mitao he ko mihã bo ota ni ahi ahã bo? 2Boaz mɔ ni okɛ eblayei lɛ yatsu nii lɛ, wɔwekunyo ni. Naa, eesha ekoko gbɛkɛnaashi nɛɛ yɛ ŋmãagbeemɔhe lɛ. 3No hewɔ lɛ, juu ohe, ni okpa mu, ni owo otade ni yɔɔ fɛo fe fɛɛ lɛ kɛya ŋmãagbeemɔhe lɛ. Shi moŋ kaahã nuu lɛ miiyoo bo kɛyashi beyinɔ ni eeeye nii, ni eeenu nɔ ko dã. 4Shi kɛ eyakã shi lɛ kadimɔ eshikamɔhe lɛ, ni oya oyakpa mama lɛ yɛ enane he, ni oho okã shi; ni lɛ diɛŋtsɛ ebaatsɔ̃ɔ bo nɔ ni ofee.”
5Rut kɛɛ Naomi akɛ, “Nɔ ni okɛɛ mi lɛ fɛɛ lɛ mafee.”
6Kɛkɛ ni Rut yiŋ etee ŋmãagbeemɔhe lɛ, ni eyafee bɔ ni eshaayoo lɛ kɛɛ lɛ lɛ pɛpɛɛpɛ. 7Agbɛnɛ be ni Boaz eye nii, ni enu nɔ ko, ni emii eshɛ ehe lɛ, etee eyakã shi yɛ akoko ku lɛ sɛɛ. Kɛkɛ ni Rut dɛke shi, ni eyakpa mama lɛ yɛ Boaz nane he, ni eho ekã shi. 8Ni nyɔɔŋteŋ lɛ Boaz hɛle shi, ni etsɔ̃ ehe, ni naa, yoo ko kã enajiaŋshi. 9#Deut 25.5; Eze 16.8 Ni Boaz bi akɛ, “Bo namɔŋ?” Ni Rut kɛɛ, “Mi oweyoo Rut ni. Ofainɛ, haa mi omama lɛ eko; ejaakɛ weku lɛ mli niyelɔ ji bo.”
10 #
Rut 2.11
Boaz here nɔ akɛ, “Yehowa ajɔɔ bo, mibiyoo. Ejurɔ ni ofee sɛɛkpee nɛɛ fe tsutsu nɔ lɛ tete akɛ onyiɛɛɛ oblahii asɛɛ, niiatsɛmɛi jio, ohiafoi jio. 11Ni agbɛnɛ, mibiyoo, kaashe gbeyei. Nɔ fɛɛ nɔ ni okɛɔ lɛ mafee mahã bo, ejaakɛ mimaŋbii lɛ fɛɛ le akɛ yoo kpakpa ji bo. 12Eyɛ mli lɛɛlɛŋ akɛ owu lɛ wekunyo ni aaanyɛ aŋɔ bo ji mi moŋ nɛ; shi kɛ̃lɛ niyelɔ lɛ eko yɛ ni eyeɔ dani mi miyeɔ. 13Hii shi ni je atsɛre. Kɛji je tsɛre ni eeefee niyelɔ gbɛnaanii lɛ ehã bo lɛ, ehi; shi kɛji esumɔɔɔ akɛ efee lɛ, no lɛ gbii abɔ kɛ̃ ni Yehowa hiɛ kã nɛɛ mafee. Kã shi ni je atsɛre.”
14Kɛkɛ ni Rut ho ekã Boaz najiashi kɛyashi jetsɛremɔ. Ni ete shi dani hiɛ gbele bɔ ni aaanyɛ mɔ ayoo. Shi Boaz kɛɛ Rut akɛ, “Kaahã mɔ ko le akɛ yoo ko eba ŋmãagbeemɔhe nɛɛ.” 15Boaz kɛɛ Rut akɛ, “Okɛ mama ni okɛha oyiteŋ lɛ aba, ni olɛɛ mii.” Rut kɛ mama lɛ ba, ni elɛɛ mli, ni Boaz ka akoko susumɔ tsenei ekpaa ni etsiimɔ aaafee kiloi nyɔŋmai enyɔ ewo mli, ni ekɛtere Rut, ni ekɛtee maŋ lɛ mli. 16Be ni Rut yashɛ eshaayoo lɛ ŋɔɔ lɛ, eshaayoo lɛ bi lɛ akɛ, “Te emli tamɔ tɛŋŋ, mibi?” Rut gba lɛ nɔ ni Boaz fee hã lɛ lɛ fɛɛ; asaŋ 17Rut kɛɛ akɛ, “Ehã mi akoko tsenei ekpaa nɛɛ ejaakɛ ekɛɛ, ‘Ebɛ ni okɛ odɛ̃ folo yaa oshaayoo lɛ ŋɔɔ.’ ”
18Ni Naomi kɛɛ Rut akɛ, “Mɛɛ mibi, kɛyashi beyinɔ ni ooona bɔ ni sane lɛ naa aaayakpa; ejaakɛ nuu lɛ ejɔŋ ehe ja ena sane lɛ naa ŋmɛnɛ.”
Bible in Ga Language © Bible Society of Ghana, 2020.