Mateo 22
22
Yookpeemɔ okplɔŋmɛɛ lɛ he abɛ lɛ
(Luka 14.15-24)
1Yesu wo enaa nɔ ekɛ amɛ wie ekoŋŋ yɛ abɛbuai amli ekɛɛ, 2#Yoh 3.29 “Ŋwɛi maŋtsɛyeli lɛ tamɔ maŋtsɛ ko ni kpee yoo ehã ebinuu. 3Ni etsu etsuji akɛ amɛyatsɛ mɛi ni akpee lɛ kɛba yookpeemɔ lɛ, shi mɛi lɛ emiii baa. 4#Mat 21.36 Esaa etsu tsuji krokomɛi ekɛɛ, ‘Nyɛyakɛa mɛi ni akpee lɛ akɛ, naa, migbe miniyenii lɛ anaa; agbe mitsinai lɛ kɛ milɛɛ kooloi lɛ, ni agbe nɔ fɛɛ nɔ naa: nyɛbaa yookpeemɔ lɛ!’ 5Shi amɛ lɛ amɛbuuu po, ni amɛtee amɛhei srɔtoi, mɔ kome tee ebɔɔ mli, ni mɔ kroko hu tee eguɔyeli. 6Ni mɛi ni shwɛ lɛ mɔ̃mɔ etsuji lɛ, ni amɛfee amɛ niseniianii, ni amɛgbe amɛ. 7#Mat 24.2 Shi be ni maŋtsɛ lɛ nu lɛ, emli fu, ni etsu etabilɔi, ni amɛyagbe nɛkɛ gbɔmɔgbelɔi nɛɛ, ni ashã amɛmaŋ lɛ. 8Kɛkɛ ni ekɛɛ etsuji lɛ akɛ, ‘Ato yookpeemɔ lɛ he nii agbe naa moŋ, shi mɛi ni akpee lɛ amɛsaaa. 9#Mat 13.47; 21.43 No hewɔ lɛ, nyɛyaa ŋmaŋmashai lɛ anɔ, ni mɛi abɔ ni nyɛaana lɛ, nyɛkpea amɛ kɛbaa yookpeemɔ lɛ.’ 10Ni tsuji lɛ je kpo tee gbɛi lɛ anɔ, ni amɛyabua mɛi fɛɛ ni amɛna lɛ anaa, mɛi fɔ̃ji kɛ mɛi kpakpai, ni yookpeemɔ he lɛ yi tɔ kɛ mɛi.
11“Shi be ni maŋtsɛ lɛ ba mɛi lɛ akwɛmɔ lɛ, ebana mɔ ko yɛ jɛi ni wooo yookpeemɔ atade; 12ni ebi lɛ akɛ, ‘Naanyo, te fee tɛŋŋ ni oba biɛ nɛɛ ni owooo yookpeemɔ atade?’ Ni etɔ mu. 13#Mat 8.12; 25.30; Luk 13.28 Kɛkɛ ni maŋtsɛ lɛ kɛɛ etsuji lɛ akɛ, ‘Nyɛfimɔa eniji kɛ enaji ni nyɛwoa lɛ nyɛyashɛa nyɛfɔ̃a gbɛsɛɛ duŋ lɛ mli! Jɛi yaafo kɛ nyanyɔji ashishikpemɔ aaahi.’ 14Ejaakɛ atsɛ mɛi pii moŋ; shi mɛi fioo ahala.”
Oniatsumɔ kɛ Kaisare hãmɔ
(Marko 12.13-17; Luka 20.20-26)
15Kɛkɛ ni Farisifoi lɛ tee ajina, bɔ ni amɛaafee ni amɛmɔ enaa enyɔŋ. 16#Mar 3.6 Ni amɛtsu amɛkaselɔi lɛ kɛ Herodebii lɛ kɛba eŋɔɔ amɛbakɛɛ, “Tsɔɔlɔ, wɔle akɛ anɔkwafo ji bo, ni otsɔ̃ɔ Nyɔŋmɔ gbɛ lɛ yɛ anɔkwale mli, ni osheee mɔ ko gbeyei, ejaakɛ okwɛɛɛ gbɔmɛi ahiɛiaŋ; 17no hewɔ lɛ, kɛɛmɔ wɔ bɔ ni osusuɔ, ani eja akɛ atsuɔ onia ahãa Kaisare, aloo ejaaa?” 18Shi Yesu yoo amɛyiŋtoo fɔŋ lɛ, ni ekɛɛ, “Osatofoi, mɛɛba nyɛtsɔ̃ɔ mi? 19Nyɛkɛ shika ni akɛtsuɔ onia lɛ atsɔ̃a mi!” Ni amɛkɛ shika lɛ bahã lɛ. 20Ni ebi amɛ akɛ, “Namɔ mfoniri nɛ, ni namɔ he sane aŋma yɛ nɔ lɛ?” 21#Rom 13.7 Amɛkɛɛ, “Kaisare nɔŋ.” Ni ekɛɛ amɛ akɛ, “Belɛ nyɛkɛ Kaisare nii ahãa Kaisare, ni Nyɔŋmɔ nii lɛ nyɛkɛhãa Nyɔŋmɔ!” 22Ni be ni amɛnu enɛ lɛ, amɛnaa kpɛ amɛhe, ni amɛshi lɛ amɛtee.
