Bɔfoi 26

Paulo yɛ Agripa hiɛ

1Ni Agripa kɛɛ Paulo akɛ, “Aŋmɛ bo gbɛ akɛ okɔlɔ ogbee.” Kɛkɛ ni Paulo fɔ̃ enine ni ejie enaa ekɛɛ, 2“Maŋtsɛ Agripa, eji miishɛɛ sane kɛhã mi akɛ mibajie minaa ŋmɛnɛ yɛ ohiɛ, yɛ nibii fɛɛ ni Yudafoi lɛ folɔɔ minaa yɛ he lɛ hewɔ, 3ejaakɛ ole Yudafoi lɛ akusumi kɛ ŋwanejee saji lɛ fɛɛ jogbaŋŋ. No hewɔ lɛ, miikpa bo fai ni oŋmɛ otsui shi obo mi toi.

4“Yudafoi lɛ fɛɛ le mijeŋba kɛjɛ miblahiaŋ, bɔ ni mihi mimaŋ lɛ mli kɛ Yerusalɛm mihã tsutsu lɛ. 5#Bɔf 23.6; Fil 3.5 Ni kɛji amɛmiisumɔ akɛ amɛaaye he odase lɛ, amɛle mi sa kɛjɛ shishijee lɛ akɛ miba mijeŋ yɛ wɔjamɔ lɛ mli kuu ni yɔɔ veveeve fe fɛɛ lɛ tsɔ̃ɔmɔ naa akɛ Farisifonyo. 6#Bɔf 28.20 Ni agbɛnɛ lɛ, shi ni Nyɔŋmɔ ewo wɔtsɛmɛi lɛ hiɛnɔkãmɔ lɛ hewɔ midãmɔ biɛ ni akojoɔ mi nɛɛ. 7#Bɔf 24.15 No nɔ wɔkutsei nyɔŋma kɛ enyɔ lɛ hiɛ kã akɛ amɛnine aaashɛ hewɔ ni amɛhiɛ jamɔ mli waa nyɔɔŋ kɛ shwane lɛ. Maŋtsɛ Agripa, nɛkɛ hiɛnɔkãmɔ nɛɛ hewɔ Yudafoi lɛ folɔɔ minãa nɛɛ. 8Mɛɛba mɔ ni nyɛbuɔ akɛ ebɛ mli akɛ Nyɔŋmɔ teɔ gbohii ashi lɛ?

9“Shi mi diɛŋtsɛ hu efee mi akɛ esa akɛ mafee nii pii kɛku Yesu Nazarenyo lɛ gbɛi lɛ naa; 10ni mina mifee nakai hu yɛ Yerusalɛm, ni akɛni mina hegbɛ yɛ osɔfonukpai lɛ adɛŋ lɛ, miwo mɛi krɔŋkrɔŋi lɛ ateŋ mɛi pii atsuŋ, ni kɛ abaagbe amɛ lɛ minaa yɛ mli eko, 11ni mifɔɔ amɛ yiwaa yɛ kpeehei lɛ fɛɛ, ni minyɛɔ amɛnɔ akɛ amɛwie musubɔɔ wiemɔi, ni miye amɛhe sɛkɛ ko ni wa, ni miwaa amɛyi kɛyaa majiasɛɛ.”

Paulo gba etsuitsakemɔ he sane

(Bɔfoi 9.1-29; 22.3-21)

12“Enɛ mli mihiɛ ni mifã gbɛ kɛmiiya Damasko yɛ osɔfonukpai lɛ ahewalɛ kɛ gbɛŋmɛɛ naa, 13ni shwane fintiŋŋ, be ni minyiɛ gbɛ lɛ nɔ lɛ, Maŋtsɛ, mina la ko ni kpɛɔ fe hulu jɛ ŋwɛi babɔle mi kɛ mɛi ni kɛ mi nyiɛ lɛ. 14Ni be ni wɔ fɛɛ wɔgbeegbee shi lɛ, minu gbee ko kɛ mi wie yɛ Hebri wiemɔ lɛ mli akɛ, ‘Saul, Saul, mɛɛba owaa mi yi? Ewa hã bo akɛ ooofã ntia oshi kooloi akpalamɔ tso lɛ naa dade lɛ.’ 15Ni mikɛɛ, ‘Bo namɔŋ, Nuŋtsɔ?’ Ni nuŋtsɔ lɛ kɛɛ, ‘Mi Yesu ni owaa lɛ yi lɛ ni. 16Shi tee shi ni odamɔ onaji anɔ; ejaakɛ enɛ hewɔ mijie mihe kpo mitsɔ̃ɔ bo nɛɛ, koni mafee bo sɔ̃ɔlɔ kɛ odasefonyo yɛ nibii ni ona kɛ nii ni mibajie mihe kpo matsɔ̃ɔ bo yɛ hewɔ lɛ ahe. 17Ni majie bo kɛjɛ maŋ lɛ kɛ jeŋmaji lɛ ni mitsuɔ bo kɛya amɛŋɔɔ nɛɛ adɛŋ, 18#Bɔf 20.32 ni oyagbele amɛhiŋmɛii, koni amɛkpale kɛjɛ duŋ mli kɛba la he, kɛjɛ abonsam hewalɛ mli kɛba Nyɔŋmɔ ŋɔ̃ɔ, ni amɛna amɛhe eshaifaa kɛ gboshinii yɛ mɛi ni akɛ minɔ hemɔkɛyeli efee amɛ krɔŋkrɔŋ lɛ ateŋ.’ ”

