Mateo 21
21
Yesu Yerusalɛm botemɔ
(Marko 11.1-11; Luka 19.28-44; Yohane 12.12-19)
1Be ni amɛbɛŋkɛ Yerusalɛm ni amɛshɛ Betfage yɛ Mugɔŋ lɛ he lɛ, Yesu tsu ekaselɔi lɛ ateŋ mɛi enyɔ, 2ni ekɛɛ amɛ akɛ, “Nyɛyaa akrowa ni tua nyɛhiɛ nɛɛ mli, ni amrɔ lɛ nyɛaana teji yoo ni aŋmɔ lɛ shi kɛ ebi; nyɛfɛnea amɛ nyɛbahãa mi. 3#Mat 26.18 Ni kɛ mɔ ko bi nyɛ sane ko lɛ, nyɛkɛa lɛ akɛ, ‘Amɛhe miihia Nuŋtsɔ lɛ;’ ni amrɔ lɛ eeehã nyɛkɛ amɛ aba.”
4Shi afee enɛ fɛɛ koni nɔ ni gbalɔ lɛ wie lɛ aba mli akɛ,
5 #
Zak 9.9; Yes 62.11 “Nyɛkɛa Zion biyoo lɛ akɛ,
naa, omaŋtsɛ lɛ miiba oŋɔɔ.
Ehe jɔ, ni eta teji nɔ
kɛ teji ni ji nitsumɔ kooloo lɛ bi nɔ.”
6Ni kaselɔi lɛ tee amɛyafee bɔ ni Yesu fã amɛ lɛ. 7Ni amɛkɛ teji lɛ kɛ ebi lɛ ba, ni amɛkɛ amɛtadei lɛ shwie amɛnɔ, ni eho eta nɔ. 8#2 Maŋ 9.13 Ni mɛi pii kɛ amɛtadei ha gbɛ lɛ nɔ, ni mɛi krokomɛi hu folɔ tsei aniji amɛkɛshwie gbɛ lɛ nɔ; 9#Lal 118.25, 26 ni asafoi ni nyiɛ ehiɛ kɛ mɛi ni nyiɛ esɛɛ lɛ fɛɛ bolɔ amɛkɛɛ,
“Hosiana David Bi lɛ!
Ajɔɔ mɔ ni baa yɛ Nuŋtsɔ lɛ gbɛi mli lɛ!
Hosiana yɛ ŋwɛi flooflo!”
10Ni be ni ebote Yerusalɛm lɛ, maŋ muu lɛ fɛɛ bu hoo amɛkɛɛ, “Namɔ nɛ?” 11Shi asafoi lɛ kɛɛ, “Mɔ nɛ ji Yesu, gbalɔ lɛ ni jɛ Nazaret yɛ Galilea lɛ.”
Yesu tsuu Sɔlemɔ we lɛ he
(Marko 11.15-19; Luka 19.45-48)
12 #
Yoh 2.14, 16 Ni Yesu tee Sɔlemɔ we lɛ ni eyashwie mɛi ni hɔ̃ɔ nii kɛ mɛi ni heɔ nii yɛ Sɔlemɔ we lɛ, ni etsirɛ shikatsakelɔi lɛ akplɔ̃i lɛ kɛ mɛi ni hɔ̃ɔ okpoi lɛ asɛii lɛ etswiatswia shi. 13#Yes 56.7; Yer 7.11 Ni ekɛɛ amɛ akɛ, “Aŋma akɛ, ‘Aaatsɛ miwe lɛ Sɔlemɔ we,’ shi nyɛ lɛ, nyɛkɛfee ojotswalɔi abu.”
14Ni shwilafoi kɛ obubuafoi ba eŋɔɔ yɛ Sɔlemɔ we lɛ, ni etsa amɛ. 15Shi be ni osɔfonukpai lɛ kɛ mlatsɔɔlɔi lɛ na naakpɛɛnii ni efee kɛ gbekɛbii lɛ ni bolɔɔ yɛ Sɔlemɔ we lɛ akɛ, “Hosiana David Bi!” lɛ, amɛmli wo la, 16#Lal 8.2 ni amɛkɛɛ lɛ akɛ, “Oonu nɔ ni mɛnɛɛmɛi kɛɔ nɛɛ lo?” Ni Yesu kɛɛ amɛ akɛ, “Hɛɛ, ani nyɛkaneko dã akɛ, ‘Abifabii kɛ fufɔbii anaa osaa yijiemɔ oto yɛ?’ ” 17Ni eshi amɛ eje maŋ lɛ mli etee Betania, ni eyawɔ jɛi.
