Bɔfoi 27

Akɛ Paulo tee Roma

1 # Bɔf 25.12 Ni be ni akpɛ mli akɛ wɔbaaya Italia lɛ, amɛŋɔ Paulo kɛ gboklɛfoi krokomɛi hu amɛwo asraafoiohaatsɛ ni atsɛɔ lɛ Yulio ni jɛ Augusto asafo lɛ mli lɛ dɛŋ. 2#Bɔf 19.29; 20.4 Shi be ni wɔbote Adramitio lɛlɛ ko ni baafã kɛyatsɔ̃ Asia ŋshɔnaa maji lɛ anɔ lɛ mli lɛ, wɔfã, ni Aristarko, Makedonianyo ni jɛ Tesalonika lɛ fata wɔhe. 3#Bɔf 24.23; 28.16 Ni enɔ jetsɛremɔ lɛ wɔyamã Sidon, ni akɛni Yulio hiɛ Paulo dɔdɔɔdɔ hewɔ lɛ, eŋmɛ lɛ gbɛ akɛ eya eshieŋtsɛmɛi lɛ aŋɔɔ ni eyajɔɔ ehe. 4Ni wɔfã yɛ jɛi lɛ wɔsharã Kipro meo lɛ ejaakɛ wɔmiikpee kɔɔyɔɔ. 5Ni be ni wɔfo Kilikia kɛ Pamfilia ŋshɔ lɛ, wɔbamã Mira yɛ Likia. 6Ni asraafoiohaatsɛ lɛ na Aleksandria lɛlɛ ko yɛ jɛi ni miiya Italia, ni ejie wɔ ewo no mli.

7Wɔnyiɛ blɛoo gbii pii, ni ekpakpa ko dani wɔshɛ Knido ŋlɛnɔ, ni akɛni kɔɔyɔɔ lɛ eŋmɛɛɛ wɔ gbɛ hewɔ lɛ, wɔsharã Salmone meo lɛ kɛtsɔ̃ Kreta shishigbɛ; 8ni ekpakpa ko dani wɔfo mli yɛ jɛi kɛba he ko ni atsɛɔ jɛi akɛ Lɛji adaamɔhe Fɛɛfɛo ni bɛŋkɛ Lasea maŋ lɛ.

9 # 2 Kor 11.25, 26; Lev 16.29 Agbɛnɛ wɔfite be pii, ni akɛni buadayeli be lɛ hu eho momo hewɔ lɛ; ŋshɔhiɛnyiɛmɔ efee gbeyei. Hewɔ lɛ Paulo wo amɛ ŋaa 10ekɛɛ, “Ataamɛi, mina akɛ amanehulu kɛ nilaajemɔ pii baaba gbɛfãa nɛɛ mli, ni jeee lɛlɛ mli nii lɛ kɛ lɛlɛ lɛ kɛkɛ hiɛ baakpãtã, shi moŋ wɔwala diɛŋtsɛ hu.” 11Shi asraafoiohaatsɛ lɛ heɔ kudɔɔtsɛ lɛ kɛ lɛlɛtsɛ lɛ eyeɔ fe wiemɔi ni Paulo wieɔ lɛ. 12Ni akɛni Lɛji adaamɔhe Fɛɛfɛo lɛ kãaa shi jogbaŋŋ bɔ ni aaanyɛ aye fɛ̃ibe lɛ yɛ jɛi hewɔ lɛ, amɛteŋ mɛi pii wo ŋaa akɛ afã yɛ jɛi koni akwɛ akɛ aaanyɛ ashɛ Foinike ni ji Kreta Lɛji adaamɔhe ni kwɛɔ wuoyi-anai kɛ kooyi-anai gbɛ lɛ lo, koni aye fɛ̃ibe lɛ yɛ jɛi.