Paulo gba enitsumɔ he sane

19 # Gal 1.16 “No hewɔ lɛ, Maŋtsɛ Agripa, migbooo nɔ ni ajie kpo kɛjɛ ŋwɛi atsɔɔ mi lɛ nɔ toi; 20shi moŋ mijaje mitsɔ̃ɔ mɛi ni yɔɔ Damasko lɛ tsutsu, kɛ mɛi ni yɔɔ Yerusalɛm kɛ Yuda shikpɔŋ lɛ nɔ fɛɛ, kɛ jeŋmaji lɛ hu akɛ amɛtsake amɛtsui ni amɛkpale kɛba Nyɔŋmɔ ŋɔɔ ni amɛtsu nii ni sa tsuitsakemɔ. 21#Bɔf 21.30, 31 Enɛɛmɛi ahewɔ ni Yudafoi lɛ mɔ mi yɛ Sɔlemɔ we lɛ ni amɛka mi gbee. 22#Luk 24.44-47 Shi Nyɔŋmɔ yelikɛbuamɔ naa mikɛdamɔ shi kɛbashi ŋmɛnɛ gbi nɛɛ nɔ, ni miyeɔ odase mitsɔ̃ɔ mɛi bibii kɛ mɛi wuji nɛɛ, ni miwieee wiemɔ ko akɛ ja nii ni gbalɔi lɛ kɛ Mose hu ewie akɛ ebaaba lɛ, 23#1 Kor 15.20 bɔ ni Kristo lɛ baana amanehulu, bɔ ni ebaatsɔ̃ klɛŋklɛŋ mɔ yɛ gbohiiashitee lɛ mli ni ebaajaje la lɛ he sane etsɔɔ maŋ lɛ kɛ jeŋmaji lɛ.”

24Be ni Paulo jie enaa nɛkɛ lɛ, Festo kɛ gbee ni wa kɛɛ, “Paulo, sɛkɛ oyeɔ nɛɛ! Woloŋkasemɔ sɔŋŋ ehã oyeɔ sɛkɛ nɛɛ!” 25Shi Paulo kɛɛ, “Miyeko sɛkɛ, Festo, lumɔ jurɔ, shi anɔkwale kɛ hiɛshikãmɔ wiemɔi miwieɔ nɛɛ, 26#Yoh 18.20 ejaakɛ maŋtsɛ lɛ ni miwieɔ kɛ ekãa mitsɔ̃ɔ lɛ nɛɛ lɛ le saji nɛɛ amli; ni mikpaaa shi akɛ nibii nɛɛ eko yɛ ni akɛtee lɛ; ejaakɛ jeee teemɔ he ko afee enɛ yɛ. 27Nto oheɔ gbalɔi lɛ oyeɔ, Maŋtsɛ Agripa? Mile akɛ oheɔ oyeɔ.” 28Shi Agripa kɛɛ Paulo akɛ, “Shwɛ fioo ni ohã matsake mijwɛŋmɔ ni matsɔ̃ Kristofonyo.” 29Ni Paulo kɛɛ, “Mina ni kulɛ Nyɔŋmɔ hã ba mli akɛ, shwɛ fioo jio, shwɛ pii jio, jeee bo okome kɛkɛ, shi moŋ mɛi fɛɛ ni boɔ mi toi ŋmɛnɛ nɛɛ hu tsɔ̃ tamɔ mi, shi gboklɛi nɛɛ eko kɛkɛ akawo amɛ!”

30Kɛkɛ ni maŋtsɛ lɛ kɛ amralo lɛ kɛ Bernike kɛ mɛi ni tara shi lɛ te shi, 31ni amɛtee afã ni amɛyawie yɛ amɛteŋ akɛ, “Nuu nɛɛ efeko nɔ ko ni sa gbele loo tsuŋwoo.” 32Ni Agripa kɛɛ Festo akɛ, “Eji nuu nɛɛ kɛ esane lɛ hãko Kaisare yeli kulɛ aaanyɛ ehe aŋmɛɛ.”

Currently Selected:

Bɔfoi 26: NEGAB

Highlight

Copy