Yesaia 19
19
Nyɔŋmɔ baagbala Ijipt toi
1 #
Yer 46.2-26; Eze 29.1-21 Ijipt toigbalamɔ he gbalɛ nɛ.
Naa, Yehowa ta atatu ni hiɛ foi nɔ kɛmiiba Ijipt. Ijipt amãgãi lɛ atsui efã yɛ ehiɛ. 2Yehowa kɛɛ akɛ, “Mahã Ijiptbii ate shi awo Ijiptbii nɔŋŋ, ni amɛ kɛ amɛhe baawu: mɔ kɛ enyɛmi, mɔ kɛ enaanyo, maŋ kɛ maŋ kɛ maŋtsɛyeli kɛ maŋtsɛyeli. 3Mahã Ijiptbii awerɛ aho amɛhe fe nine, ni amɛyiŋtoi fɛɛ baafee yaka. Amɛbaaya amãgãi kɛ klamɔfoi kɛ sisai aŋɔɔ amɛyabi nii. 4Mibaŋɔ Ijiptbii mawo nɔyelɔ yitsoŋwalɔ ko dɛŋ, ni maŋtsɛ ko ni esane wa baaye amɛnɔ. Mi Yehowa, ni ji Nuŋtsɔ lɛ, mikɛɛ.”
5Nilo Faa lɛ mli nu baaŋala, ni faa lɛ baagbi; 6nujɔi ni agbala awo faa lɛ he lɛ amli nu baasha; ni Ijipt Nilo Faa lɛ niji lɛ amli nu baakpɔŋ ni ebaagbi, ni neŋ kɛ glãi lɛ hu baakpɔtɔ. 7Nilo Faa lɛ toi hei komɛi baakamɔ shi efoji, ejaakɛ ŋmɔshi nii ni adu yɛ Nilo Faa lɛ toitoi lɛ baaŋala, ni kɔɔyɔɔ baatswa amɛ kɛya. 8Mɛi ni ji wolɛi ni hɛɔ baaye ŋkɔmɔ; mɛi fɛɛ ni shaa loo yɛ Nilo Faa lɛ mli lɛ kɛ mɛi ni ŋmɛɔ yaa yɛ faa lɛ mli anine baanyɛ shi. 9Mɛi ni kpooɔ ananaŋse anijiaŋ baaje wui, ni mɛi fɛɛ hu ni loɔ klala aaaye jaramɔ. 10Mamalolɔi kɛ ninenaa nitsulɔi fɛɛ atsui baaye.
11Zoan maŋ lɛ mli lumɛi lɛ kwashiai sɔŋŋ ni. Farao ŋaawolɔi ni le nii jogbaŋŋ lɛ aŋaawoo lɛ etsɔ buuluiaŋaawoo. Te feɔ tɛŋŋ ni nyɛkɛɔ Farao akɛ, “Nilelɔi abii ji wɔ, ni blema maŋtsɛmɛi ashwiei ji wɔ lɛ?” 12Agbɛnɛ Ijipt, nɛgbɛ onilelɔi lɛ yɔɔ? Hã amɛgba koni amɛhã ole nɔ yiŋtoo ni Yehowa, Taiatsɛ lɛ, eto yɛ ohe. 13Zoan lumɛi lɛ etsɔmɔ kwashiai, ni Memfis lumɛi hu alaka amɛ. Mɛi ni ji Ijipt akutsei lɛ akulashiŋi lɛ ehã Ijipt edu gbɛ. 14#1 Maŋ 22.21 Yehowa ehã awo Ijipt ŋaa gbonyo, ni no hewɔ lɛ, Ijipt yiŋ feɔ lɛ enyɔnyɔɔnyɔ, ni edidãa tamɔ dãatɔlɔ didãa kɛji eeshwe. 15Belɛ mɔ ko mɔ ko bɛ ni aaanyɛ awa Ijipt. Maŋ lɛ mli niiatsɛ jio, ohiafo jio, gbɔmɛi ni yɔɔ gbɛi jio, mɛi ni bɛ gbɛi jio amɛnyɛŋ lɛ amɛwa.
