Mateo 14
14
Yohane Baptisilɔ lɛ gbele
(Marko 6.14-29; Luka 9.7-9)
1Nakai be lɛ mli lɛ lumɔ Herode nu Yesu he sane; 2ni ekɛɛ etsuji lɛ akɛ, “Yohane Baptisilɔ lɛ ni; lɛ ete shi kɛjɛ gbohii ateŋ, no hewɔ ni hewalɛi lɛ tsuɔ nii yɛ emli nɛɛ.” 3#Mat 11.2; Luk 3.19-20 Ekɛɛ enɛ, ejaakɛ emɔ Yohane efi lɛ ni ewo lɛ tsuŋ yɛ Herodia, enyɛmi Filipo ŋa lɛ hewɔ. 4#Lev 18.16; 20.21 Efee enɛ, ejaakɛ Yohane kɛɔ lɛ akɛ, “Ejaaa gbɛ akɛ oŋɔɔ lɛ.” 5Ni kulɛ etao akɛ egbe lɛ, shi eeshe asafo lɛ gbeyei, ejaakɛ amɛbuɔ Yohane gbalɔ. 6Shi be ni ayeɔ Herode fɔmɔ gbi lɛ, Herodia biyoo lɛ bajo yɛ mɛi lɛ ahiɛ, ni efee Herode fɛo; 7no hewɔ lɛ, ekã kitã ekɛwo lɛ shi akɛ nɔ fɛɛ nɔ ni eeebi lɛ lɛ eeehã lɛ. 8Ni enyɛ wo lɛ ŋaa, ni ebakɛɛ akɛ, “Ŋɔɔ Yohane Baptisilɔ lɛ yitso ofɔ̃ kã mli ohã mi yɛ biɛ!” 9Edɔ maŋtsɛ lɛ; shi ekitãi ni ekãmɔ lɛ kɛ mɛi ni kɛ lɛ tara niyenii ashi lɛ ahewɔ lɛ, efã akɛ akɛhã lɛ. 10Ni etsu ayafo Yohane yitso yɛ tsu lɛ mli. 11Ni akɛ eyitso lɛ fɔ̃ kã mli kɛba, ni akɛhã oblayoo lɛ, ni ekɛyahã enyɛ. 12Ni Yohane kaselɔi lɛ ba amɛbawo egbonyo lɛ ni amɛyafu, ni amɛtee amɛyakɛɛ Yesu.
Yesu hã mɛi akpei enumɔ niyenii
(Marko 6.32-44; Luka 9.10-17; Yohane 6.1-14)
13Shi be ni Yesu nu lɛ, etsɔ̃ lɛlɛ mli kɛje jɛi kɛtee ŋa nɔ he ko banee. Ni be ni asafoi lɛ nu lɛ, amɛje maji lɛ amli amɛnyiɛ amɛnane kɛtiu lɛ. 14#Mat 9.36 Ni be ni Yesu kpeleke lɛ, ebana mɛi babaoo, ni emusuŋ tsɔ̃ lɛ yɛ amɛhewɔ, ni etsa amɛhelatsɛmɛi lɛ. 15Shi be ni shɛ gbɛkɛ lɛ, ekaselɔi lɛ ba eŋɔɔ amɛbakɛɛ, “Ŋa nɔ ji biɛ, ni je miina; jiemɔ asafoi lɛ agbɛ ni amɛya akrowai lɛ amli ni amɛyahe niyenii amɛye.” 16Shi Yesu kɛɛ amɛ akɛ, “Ehiaaa akɛ amɛaatee; nyɛ diɛŋtsɛ nyɛhãa amɛ nii amɛyea.” 17Shi amɛkɛɛ lɛ akɛ, “Nɔ pɛ ni wɔyɔɔ yɛ biɛ ji aboloi enumɔ kɛ loi enyɔ.” 18Shi ekɛɛ amɛ akɛ, “Nyɛkɛbahãa mi yɛ biɛ!” 19Ni efã asafoi lɛ akɛ amɛtaratara shi yɛ jwɛi lɛ anɔ. Ni ekɔlɔ aboloi enumɔ lɛ kɛ loi enyɔ lɛ, ni ekwɛ ŋwɛi ni ejɔɔ nɔ; ni ekumɔ aboloi lɛ amli ni ekɛhã ekaselɔi lɛ ni ekaselɔi lɛ hu kɛhã asafoi lɛ. 20#2 Maŋ 4.44 Ni amɛ fɛɛ amɛye, ni amɛtɔrɔ, ni amɛkɔlɔ fufuji ni shwɛ lɛ amɛwo kafui nyɔŋma kɛ enyɔ obɔ̃bɔ̃. 21Shi mɛi ni ye lɛ aaashɛ hii akpei enumɔ, soro yei kɛ gbekɛbii.