Yesu lomɔ agbãmitso lɛ
(Marko 11.12-14, 20-24)
18Shi leebi be ni eku esɛɛ eyaa maŋ lɛ mli lɛ, hɔ̃mɔ ye lɛ. 19#Luk 13.6 Ni ena agbãmitso ko yɛ gbɛ lɛ he, ni etsi eshɛ he, shi enaaa nɔ ko yɛ nɔ akɛ ja bai kɛkɛ; ni ekɛɛ tso lɛ akɛ, “Owoŋ yibii ko dɔŋŋ gbi ko gbi ko!” Ni agbãmitso lɛ ŋlã amrɔ lɛ nɔŋŋ. 20Ni be ni ekaselɔi lɛ na lɛ, amɛnaa kpɛ amɛhe ni amɛkɛɛ, “Te fee tɛŋŋ ni agbãmitso lɛ ŋlã amrɔ nɛɛŋ?” 21#Mat 17.20; 1 Kor 13.2 Shi Yesu here nɔ ni ekɛɛ amɛ akɛ, “Anɔkwale mikɛɔ nyɛ akɛ, kɛji nyɛyɛ hemɔkɛyeli ni nyɛjeee ŋwane lɛ, jeee nɔ ni afee agbãmitso nɛɛ kɛkɛ nyɛaafee; shi kɛji nyɛkɛɛ gɔŋ nɛɛ tete akɛ, ‘Fãa ni oyagbee ŋshɔŋ lɛ’, eeeba mli nakai. 22Ni nɔ fɛɛ nɔ ni nyɛaasɔle nyɛbi kɛ hemɔkɛyeli lɛ, nyɛnine aaashɛ nɔ.”
Hegbɛ ni Yesu yɔɔ
(Marko 11.27-33; Luka 20.1-8)
23 #
Yoh 2.18
Ni be ni eba Sɔlemɔ we lɛ ni etsɔ̃ɔ amɛ nii lɛ, osɔfonukpai lɛ kɛ maŋ onukpai lɛ ba eŋɔɔ amɛbabi lɛ akɛ, “Mɛɛ hegbɛ oyɔɔ hewɔ ofeɔ nɛkɛ nibii nɛɛ, ni namɔ hã bo nɛkɛ hegbɛ nɛɛ?” 24Shi Yesu here nɔ ni ekɛɛ amɛ akɛ, “Mi hu mibabi nyɛ sane kome, ni kɛji nyɛtsɔ̃ɔ mi lɛ, mi hu matsɔ̃ɔ nyɛ nɔ hegbɛ ni mikɛfeɔ nibii nɛɛ. 25Yohane Baptisimɔ lɛ, nɛgbɛ ejɛ? Ŋwɛi ejɛ, loo gbɔmɛi adɛŋ?” Ni amɛtao mli yɛ amɛteŋ akɛ, “Kɛji wɔkɛɛ ejɛ ŋwɛi lɛ, eeekɛɛ wɔ akɛ, ‘Mɛɛ hewɔ nyɛheee Yohane nyɛyeee mɔ?’ 26Ni kɛji wɔkɛɛ ejɛ gbɔmɛi adɛŋ lɛ, no hu wɔmiishe asafo lɛ gbeyei; ejaakɛ mɛi fɛɛ buɔ Yohane gbalɔ.” 27Kɛkɛ ni amɛhere Yesu nɔ amɛkɛɛ, “Wɔleee.” Lɛ hu ekɛɛ amɛ akɛ, “Belɛ mi hu mitsɔ̃ɔɔ nyɛ nɔ hegbɛ ni miyɔɔ hewɔ ni mifeɔ nibii nɛɛ mɔ.”
Bihii enyɔ lɛ he abɛ lɛ
28“Shi agbɛnɛ te nyɛsusuɔ tɛŋŋ? Nuu ko yɛ bii enyɔ; ni etee mɔ kome ŋɔɔ ni ekɛɛ, ‘Mibi; ŋmɛnɛ yaatsu nii yɛ miwaintrom lɛ mli.’ 29Ni ehere nɔ ekɛɛ, ‘Miyaaa.’ Shi fee sɛɛ lɛ eshwa ehe, ni etee. 30#Mat 7.21 Ni etee mɔ kroko lɛ hu ŋɔɔ, ni ekɛɛ lɛ nakai nɔŋŋ. Shi lɛ lɛ, ehere nɔ ekɛɛ, ‘Ataa, matee!’ Shi eyaaa. 31#Luk 18.14 Te mɛi enyɔ nɛɛ ateŋ mɔ ni fee nɔ ni amɛtsɛ lɛ sumɔɔŋ?” Amɛkɛɛ lɛ akɛ, “Tsutsumɔ lɛ ni.” Yesu kɛɛ amɛ akɛ, “Anɔkwale mikɛɔ nyɛ akɛ toohelɔi lɛ kɛ ajwamãŋi lɛ miitsɔ̃ nyɛhiɛ kɛmiiya Nyɔŋmɔ Maŋtsɛyeli lɛ mli. 32#Luk 3.12; 7.29-30 Ejaakɛ Yohane ba nyɛŋɔɔ yɛ jalɛ gbɛ lɛ nɔ, ni nyɛ lɛ nyɛheee lɛ nyɛyeee; shi tóohelɔi kɛ ajwamãŋi lɛ he lɛ amɛye. Ni fee sɛɛ, be ni nyɛyoo hu lɛ, nyɛshwaaa nyɛhe tete, koni nyɛhe lɛ nyɛye.”