Ahum fã yɛ ŋshɔ lɛ hiɛ

13Shi be ni wuoyigbɛ kɔɔyɔɔ bɔ̃i tswaa nyrakee lɛ, efee amɛ akɛ nɔ ni amɛtaoɔ lɛ eba mli, ni amɛfã kɛsharã Kreta he kpaakpa. 14Shi etsɛɛɛ kɛkɛ ni ahum ko ni atsɛɔ lɛ kooyi-bokã kɔɔyɔɔ lɛ fã kɛbakpee amɛ. 15Ni be ni eta lɛlɛ lɛ mli ni enyɛɛɛ kɔɔyɔɔ lɛ ekpee lɛ, wɔhã ekpala. 16Ni be ni wɔkɛ foi sharã ŋshɔkpɔ fioo ni atsɛɔ lɛ Kauda lɛ meo lɛ, ekpakpa ko dani wɔnyɛ bonto lɛ wɔmɔ. 17Amɛwo lɛ, ni amɛkɛ kpãi fimɔ lɛlɛ lɛ, ni akɛni amɛmiishe gbeyei akɛ aleenɔ amɛaagbee shia nɔ hewɔ lɛ, amɛkpa abalaa lɛ, ni amɛkpala kɛkɛ. 18Ni akɛni ahum lɛ miitswa wɔ gbeyeigbeyei naakpa hewɔ lɛ, enɔ jetsɛremɔ lɛ, amɛ jie lɛlɛ lɛ mli nii lɛ eko amɛshwie; 19ni gbi ni ji etɛ̃ nɔ lɛ wɔkɛ wɔ diɛŋtsɛ wɔniji jie lɛlɛ he nibii lɛ wɔshwie. 20Wɔnaaa hulu loo ŋulamii gbii pii ni asaŋ jeee ahum fioo tswaa kɛkpeɔ wɔ lɛ, hewɔ lɛ agbɛnɛ wɔhiɛ kãaa wala nɔ dɔŋŋ.

21Shi be ni gbii pii eho ni wɔyeko nɔ ko lɛ, Paulo te shi edamɔ amɛteŋ ni ekɛɛ, “Ataamɛi, kulɛ esa akɛ nyɛboɔ mi toi ni akafã yɛ Kreta ni wɔbana amanehulu ni nibii laaje nɛkɛ. 22Ni agbɛnɛ hu miiwo nyɛ ŋaa akɛ nyɛna tsui, ejaakɛ nyɛteŋ mɔ ko yiwala tɔŋ, ja lɛlɛ lɛ kɛkɛ. 23Ejaakɛ nyɔɔŋ nɛɛ mli lɛ Nyɔŋmɔ mɔ nɔ ni mi ji kɛ mɔ hu ni misɔ̃mɔɔ lɛ bɔfo badamɔ mimasɛi 24#Bɔf 23.11 ni ekɛɛ, ‘Kaashe gbeyei, Paulo! Ja akɛ bo yadãmɔ Kaisare hiɛ kɛ̃; ni naa, Nyɔŋmɔ eŋɔ mɛi fɛɛ ni kɛ bo yɔɔ lɛlɛ lɛ mli lɛ eke bo.’ 25Hewɔ lɛ nyɛnaa tsui, Ataamɛi, ejaakɛ miheɔ Nyɔŋmɔ miyeɔ akɛ bɔ ni abakɛɛ mi lɛ, nakai baaba mli. 26#Bɔf 28.1 Shi bɔ fɛɛ bɔ ni fee lɛ, wɔɔyasha ŋshɔkpɔ ko nɔ kɛ̃.”

27Shi gbi ni ji nyɔŋma kɛ ejwɛ lɛ nyɔɔŋ lɛ wɔmiikpala kɛmiiya kɛmiiba yɛ Adria Ŋshɔ lɛ nɔ. Ni aaafee nyɔɔŋteŋ lɛ amlakui lɛ ajwɛŋmɔ kɛɛ amɛ akɛ amɛbɛŋkɛ shikpɔŋ ko, 28ni amɛfɔ̃ susumɔ kpãa, ni amɛna abasaŋ nyɔŋmai enyɔ; ni be ni amɛtee amɛhiɛ fioo lɛ, amɛfɔ̃ ekoŋŋ ni amɛna abasaŋ nyɔŋma kɛ enumɔ. 29Kɛkɛ ni amɛshe gbeyei akɛ aleenɔ wɔɔyagbee tɛsai anɔ, ni amɛŋmɛ sɛkɛi ejwɛ yɛ lɛlɛ lɛ sɛɛgbɛ, ni amɛmiishwe ni je atsɛre. 30Shi be ni amlakui lɛ tao foi aje yɛ lɛlɛ lɛ mli ni amɛkwa amɛshi bonto lɛ amɛma ŋshɔ lɛ hiɛ tamɔ nɔ ni sɛkɛi amɛyaaŋmɛ yɛ lɛlɛ lɛ yitsogbɛ lɛ, 31Paulo kɛɛ asraafoiohaatsɛ lɛ kɛ asraafoi lɛ akɛ “Kɛji mɛnɛɛmɛi ehiii lɛlɛ lɛ mli lɛ, no lɛ anyɛŋ nyɛyiwala ahere.” 32Kɛkɛ ni asraafoi lɛ folɔ bonto lɛ he taŋkpei lɛ, ni amɛhã eyagbee shi.

