Yesaia 25

Yijiemɔ Lala

1Ao Yehowa, bo ji miNyɔŋmɔ;

mibakafo bo, mibajie ogbɛi lɛ yi.

Ejaakɛ otsu naakpɛɛnii.

Oyiŋ ni oto kɛjɛ blema beebe lɛ

oye ehe anɔkwa.

2Oha maŋ lɛ fee koikoi;

maŋ ni atswa gbogbo awo he lɛ

etsɔ̃ koikoi;

Maŋsɛɛbii amaŋtsɛ we lɛ ekumɔ,

ni akuŋ sɛɛ amaŋ kɔkɔɔkɔ.

3No hewɔ lɛ, maŋ ko ni he wa

baawo ohiɛ nyam;

ni yiwalɔi amaji lɛ baashe bo gbeyei.

4Ejaakɛ otsɔ̃ abobaahe ohã ohiafo,

otsɔ̃ abobaahe ohã mɔ ni ehĩa

yɛ ehĩamɔ be mli.

Otsɔ̃ abobaahe yɛ ahum mli,

kɛ hɔ̃ɔŋ yɛ latsa be mli;

ejaakɛ yiwalɔi amlifu lɛ,

etamɔ ahum ni miitswa,

5loo lamɔ yɛ shikpɔŋ gbiŋ nɔ.

Shi bo Yehowa, ojɔɔ wɔhenyɛlɔi lɛ

ahoofeemɔ lɛ he,

ni yiwalɔ lɛ he ejɔ

tamɔ bɔ ni atatu jɔɔ jeŋ dɔlɛ he lɛ.

Nyɔŋmɔ ŋmɛ okplɔ̃

6 # Lal 22.28-31; Mat 23.2 Yehowa, Taiatsɛ lɛ, kɛ fɔŋ niyenii sɔkɔɔ kɛ wain momo ni adoo nɔ jogbaŋŋ baaŋmɛ shikpɔŋ lɛ nɔ bii fɛɛ okplɔ̃ yɛ gɔŋ nɛɛ nɔ. 7Ni yɛ gɔŋ nɛɛ nɔ nɔŋŋ lɛ, ebaajie ŋkɔmɔ ni etsɔ̃ tamɔ atatu ni ha majimaji fɛɛ anɔ lɛ yɛ amɛnɔ; eeewo awerɛho ni etsɔ̃ tamɔ muhɔɔ lɛ yɛ amɛnɔ. 8#1 Kor 15.55; Kpoj 7.17 Eeekpãtã gbele hiɛ kɛaatee nanɔ, ni Nuŋtsɔ Nyɔŋmɔ aaatsumɔ hiɛiaŋ yaafonui fɛɛ. Ebaafo emaŋ lɛ hiɛgbele lɛ sɛɛ yɛ shikpɔŋ muu lɛ fɛɛ nɔ. Yehowa diɛŋtsɛ wiemɔ nɛ.

9 # Lal 48.14 Nakai be lɛ aaakɛɛ akɛ, “Naa, wɔNyɔŋmɔ lɛ nɛ. Wɔkɛ wɔhiɛ efɔ̃ enɔ akɛ eeehere wɔ. Yehowa ni wɔhiɛ kã enɔ lɛ nɛ; nyɛhãa wɔmii ashɛa, ni wɔnyaa yɛ edɛŋ yiwalaheremɔ lɛ hewɔ.”

Nyɔŋmɔ baagbala Moab toi

10Yehowa kɛ ehewalɛ lɛ baafã gɔŋ nɛɛ he. Shi Moabbii lɛ abaanaanaa amɛnɔ tamɔ anaa jwɛi nɔ yɛ bu ni yɔɔ tumo nɔ. 11Nɛkɛ be mli lɛ Moabbii aaakpã amɛniji amli yɛ bu lɛ mli tamɔ serelɔ kpãa eniji amli ekɛsereɔ lɛ. Shi fɛɛ sɛɛ lɛ Yehowa baaba Moab hewoo kɛ edeŋmegbomɔ lɛ fɛɛ shi. 12#Yes 15.1—16.14; Yer 48.1-7; Eze 25.8-11; Amos 2.1-3; Zef 2.8-11 Ebaakumɔ Moab mɔji grɔŋŋi kɛ ehe gbogboi lɛ; eeekumɔ fɛɛ eshwie shi shwɛtɛɛ, ni ekɛ shikpɔŋ mlu aaaye egbɔ.

Currently Selected:

Yesaia 25: NEGAB

Highlight

Copy