Waintrom mli apaafoi fɔ̃ji lɛ
(Marko 12.1-12; Luka 20.9-19)
33 #
Yes 5.1, 2; Mat 25.14 “Nyɛboa abɛ kroko hu toi,” Yesu kɛɛ, “Shĩatsɛ ko yɛ, ni efee waintrom, ni efo afabaŋ ewo he, ni etsa wainbu yɛ mli, ni emã mɔɔ yɛ mli; ni ekɛhã hulɔi apaayeli; ni edom. 34Ni be ni wainyibii kpamɔ be lɛ shɛ lɛ, etsu etsuji kɛtee hulɔi lɛ aŋɔɔ, akɛ amɛyaŋɔ eyibii lɛ eko amɛbahã lɛ. 35Ni hulɔi lɛ mɔmɔ etsuji lɛ, ni amɛyi mɔ kome, ni amɛgbe mɔ kome, ni amɛtswia mɔ kome hu tɛi. 36Asaŋ etsu tsuji krokomɛi ni fa fe tsutsu bii lɛ, ni amɛfee amɛ hu nakai nɔŋŋ. 37Shi fee sɛɛ lɛ etsu ebinuu kɛtee amɛŋɔɔ ekɛɛ, ‘Mibi lɛ, lɛ lɛ amɛhiɛ aaasɔ lɛ.’ 38#Mat 27.18 Shi hulɔi lɛ, be ni amɛna binuu lɛ moŋ lɛ, amɛkɛɛkɛɛ amɛhe akɛ, ‘Niyelɔ lɛ nɛ! Nyɛbaa, nyɛhãa wɔgbea lɛ, koni wɔŋɔ egboshinii lɛ.’ 39Ni amɛmɔ lɛ amɛtsirɛ eyisɛɛ kɛjɛ waintrom lɛ mli, ni amɛyagbe lɛ. 40Agbɛnɛ, kɛji waintromtsɛ lɛ ba lɛ, mɛni eeefee hulɔi nɛɛ?” 41Amɛkɛɛ lɛ akɛ, “Eeekpãtã gbɔmɛi fɔ̃ji nɛɛ ahiɛ butuu, ni ekɛ waintrom lɛ aaahã hulɔi krokomɛi apaayeli, mɛi ni kɛ yibii aaabahã lɛ yɛ be ni sa mli.” 42#Lal 118.22, 23; Bɔf 4.11; Rom 9.33; 1 Pet 2.6-8 Yesu kɛɛ amɛ akɛ, “Ani nyɛkaneko yɛ Ŋmalɛi lɛ amli dã akɛ,
‘Tɛ lɛ ni tsutswalɔi lɛ shɛ fɔ̃ lɛ,
no nɔŋŋ etsɔ̃ koŋtɛ.
Nuŋtsɔ lɛ dɛŋ enɛ jɛ,
ni eyɛ naakpɛɛ yɛ wɔhiŋmɛiiaŋ?’
43No hewɔ lɛ, miikɛɛ nyɛ akɛ abaashɔ̃ Nyɔŋmɔ Maŋtsɛyeli lɛ yɛ nyɛdɛŋ, ni akɛaahã jeŋmaŋ ko ni woɔ yibii. [ 44Ni mɔ fɛɛ mɔ ni aaagbee tɛ nɛɛ nɔ lɛ emli aaatsɛrɛ; shi mɔ ni tɛ lɛ aaagbee enɔ lɛ, eeegbɛlɛ lɛ mɔnyɔmɔnyɔ.”]
45Ni be ni osɔfonukpai lɛ kɛ Farisifoi lɛ nu ebɛi lɛ, amɛkɔ sɛɛ akɛ amɛ amɛhe ewieɔ lɛ. 46Ni kulɛ amɛmiitao akɛ amɛmɔɔ lɛ, shi amɛyashe asafoi lɛ agbeyei, ejaakɛ asafoi lɛ buɔ lɛ gbalɔ.
Bible in Ga Language © Bible Society of Ghana, 2020.