Rut 2
2
Rut yaye kpɛkpɛo yɛ Boaz ŋmɔshi
1Shi Naomi wu Elimelek yɛ wekunyo niiatsɛ ko. Egbɛi ji Boaz. 2#Lev 19.9-10; Deut 24.19 Be ko lɛ Rut kɛɛ Naomi akɛ, “Hã maya ŋmɔji lɛ amli mayanyiɛ mɔ ni aaana mi mɔbɔ nikpalɔi lɛ asɛɛ koni maye akoko kpɛkpɛo.” Naomi kɛɛ lɛ akɛ, “Yaa ni oba oŋ, mibi.”
3Rut tee ni eyaye kpɛkpɛo yɛ mɛi ni foɔ akoko lɛ asɛɛ yɛ ŋmɔji lɛ amli. Ni eba mli akɛ eyaje Boaz, Elimelek wekunyo lɛ, ŋmɔshi.
4Boaz jɛ Betlehem eba, ni ehã nikpalɔi lɛ aekoo ekɛɛ, “Yehowa kɛ nyɛ ahi shi!” Ni amɛhere lɛ nɔ akɛ, “Yehowa ajɔɔ bo!”
5Kɛkɛ ni Boaz bi etsulɔ ni ekɛto enikpalɔi lɛ anɔ lɛ akɛ, “Mɛɛ oblayoo nɛ?”
6Tsulɔ lɛ to he akɛ, “Moab oblayoo lɛ ni kɛ Naomi jɛ Moab shikpɔŋ lɛ nɔ ba lɛ ni. 7Ebakɛɛ mi akɛ, ‘Ofainɛ, hã manyiɛ akoko kei lɛ ateŋ yɛ nikpalɔi lɛ asɛɛ maye kpɛkpɛo koni mabua naa.’ Ni kɛjɛ leebi tɔ̃ɔ ni eba lɛ, ejɔko ehe kwraa kɛbashi amrɔ nɛɛ.”
8Kɛkɛ ni Boaz kɛɛ Rut akɛ, “Mibi yoo, oobo toi? Kaaya ni oyaye kpɛkpɛo yɛ mɔ kroko ŋmɔshi, ni asaŋ okaje biɛ nɛɛ hu; shi moŋ kpɛtɛmɔ miblayei lɛ ahe yɛ biɛ nɔŋŋ. 9Ohiɛ ahi ŋmɔ ni amɛfoɔ akoko lɛ yɛ mli lɛ nɔ koni onyiɛ amɛsɛɛ. Miwo miblahii lɛ kitã akɛ mɔ ko akagba onaa. Kɛ kumai miiye bo lɛ, yaa gbɛi lɛ ahe koni oyanu nu ni oblahii lɛ eyayɛ lɛ eko.”
10Kɛkɛ ni Rut ho ekula shi, ni ekɛ ehiɛ bu shi, ni ekɛɛ akɛ, “Mɛɛ hewɔ ni omli ejɔ ehã mi, ni otseɔ ohiɛ ohãa mi, mi mɔkpɔŋ nɛɛ?”
11 #
Rut 1.16-17
Boaz to he ehã lɛ akɛ, “Nii ni ofee ohã oshaayoo lɛ yɛ owu gbele lɛ sɛɛ lɛ, agba mi fɛɛ pɛpɛɛpɛ, bɔ ni oshi otsɛ kɛ onyɛ kɛ shikpɔŋ ni afɔ bo yɛ nɔ lɛ, ni oyiŋ kɛba mɛi ni oleee oto sa aŋɔɔ. 12Yehowa ato bo nii ni otsu lɛ najiaŋ. Yehowa, Israel Nyɔŋmɔ lɛ, mɔ abo ni obaba nɛɛ ato bo najiaŋ shishiishi.”