Gbohiiashitee he sanebimɔ
(Marko 12.18-27; Luka 20.27-40)
23 #
Bɔf 23.6, 8 Nakai gbi lɛ nɔ nɔŋŋ lɛ Sadukifoi ni kɛɔ akɛ gbohiiashitee ko bɛ lɛ hu ba eŋɔɔ babi lɛ akɛ, 24#Deut 25.5, 6 “Tsɔɔlɔ, Mose kɛɛ akɛ, ‘Kɛji mɔ ko gbo ni ebɛ bii lɛ enyɛmi aŋɔ eŋa lɛ, koni ewo shwiei ehã enyɛmi lɛ.’ 25Agbɛnɛ nyɛmimɛi kpawo hi wɔteŋ, ni kromɔbi lɛ ŋɔ yoo, ni egbo ni ebɛ bii, ni eshi eŋa lɛ ehã enyɛmi lɛ. 26Nakai nɔŋŋ eba mli yɛ mɔ ni ji enyɔ lɛ kɛ mɔ ni ji etɛ̃ lɛ gbɛfaŋ, kɛyashi mɔ ni ji kpawo lɛ nɔ. 27Shi amɛ fɛɛ amɛsɛɛ lɛ yoo lɛ hu gbo. 28Belɛ gbohiiashitee lɛ mli lɛ, mɛi kpawo lɛ ateŋ namɔ ŋa eeetsɔ̃, ejaakɛ amɛ fɛɛ amɛkɛ lɛ ehi shi?” 29Shi Yesu here nɔ ekɛɛ amɛ akɛ, “Nyɛmiitɔ̃ naa, ejaakɛ nyɛleee ŋmalɛi lɛ kɛ Nyɔŋmɔ hewalɛ lɛ. 30Ejaakɛ gbohiiashitee lɛ mli lɛ aŋɔɔɔ yei, ni asaŋ akɛ yei hãaa gbãlã; shi moŋ amɛtamɔ Nyɔŋmɔ bɔfoi yɛ ŋwɛi. 31Shi ani nyɛkaneko nɔ ni Nyɔŋmɔ kɛɛ yɛ gbohiiashitee lɛ he akɛ, 32#Ɛks 3.6 ‘Mi lɛ, Abraham Nyɔŋmɔ kɛ Isak Nyɔŋmɔ kɛ Yakob Nyɔŋmɔ ji mi lɛ?’ Nyɔŋmɔ lɛ jeee gbohii aNyɔŋmɔ ni, shi moŋ hiɛkãalɔi aNyɔŋmɔ ni.” 33Ni be ni asafoi lɛ nu enɛ lɛ, amɛhe jɔ̃ amɛhe yɛ etsɔ̃ɔmɔ lɛ he.
Kitã Wulu lɛ
(Marko 12.28-34; Luka 10.25-29)
34Shi be ni Farisifoi lɛ nu akɛ eku Sadukifoi lɛ anaa lɛ, amɛbabua amɛhe naa; 35ni amɛteŋ mɔ kome ni ji mlatsɔɔlɔ lɛ ka lɛ, ni ebi lɛ akɛ, 36“Tsɔɔlɔ te nɔ ni ji Mla lɛ mli kitã wuluŋ?” 37#Deut 6.5; Luk 10.25-28 Ni Yesu kɛɛ lɛ akɛ, “Suɔmɔ Nuŋtsɔ oNyɔŋmɔ lɛ kɛ otsui muu lɛ fɛɛ kɛ osusuma muu lɛ fɛɛ kɛ ojwɛŋmɔ muu lɛ fɛɛ. 38Kitãi lɛ amli oti kɛ ewulu nɛ. 39#Lev 19.18 Ni nɔ ni ji enyɔ lɛ tamɔ no, akɛ, ‘Suɔmɔ onaanyo gbɔmɔ tamɔ bɔ ni osumɔɔ bo diɛŋtsɛ ohe.’ 40#Mat 7.12; Rom 13.10; Gal 5.14 Kitãi enyɔ nɛɛ nɔ Mla lɛ kɛ gbalɔi lɛ fɛɛ damɔ.”
David Bi ni ji David Nuŋtsɔ lɛ
(Marko 12.35-37; Luka 20.41-44)
41Ni be ni Farisifoi lɛ anaa ekpe shi lɛ, Yesu bi amɛ akɛ, 42“Te nyɛsusuɔ yɛ Kristo lɛ he tɛŋŋ? Namɔ bi ji lɛ?” Amɛkɛɛ lɛ akɛ, “David Biŋ.” 43Ekɛɛ amɛ akɛ, “Mɛɛba mɔ ni David, yɛ Mumɔ lɛ naa lɛ, tsɛɔ lɛ ‘Nuŋtsɔ’ ni ekɛɔ akɛ,
44 #
Lal 110.1
‘Nuŋtsɔ lɛ kɛɛ miNuŋtsɔ lɛ akɛ,
Ta mininejurɔ nɔ
Kɛyashi beyinɔ ni mikɛ ohenyɛlɔi lɛ
aaawo onaji ashishi lɛ?’
45Agbɛnɛ kɛji David tsɛ lɛ Nuŋtsɔ lɛ, te feɔ tɛŋŋ mɔ ni efeɔ ebiŋ?” 46Ni mɔ ko nyɛɛɛ lɛ hetoo ko ahã, ni asaŋ kɛjɛ nakai gbi lɛ nɔ lɛ mɔ ko ekaaa lɛ nɔ ko bimɔ dɔŋŋ.
Bible in Ga Language © Bible Society of Ghana, 2020.