33 # Bɔf 27.27 Shi kɛbaa jetsɛremɔ mli lɛ, Paulo kpa amɛ fɛɛ fai akɛ amɛye nɔ ko ni ekɛɛ, “Gbii nyɔŋma kɛ ejwɛ sɔŋŋ nɛ ni nɔ ko nɔ ko eyako nyɛdaaŋ. 34#Mat 10.30 No hewɔ lɛ, miikpa nyɛ fai ni nyɛye nii ejaakɛ no aaahã nyɛyi ana wala, ejaakɛ nyɛteŋ mɔ ko yitsɔi kome ejeŋ eyiteŋ enyɔŋ shi.” 35#Yoh 6.11; 1 Tim 4.4 Ni be ni ekɛɛ nakai lɛ, ekɔ aboloo, ni eda Nyɔŋmɔ shi yɛ amɛ fɛɛ amɛhiɛ, ni ekumɔ mli ebɔ̃i yeli. 36Kɛkɛ ni amɛ fɛɛ amɛna tsui, ni amɛ hu amɛye nii. 37Shi wɔ mɛi ni wɔyɔɔ lɛlɛ lɛ mli lɛ fɛɛ naa shiɔ mɛi ohai enyɔ kɛ nyɔŋmai kpawo kɛ ekpaa. 38Ni be ni amɛye nii ni amɛtɔrɔ lɛ, amɛshɛrɛ abele ni amɛwo lɛ amɛshwie ŋshɔ lɛ mli, ni amɛhã lɛlɛ lɛ fee huyɛhuyɛ.

Lɛlɛ lɛ sha shi

39Ni be ni je tsɛre lɛ amɛna akɛ amɛleee shikpɔŋ lɛ, shi amɛna ble ko kɛ enaa shia, ni amɛto amɛyiŋ akɛ, kɛ amɛaanyɛ lɛ, amɛaahã lɛlɛ lɛ ayasha shi yɛ jɛi. 40Ni amɛfolɔ sɛkɛi lɛ amɛwo ŋshɔ lɛ mli, ni amɛfɛne kudɔɔ lɛ he kpãi lɛ hu, ni amɛshi hiɛgbɛ abalaa lɛ kɛkpee kɔɔyɔɔ ni tswaa lɛ, ni amɛtsɔ̃ eyi amɛmã shianɔgbɛ. 41Shi akɛni amɛyagbee ŋshɔi enyɔ alɛwu nɔ hewɔ lɛ, amɛkɛ lɛlɛ lɛ yasha shi; ni eyitsogbɛ lɛ yatsɛkɛ shi shiŋŋ, shi esɛɛgbɛ lɛ ŋshɔkei lɛ anaawalɛ lɛ jwara lɛ.

42Shi asraafoi lɛ ayiŋtoo ji akɛ amɛaagbe gboklɛfoi lɛ, koni amɛteŋ mɔ ko akasere kɛmiiya ni ejo foi. 43Shi akɛni asraafoiohaatsɛ lɛ taoɔ Paulo yiwala ehere hewɔ lɛ, etsi amɛyiŋtoo lɛ naa, ni efã akɛ mɛi ni le seremɔ lɛ tsutsu atu agbee ŋshɔ lɛ mli, ni amɛya shikpɔŋ; 44#Bɔf 27.22-25 shi mɛi ni eshwɛ lɛ ateŋ mɛi komɛi abumɔ ŋmoŋmolo nɔ, ni mɛi komɛi hu abumɔ lɛlɛ koi lɛ anɔ. Bɔ ni fee ni mɛi lɛ fɛɛ yashɛ shikpɔŋ shweshweeshwe ji no.

Currently Selected:

Bɔfoi 27: NEGAB

Highlight

Copy