13Kɛkɛ ni Rut kɛɛ, “Minuŋtsɔ, omli jɔ hã mi, ejaakɛ oshɛje mimii, ni okɛ oweyoo ewie yɛ mlihilɛ naa, tsɛbelɛ mi kɛ oweyei lɛ ekoeko tete yeee hegbɔ.”
14Be ni shɛ niyeli be lɛ, Boaz kɛɛ Rut akɛ, “Tsi oba biɛ koni obaye aboloo lɛ eko ni bo hu okɛ otrɔma lɛ atsɔ wain lɛ mli eko.” Ni Rut ba ebata nikpalɔi lɛ amasɛi; ni Boaz hã lɛ abelefɔ ni ashĩ lɛ eko, ni ekpe, ni etɔ, ni eshwɛ eko. 15Be ni Rut te shi eyaaye kpɛkpɛo lɛ, Boaz wo eblahii lɛ shi akɛ, “Nyɛhãa eyea kpɛkpɛo lɛ yɛ kei ni afĩmɔ lɛ ateŋ hu; nyɛkanyafia lɛ. 16#Lev 19.9 Asaŋ nyɛfamɔa akoko lɛ eko yɛ kei lɛ amli nyɛshwiea shi nyɛhãa lɛ koni eye lɛ kpɛkpɛo; ni nyɛkawiea ehiɛ.”
17Rut ye kpɛkpɛo yɛ ŋmɔ lɛ shi kɛyashi gbɛkɛnaashi. Egbee kpɛkpɛo ni eye lɛ, ni ena yiteremɔ aaafee kiloi nyɔŋma tsiimɔ. 18Ewo kɛtee maŋ lɛŋ, ni ekɛ kpɛkpɛo ni eyaye lɛ yatsɔ̃ɔ eshaayoo lɛ. Rut jie niyenii ni eye etɔ ni shwɛ lɛ ehã eshaayoo lɛ. 19Kɛkɛ ni Naomi bi Rut akɛ, “Nɛgbɛ oyatsu nii yɛ? Namɔ ŋmɔshi otee oyaye kpɛkpɛo lɛ yɛ ŋmɛnɛ? Mɔ ni tse ehiɛ ehã bo lɛ, aaajɔɔ lɛ.” Rut gba eshaayoo lɛ mɔ ŋɔɔ ni eyatsu nii yɛ ekɛɛ, “Nuu ni miyatsu nii yɛ eŋɔɔ ŋmɛnɛ lɛ gbɛi ji Boaz.”
20Naomi kɛɛ eshaayoo lɛ akɛ, “Yehowa, mɔ ni hãko emɔbɔnalɛ sɛɛ afo yɛ hiɛkãalɔi kɛ gbohii fɛɛ anɔ lɛ ajɔɔ lɛ.” Naomi tee nɔ ekɛɛ, “Nuu lɛ wɔwekunyo ni; weku lɛ mli mɛi ni aaanyɛ akwɛ wɔ lɛ ateŋ mɔ kome ji lɛ.”
21Kɛkɛ ni Rut, Moabyoo lɛ, kɛɛ, “Belɛ no hewɔ esaa ekɛɛ mi akɛ, ‘Kpɛtɛmɔ mipaafoi lɛ ahe kɛyashi beyinɔ ni amɛaagbe minikpamɔ lɛ fɛɛ naa lɛ.’ ”
22Ni Naomi kɛɛ eshaayoo Rut akɛ, “Ehi, mibi, akɛ okɛ Boaz oblayei lɛ anyiɛ koni akagba onaa yɛ mɔ kroko ŋmɔshi.”
23No hewɔ lɛ, Rut kpɛtɛ Boaz oblayei nitsulɔi lɛ ahe, ni eye kpɛkpɛo lɛ aahu kɛyashi beyinɔ ni agbe akoko kɛ ŋmãa fɛɛ kpamɔ naa.
Rut tee nɔ ekɛ eshaayoo lɛ hi shi.
Bible in Ga Language © Bible Society of Ghana, 2020.