Yesaia 14
14
Sɛɛkuu kɛjɛ Nomŋɔɔ mli
1 #
Zak 1.17
Yehowa musuŋ aaatsɔ̃ lɛ yɛ Yakob he, ni eeena Israel he tsuijurɔ ekoŋŋ, ni ekɛ Israelbii lɛ aaaba amɛ diɛŋtsɛ amɛshikpɔŋ nɔ. Maŋsɛɛbii aaabafata amɛhe, ni amɛaadɔmɔ Yakob we lɛ. 2Maŋsɛɛbii aaawa Israelbii lɛ kɛaayashɛ Israelbii ashikpɔŋ lɛ nɔ, ni amɛaatsɔ̃mɔ hii nyɔji kɛ yei nyɔji aha Israelbii lɛ. Israelbii lɛ aaaŋɔ mɛi ni ŋɔ amɛ nom lɛ nom, ni amɛaaye mɛi ni fee amɛ niseniianii lɛ anɔ akɛ nuŋtsɔmɛi.
Babilon Maŋtsɛ yɛ gbohiiaje
3Kɛji Yehowa ha nyɛ hejɔlɛ kɛjɛ piŋmɔ kɛ tɔlɛ kɛ nyɔŋ keketee ni aye nyɛ lɛ mli lɛ, 4nyɛkɛ wiemɔi aaabɔ Babilon maŋtsɛ ahora akɛ,
“Te aye tɛŋŋ ni mlifu ni shimɔɔ shi lɛ sɛɛ efo nɛɛ? Te aye tɛŋŋ ni haolɔ lɛ bɛ dɔŋŋ nɛɛ? 5Yehowa efo yiwalɔ lɛ hewalɛ lɛ sɛɛ, ni Yehowa ekumɔ nɔyelɔi adɛŋ tsi lɛ mli, 6mɔ ni kɛ mlila tswia majimaji lɛ nii babaoo ni etooo enine shi lɛ, yɛ maji ni eye amɛnɔ lɛ nɔ lɛ. 7Shikpɔŋ muu lɛ fɛɛ ena hejɔlɛ, ni enɔ ejɔ; ni amɛmiila nyamɔ lalai. 8Sɛsɛoi lɛ miiye bo yɔɔ, ni Lebanon tsenedru lɛ miikɛɛ akɛ, ‘Kɛjɛ ni aba bo shi nɛɛ lɛ, tsotoolɔ ko bɛŋkɛko wɔ.’
9“Gbohiiaje ni yɔɔ shikpɔŋ lɛ shishi esaa ehe eeba ebakpee bo. Ekanya mɛi fɛɛ ni ye onukpa yɛ shikpɔŋ lɛ nɔ lɛ yɛ ohewɔ; ni mɛi ni ye maŋtsɛ yɛ maji amli miihole amɛhe nɔ kɛmiijɛ amɛmaŋtsɛ sɛ̃ii anɔ. 10Amɛ fɛɛ tswɛm amɛbaabi bo akɛ, ‘Bo hu ogbɔjɔ nɛkɛ tamɔ wɔ nɔŋŋ? Otsɔ̃ tamɔ wɔ nɔŋŋ, pɛpɛɛpɛ?’ 11#Eze 32.18, 19 Aba ogbojee shi kɛba gbohiiaje, bo kɛ osaŋkui lɛ agbɛɛmɔ lɛ hu. Omlɛgɛ ji saa ni obaakã nɔ, ni gɔgɔmii ji mama ni obaaha.
12 #
Kpoj 8.10; 9.1 “Bo Tooloo, Jetsɛremɔ okadi, te aye tɛŋŋ ni ojɛ ŋwɛi obaagbee shi nɛɛ? Te aye tɛŋŋ ni, bo ni oba majimaji ashi lɛ, akɛ bo etswa shi nɛɛ? 13Shi bo lɛ okɛɛ ohe akɛ, ‘Mibakwɔ kɛya ŋwɛi kɛho Nyɔŋmɔ ŋulamii lɛ ahe. Mawo mimaŋtsɛ sɛ̃i lɛ nɔ kɛya ŋwɛi shɔŋŋ, ni mata nɔ yɛ kpee gɔŋ lɛ nɔ, yɛ kooyigbɛ shikpɔŋ lɛ nɔ tɔ̃ɔ. 14Makwɔ kɛteke atatui lɛ, ni mibafee mihe tamɔ Ŋwɛi Grɔŋŋnyo lɛ.’ 15#Eze 28.14; Mat 11.23; Luk 10.15 Shi moŋ aaaba bo shi kɛaatee gbohiiaje, kɛaatee bu kwɔŋkwɔŋ lɛ shishi tɔ̃ɔ.