Ijipt baaja Yehowa
16Be miiba ni Ijiptbii baatsɔmɔ tamɔ yei. Amɛhe baakpokpo kɛ gbeyei yɛ Yehowa, Taiatsɛ lɛ, nine nɔ ni ebaawo yɛ amɛnɔ lɛ hewɔ. 17Yudabii ahe baaba gbeyei ahã Ijiptbii. Amɛteŋ mɔ fɛɛ mɔ ni aatsĩ Yuda gbɛi tã yɛ etoiŋ lɛ, eeeshe gbeyei yɛ Yehowa, Taiatsɛ lɛ, yiŋ ni eto yɛ Ijiptbii ahe lɛ hewɔ.
18 #
Yer 12.16
Nakai be lɛ abaawie Hebribii awiemɔ lɛ yɛ Ijipt shikpɔŋ lɛ nɔ maji enumɔ amli; ni amɛaakã Yehowa, Taiatsɛ lɛ kitã. Abaatsɛ nɛkɛ maji nɛɛ ateŋ ekome akɛ, “Hulu Maŋ.”
19Nakai be lɛ mli lɛ, abaama afɔleshãa latɛ ahã Yehowa yɛ Ijipt shikpɔŋ lɛ teŋ tuuŋtu, ni abaatswa akulashiŋ amã shikpɔŋ lɛ husu nɔ ahã Yehowa. 20Akulashiŋ nɛɛ baatsɔ̃ okadi kɛ odaseyeli nɔ ahã Yehowa, Taiatsɛ lɛ, yɛ Ijipt shikpɔŋ lɛ nɔ; ni kɛji amɛbolɔ amɛtsɛ Yehowa, Taiatsɛ lɛ, yɛ mɛi ni waa amɛ yi lɛ hewɔ lɛ, eeetsu yiwalaherelɔ kɛba amɛŋɔɔ, ni eeebafã amɛhe, ni eeehere amɛyiwala. 21Yehowa aaajie ehe shi etsɔ̃ɔ Ijiptbii, ni Ijiptbii aaana ale Yehowa nakai be lɛ, ni amɛkɛ afɔle kɛ shãa afɔle aaabasɔmɔ lɛ, ni amɛaawo Yehowa shi, ni amɛaye nɔ. 22Yehowa aaagbala Ijiptbii atoi, eeetswia amɛ nii, ni lɛ nɔŋŋ eeetsa amɛ ekoŋŋ, ni amɛaakpale kɛaaba Yehowa ŋɔɔ, ni eeebo amɛfaikpamɔ toi, ni eeetsa amɛ.
23Kɛji eshɛ nakai be lɛ, gbɛjegbɛ aaakã shi kɛaajɛ Ijipt kɛya Asiria; ni Asirianyo aaaba Ijipt, ni Ijiptnyo hu aaaya Asiria, ni Ijiptbii kɛ Asiriabii aaaja Yehowa yɛ he kome. 24Nakai be lɛ Israel kɛ Ijipt kɛ Asiria aaatsɔ̃mɔ tipɛŋfoi; ni maji etɛ̃ nɛɛ aaatsɔ̃ jɔɔmɔ ahã je lɛ mli maji fɛɛ. 25Yehowa, Taiatsɛ lɛ, aaajɔɔ amɛ akɛ, “Ajɔɔ Ijipt, ni ji mimaŋ lɛ, kɛ Asiria, ni ji mininenaa nitsumɔnii lɛ, kɛ Israel, mi diɛŋtsɛ mimaŋ ni mihala lɛ.”
Currently Selected:
Yesaia 19: NEGAB
Highlight
Share
Copy
Want to have your highlights saved across all your devices? Sign up or sign in
Bible in Ga Language © Bible Society of Ghana, 2020.