Yesu yasɔle
(Marko 6.45-52; Yohane 6.15-21)
22Ni amrɔ lɛ Yesu tsirɛ ekaselɔi lɛ ayisɛɛ, ni amɛbote lɛlɛ lɛ mli ni amɛtsɔ̃ ehiɛ kɛya ŋshɔ lɛ sɛɛgbɛ, kɛyashi eeewo asafoi lɛ agbɛ. 23#Luk 6.12; 9.18 Ni be ni ewo asafoi lɛ agbɛ lɛ, ekwɔ kɛtee gɔŋ lɛ nɔ he ko banee ni eyasɔle. Be ni je na lɛ, ekometoo eyɔɔ jɛi.
Yesu nyiɛ ŋshɔ hiɛ
(Marko 6.45-52; Yohane 6.15-21)
24Shi lɛlɛ lɛ eshɛ ŋshɔ lɛ teŋ momo ni ŋshɔkei lɛ miihɛlɛ lɛ, ejaakɛ eekpee kɔɔyɔɔ. 25Ni maŋkɛ hima, aaafee ŋmɛji etɛ̃ loo nɔ mli lɛ, Yesu nyiɛ ŋshɔ lɛ hiɛ kɛba amɛŋɔɔ. 26#Luk 24.37 Ni be ni ekaselɔi lɛ na lɛ ni enyiɛ ŋshɔ lɛ hiɛ lɛ, amɛtsui fã, ni amɛkɛɛ akɛ, “Sisaŋ!” Ni amɛbolɔ kɛ gbeyeishemɔ. 27Shi amrɔ lɛ Yesu fã enaa ekɛɛ amɛ akɛ, “Nyɛnaa tsui, miŋ; nyɛkashea gbeyei.” 28Shi Petro here nɔ ekɛɛ, “Nuŋtsɔ, kɛji bo ni lɛ, fã mi koni matsɔ̃ nu lɛ hiɛ kɛba oŋɔɔ.” 29Ni ekɛɛ, “Ba!” Ni Petro je lɛlɛ lɛ mli, ni enyiɛ nu lɛ hiɛ kɛmiiya Yesu ŋɔɔ. 30Shi be ni ena akɛ kɔɔyɔɔ lɛ miitswa waa lɛ, eshe gbeyei ni ebɔ̃i shiumɔ, ni ebo ekɛɛ, “Nuŋtsɔ, heremɔ mi!” 31#Mat 8.26 Ni amrɔ lɛ Yesu kpã enine mli esɔo lɛ, ni ekɛɛ lɛ akɛ, “Bo ni ohemɔkɛyeli faaa, mɛni hewɔ oje ŋwane?” 32Ni be ni amɛbote lɛlɛ lɛ mli lɛ, kɔɔyɔɔ lɛ fɔ̃ɔ tswaa. 33Ni mɛi ni yɔɔ lɛlɛ lɛ mli lɛ bakoto lɛ amɛkɛɛ, “Nyɔŋmɔ Bi ji bo lɛɛlɛŋ!”
Yesu tsa helatsɛmɛi yɛ Genesaret
(Marko 6.53-56)
34Ni be ni amɛfo ŋshɔ lɛ, amɛba Genesaret shikpɔŋ lɛ nɔ. 35Ni be ni jɛibii lɛ yoo lɛ lɛ, amɛtsu atee jɛi niiaŋ fɛɛ, ni ayaŋɔ helatsɛmɛi fɛɛ kɛba eŋɔɔ; 36#Mat 9.21; Luk 6.19 ni amɛkpa lɛ fai akɛ ehã amɛna etade lɛ naamuu lɛ he amɛtara kɛkɛ; ni mɛi abɔ fɛɛ ni tara he lɛ he wa amɛ kwraa.
Bible in Ga Language © Bible Society of Ghana, 2020.