Abɛi 1
1
Abɛi ahe sɛɛnamɔ
1 #
1 Maŋ 4.32; 5.9-12 Israel Maŋtsɛ Solomon, David bi lɛ, abɛi nɛ.
2Abɛi nɛɛ tsɔ̃ɔ mɔ nilee, ni amɛhãa mɔ naa tsɔsemɔ. Amɛhãa mɔ nuɔ wiemɔi ni jwɛŋmɔ yɔɔ mli ashishi faŋŋ hu.
3Amɛhãa mɔ leɔ nii, eleɔ nɔ ni ja, ni eleɔ anɔkwayeli.
4Abɛi nɛɛ tsɔ̃ɔ mɛi ni nako jwɛŋmɔ lɛ hiɛtɛ̃ɛ; ni amɛtsɔ̃ɔ oblanyo hu nilee kɛ jwɛŋmɔ.
5Nilelɔ hu nuɔ, ni ekaseɔ nii efataa enilee he. Amɛhãa mɔ ni nuɔ niiashishi hu leɔ ŋaa.
6Ebaanu abɛi kɛ wiemɔi ni amɛshishinumɔ wa kɛ nilelɔi awiemɔi kɛ amɛjenui ashishi.
Ŋaawoo kɛhã oblahii
7 #
Hiob 28.28; Lal 111.10; Abɛi 9.10 Nilee fɛɛ shishijee ji Yehowa gbeyeishemɔ; shi kwashiai gbeɔ nilee kɛ tsɔsemɔ he guɔ.
8 #
Abɛi 6.20
Mibi, bo otsɛ tsɔsemɔ toi, ni kaashɛ mla ni onyɛ woɔ bo lɛ ofɔ̃. 9#Abɛi 4.9 Ejaakɛ nomɛi ji anunyam akekre ni fi oyitso kɛ kɔsɔŋkɔsɔ ni kã okuɛ. 10Mibi, kɛji eshafeelɔi miilaka bo lɛ, kaakpɛlɛ̃. 11Kɛji amɛkɛɛ bo akɛ, “Ba wɔtee ni wɔyawo mɔ ko antɛo, ni wɔyawo mɔ ko lá ni efeko nɔ ko fɔŋ ko ka yakatswaa lɛ kaakpɛlɛ̃. 12Kɛji amɛaakɛɛ bo akɛ hã wɔmĩĩ amɛ hiɛkãalɔi tamɔ bɔ ni gbohiiaje mĩiɔ mɛi emuu, aloo tamɔ akpelekeɔ shi aboteɔ gbonyobu mli, ni akuuu sɛɛ abaaa dɔŋŋ lɛ. 13Kɛji amɛaakɛɛ akɛ no wɔbaana nibii srɔtoi wɔwo wɔshĩai amli obɔ̃bɔ̃ lɛ kaakpɛlɛ̃. 14Kɛji amɛaakɛɛ akɛ bo lɛ kɛ ohe abɔ wɔhe kɛkɛ; wɔ fɛɛ wɔbaato fotro kome, ni nɔ ni wɔbaana lɛ wɔbaaja lɛ pɛpɛɛpɛ lɛ kaakpɛlɛ̃.”
15Mibi, okɛ nɛkɛ gbɔmɛi akabɔ. Tsi ohe kɛje amɛhe kwraa. 16Gbɔmɛi ni tamɔ nɛkɛ lɛ, amɛhe yɛ oya kɛ efɔŋfeemɔ; amɛhe feɔ oya kɛ láshishwiemɔ. 17Eji yaka nɔ ko feemɔ akɛ aaatsɔ̃ loofɔlɔ tsɔne be mli ni eekwɛ. 18Nɛkɛ gbɔmɛi lɛ amɛ diɛŋtsɛ amɛhe tsɔne amɛtsɔ̃ɔ lɛ, amɛwoɔ amɛ diɛŋtsɛ amɛwala antɛo. 19Mɛi fɛɛ ni shɔ̃ɔ nii ekãa naa yɛ mɛi adɛŋ lɛ, bɔ ni amɛnaagbee tamɔ nɛ, nɔ ni amɛkɛ hiɛkɔ̃ɔ diɔ sɛɛ lɛ, no nɔŋŋ gbeɔ amɛ.
Nilee miitsɛ kwashiai
20Bo toi! Nilee miibolɔ waa yɛ blohuiaŋ, ni eewo egbee yɛ jaji anɔ. 21#Abɛi 8.1-3 Ebolɔɔ yɛ maŋ lɛ agboi lɛ anaa kɛ he fɛɛ he ni mɛi ebua amɛhe naa kutuu yɛ.
22Oo, nyɛ mɛi ni nyɛjwɛŋmɔ naa waaa, mɛɛ beyinɔ nɔŋŋ nyɛaahiɛ nyɛkwashiafeemɔ nɛɛ mli kɛyashi? Ni mɛɛ beyinɔ nɔŋŋ kwashiai hu aaanyɛ nilee kɛyashi? 23Kɛji mikã nyɛ lɛ, nyɛboa toi. Naa, mafɔse mimumɔ mawo nyɛmli, ni mahã nyɛyoo minilee wiemɔi lɛ hu. 24#Yes 65.2, 12 Mitsɛ nyɛ, ni nyɛbooo mi toi; mikpã miniji amli ni mɔ ko mɔ ko mɔɔɔ mli. 25Miŋaawoo lɛ hu nyɛkwa fɛɛ, ni nyɛbuuu mikãmɔ lɛ. 26#Abɛi 3.34 No hewɔ lɛ, mi hu nyɛmanehulu mli lɛ, maŋmɔ nyɛ; ni kɛji gbeyei nɔ ko ba lɛ, maye nyɛhe fɛo. 27Kɛji tsuifãa nɔ ko batua nyɛ tamɔ ahum, ni nyɛmanehulu te shi tamɔ lasuogbele; ni kɛji hejaramɔ kɛ tsuiyeli ba nyɛnɔ lɛ, 28#Yes 59.2; Mika 3.4 no mli lɛ nyɛaatsɛ mi, shi mihereŋ nɔ; nyɛaatao misɛɛgbɛ kpɛ̃kpɛ̃ɛkpɛ̃, shi nyɛnaŋ mi. 29Akɛni amɛsumɔɔ nilee, ni amɛsheee Yehowa gbeyei; 30asaŋ akɛni amɛsumɔ̃ɔɔ ŋaa ni miwoɔ amɛ lɛ ekoeko, ni amɛgbe mikãmɔ lɛ fɛɛ he guɔ 31#Yes 3.10, 11 hewɔ lɛ, nɔ ni amɛdu lɛ, no yibii amɛaakpa, ni ŋaa ni amɛtotoo lɛ he sɛɛ amɛaana. 32#Abɛi 8.36 Mɛi ni jwɛŋmɔ naa waaa kpaleɔ kɛjeɔ nilee he kɛyaa nɔ kroko he, ni no nɔŋŋ gbeɔ amɛ; ni jwɛŋmɔ ni kwashiai jwɛŋɔ akɛ amɛyɛ shweshweeshwe lɛ, no nɔŋŋ kpãtãa amɛhiɛ. 33#Abɛi 8.34 Shi mɔ fɛɛ mɔ ni boɔ mi toi lɛ eeehi shi shweshweeshwe, ehe aaajɔ lɛ, ni esheŋ efɔŋ ko gbeyei.
Bible in Ga Language © Bible Society of Ghana, 2020.