16“Mɛi ni aaana bo lɛ, aaakwɛ bo gãa, ni amɛaabi amɛhe akɛ, ‘Kwɛɛ nuu lɛ ni hã shikpɔŋ lɛ hoso, ni ehã maŋtsɛyelii ahe kpokpo lɛ, 17mɔ ni kpãtã maji ahiɛ, ni ehã je lɛ tsɔ̃ tamɔ shiaŋa kpataa, ni eŋmɛɛɛ enomii ahe koni amɛku amɛsɛɛ kɛya amɛjaku shikpɔŋ lɛ nɔ lɛ nɛ?’ 18Jeŋ maji lɛ amaŋtsɛmɛi lɛ fɛɛ kamɔ shi kɛ anunyam, mɔ fɛɛ mɔ yɛ egbonyobu mli. 19#Yer 22.19 Shi bo lɛ ashɛ bo afɔ̃ kɛjɛ ogbonyobu lɛ mli tamɔ bi ni ashrake lɛ, ni no hewɔ lɛ, aaanyaŋe lɛ. Nɔ ni ona okɛha ohe ji mɛi ni akɛ klante egbe amɛ lɛ agbohii, ni amɛkpeleke shi kɛtee bu kwɔŋkwɔŋ lɛ mli, ni amɛtsɔmɔ tamɔ gbohii ni anaanaa amɛnɔ lɛ. 20Akɛ bo fataŋ amɛhe afuŋ, ejaakɛ bo diɛŋtsɛ okpãtã oshikpɔŋ lɛ hiɛ, ni ogbe omaŋbii lɛ. Atsiŋ efɔŋfeelɔi ashwiei atã dɔŋŋ gbi ko gbi ko. 21Nyɛsaa gbɛhe nyɛtoa maŋtsɛ nɛɛ bii lɛ yɛ amɛtsɛmɛi anɔsha lɛ hewɔ koni amɛkate shi amɛmiiŋɔ shikpɔŋ lɛ amɛmiifee amɛnɔ, ni amɛmiimamɔ maji amɛmiiwo je lɛ mli obɔ̃.”
Nyɔŋmɔ baakpãtã Babilon hiɛ
22Yehowa, Taiatsɛ lɛ, kɛɛ akɛ, “Mibate shi mawo Babilonbii, ni makpãtã amɛhiɛ, egbɛi kɛ enii ni eyɔɔ kɛ eshwiei fɛɛ. 23Mibahã jɛi atsɔ̃ shadeboai ashihilɛhe kɛ kpaakpoi ashikpɔŋ. Mikɛ bolɔ baabɛɛ lɛ mashwie.” Yehowa, Taiatsɛ, kɛɛ.
Nyɔŋmɔ baakpãtã Asiriabii ahiɛ
24Yehowa, Taiatsɛ lɛ, ekã kitã akɛ, “Lɛɛlɛŋ bɔ ni misusu lɛ, nakai ebaaba mli; ni bɔ ni mito miyiŋ lɛ, ja ena eba mli nakai. 25No ji akɛ mibakpãtã Asiriabii ni yɔɔ mishikpɔŋ, Israel, nɔ lɛ ahiɛ. Mibanaanaa amɛnɔ yɛ migɔji lɛ anɔ, ni mikɛbaawó Asiriabii apã ni kã Israelbii anɔ lɛ kɛje amɛkuɛ.” 26Enɛ ji yiŋ ni ato yɛ je lɛ fɛɛ he lɛ, ni ji minine ni akpã mli kɛtee maji lɛ fɛɛ anɔ lɛ nɛ. 27#Yes 10.5-34; Nah 1.1-3; Zef 2.13-15 Ejaakɛ Yehowa, Taiatsɛ lɛ, eto eyiŋ, ni namɔ baaku naa? Ekpã enine mli, ni namɔ aaanyɛ enaa aku?
Nyɔŋmɔ baakpãtã Filistibii ahiɛ
28 #
2 Maŋ 16.20; 2 Kron 28.27 Afi nɔ ni Maŋtsɛ Ahaz gbo lɛ, ajie ninaa nɛɛ ahã. 29Ao Filistia, kaanya, nyɛ fɛɛ nyɛkanyaa akɛ tso ni yi nyɛ lɛ eku; ejaakɛ blikã baajɛ klɛŋklɛŋ onufu lɛ mli eba, ni lɛ ebi lɛ aaafee onufu filikilɔ. 30Ohiafoi amli ohiafo lɛ aaana nii eye, ni mɛi fɛɛ ni ehia lɛ aaakamɔ shi yɛ hejɔlɛŋ shweshweeshwe; shi mikɛ hɔmɔ baagbe nyɛ, ni nyɛmɛi ni aaashwɛ lɛ mibagbe amɛ.
31 #
Yer 47.1-7; Eze 25.15-17; Yoel 3.4-8; Amos 1.6-8; Zef 2.4-7; Zak 9.5-7 Nyɛ Filistia maji fɛɛ, nyɛwoa yara; nyɛbolɔa, nyɛfoa, nyɛtsui afãa, ejaakɛ lasu ko efã kɛjɛ kooyigbɛ; ni tabilɔi ni baa lɛ, yakagbɔmɔ ko bɛ amɛteŋ.
32Mɛɛ hetoo aaahã Filistia bɔfoi lɛ? Aaakɛɛ amɛ akɛ, “Yehowa eto Zion shishi akɛ maŋ, ni jɛi ewebii shitswialɔi lɛ aaababa abo yɛ.”
Currently Selected:
Yesaia 14: NEGAB
Highlight
Share
Copy
Want to have your highlights saved across all your devices? Sign up or sign in
Bible in Ga Language © Bible Society of Ghana, 2020.
