Yesaia 26
26
Nyɔŋmɔ baahã emaŋ lɛ aye kunim
1Nakai gbi lɛ nɔ lɛ
aaala lala nɛɛ
yɛ Yuda shikpɔŋ lɛ nɔ akɛ,
“Wɔmaŋ ni wa,
Yehowa tswaa kunimyeli
tamɔ gbogboi kɛ kawoohei ewoɔ he.
2 #
Lal 118.19
Nyɛgbelea maŋ lɛ agboi lɛ
koni maŋ ni emli bii feɔ jalɛnii
asaŋ yeɔ anɔkwa lɛ abote mli.
3Yehowa ohãa maŋ ni hiɛ kã onɔ lɛ
naa toiŋjɔlɛ krɔŋŋ,
ejaakɛ bo onɔ amɛhiɛkãa.
4 #
Deut 32.4
Nyɛkɛ nyɛhiɛ afɔa Yehowa nɔ daa
ejaakɛ Yehowa, Nyɔŋmɔ lɛ,
naanɔ tɛsaa ni.
5Ejaakɛ eba mɛi ni tara
hei grɔŋŋi lɛ ashi;
ni maŋ ni kwɔ lɛ,
eba lɛ shi, ni ekɛ
shikpɔŋ eye egbɔ;
ewo lɛ etswa mlu mli.
6Mɛi ni aye amɛnɔ kɛ yiwalɛ lɛ,
amɛmiinaanaa enɔ agbɛnɛ;
ohiafoi miinaanaa enɔ.
7Mɔ ni feɔ jalɛnii lɛ,
egbɛ jaa hãa lɛ.
Ao, Jalɔ Koome, ohãa jalɔ lɛ
gbɛ lɛ nɔ feɔ trɛtrɛ hãa lɛ.
8 #
Lal 37.4
Yehowa, wɔmiikwɛ bo gbɛ
yɛ okojomɔi lɛ amli;
wɔmiishwe ogbɛ́i ni kaiɔ wɔ saji lɛ.
9Nyɔɔŋ lɛ, misusuma shweɔ bo,
mimumɔ ni yɔɔ mimli taoɔ bo
kɛ hiɛdɔɔ.
Ejaakɛ ojalɛ saneyeli
yɛ shikpɔŋ lɛ nɔ,
je lɛ mli bii kɛkaseɔ jalɛ nifeemɔ.
10 #
Lal 57.3
Kɛji ana efɔŋfeelɔi amɔbɔ lɛ,
amɛkɛkaseee nɔ ni ja feemɔ;
shi moŋ amɛyeɔ saji fɔ̃ji
yɛ he ni afeɔ jalɛnii yɛ,
ni enaaa Yehowa agbojee lɛ.
11 #
Heb 10.27
Ao Yehowa, owo onine nɔ,
shi kɛ̃lɛ amɛnaaa.
Hã amɛna joomɔ ni ojoɔ
yɛ omaŋbii ahe lɛ
koni amɛhiɛ agboi.
Hã la ni oto hã ohenyɛlɔi lɛ
akpãtã amɛhiɛ.
12Ao Yehowa, oooha wɔna toiŋjɔlɛ
ejaakɛ nitsumɔi fɛɛ ni wɔtsu lɛ,
bo ji mɔ ni otsu.
13Ao Yehowa, wɔNyɔŋmɔ,
nuŋtsɔmɛi krokomɛi
ebaye wɔnɔ kɛho;
shi bo pɛ ogbɛi lɛ kɛkɛ wɔle.
14Amɛgboi, ni amɛhiɛ etsɛ̃ŋ;
amɛtsɔmɔ sisai ni eteŋ shi dɔŋŋ,
ejaakɛ ogbala amɛtoi,
ni okpãtã amɛhiɛ,
ni akaiŋ amɛ dɔŋŋ.
15Ao Yehowa, ohá maŋ lɛ eshwere,
olɛɛ maŋ lɛ husui amli
ni enɛ ewo ohiɛ nyam.
16 #
Hos 5.15
Ao Yehowa, amɛhejaramɔ mli lɛ,
amɛtao osɛɛgbɛ;
amɛsɔle amɛkpa bo fai
be ni ogbalaa amɛtoi lɛ.
17 #
Yoh 16.21; Kpoj 12.2 Ao Yehowa, bɔ ni yoo ni hiɛ musu
kɛ̃mɔɔ ni ebolɔɔ
yɛ enɔnaa lɛ mli
kɛji fɔ̃mɔ eshɛ shi etã lɛ,
nakai pɛpɛɛpɛ wɔyɔɔ yɛ ohiɛ nɛɛ.
18 #
Mika 4.10
Wɔhiɛ musu, ni wɔmiikɛ̃mɔ;
wɔfɔɔɔ gbɔmɔ; shi wɔfɔ kɔɔyɔɔ.
Wɔnyɛko shikpɔŋ lɛ yiwala wɔhere;
wɔnyɛko nɔ ko wɔtsu.
19 #
Dan 12.2; Eze 37.1-14; Kpoj 20.12 Omɛi ni egboi lɛ ahiɛ aaatsɛ̃,
ni amɛgbɔmɔtsei lɛ aaate shi.
Ao nyɛ su mli bii,
nyɛhiɛ atsɛ̃a,
ni nyɛlaa kɛ miishɛɛ!
Ejaakɛ obɔ ni nyɔɔ lɛ,
bɔ ni kpɛlɛɔ ni,
ni ooohã gbohii lɛ ate shi.
20Mimaŋbii, nyɛbaa!
Mimaŋbii, nyɛbotea nyɛpiai lɛ amli,
ni nyɛŋamɔa nyɛshinai lɛ
nyɛwoa nyɛyi.
Nyɛtea nyɛhe hiŋmɛitswaa fioo ko
kɛyaashi Nyɔŋmɔ mlifu lɛ sɛɛ aaafo.
21Ejaakɛ, naa, Yehowa miije kpo
kɛmiijɛ eshihilɛhe lɛ
koni ebagbala je lɛ mli bii atoi
yɛ amɛnishaianii lɛ ahewɔ,
ni shikpɔŋ lɛ aaajie lá shi ni ashwie
yɛ enɔ lɛ etsɔ̃ɔ,
ni ehaŋ mɛi ni agbe
yɛ enɔ lɛ anɔ dɔŋŋ.”
Currently Selected:
Yesaia 26: NEGAB
Highlight
Share
Copy
Want to have your highlights saved across all your devices? Sign up or sign in
Bible in Ga Language © Bible Society of Ghana, 2020.
